Выбрать язык
Книги Ветхого Завета
Книги Нового Завета
с русским текстомСмузьшись терди каванямань илазонза
1Смузьшись путсь эстейнза куд,
лаксезень сонь сисем орванзон*а,
2 печксь жувата, шовордась виназонза танцти тишень таньф
и аноклась эсь пялонза каванямань шра.
3 Сон кучезень тейнза покоди стирьхнень
ошень сери васттнень лангста кулянь пачфтема:
4 «Эряфонь аф содай, сак тяза!»
И сянди, кинь кржа ёньдонза, сон мярьгсь:
5 «Сада, ярхцада монь кшидон,
симода винадон, конань мон шовордайне танцти тишень таньфса.
6 Кадость аф содамошинтень и карматада эряма;
якада ёнть кинзон ланга».
Азорда пелемась – тя смузьшить ушетксоц
7 Кие сюцесы-тонафтсы визьксонь аф содай пеетькшнить,
ся таргай эсь лангозонза апрякамат,
кие сюцесы шкайфтомоть,
ся сингордафтсы эсь прянц.
8 Тяк сюцекшне визьксонь аф содай пеетькшнить,
афток сон врьгяти лангозт;
сюцекшнек смузють,
и сон кармай кельгомот.
9 Макст смузюти ётть,
и сон арай нинге сяда смузюкс;
тонафтк видексшинь ломанть,
и сон касфтсы эсь содамошинц.
10 Азорда пелемась – тя смузьшить ушетксоц,
Иняруть содамац – вага мезьса шарьхкодемась.
11 Монь вельден ламолгодыхть тонь шитне,
поладовихть эрямань кизотне.
12 Кда тон смузюват, смузьшице лезды тейть;
кда тон кяжиста пеетькшният, тонць тянь эзда кирдят зиян.
Ёньфтомашись уски эсь мельганза
13 Ёньфтомашись, кода кайгиста корхтай ава,
кона пряфтома и мезевок аф содай.
14 Сон оцязоравакс озаф кудгенкшенц ваксса,
ошть инь сери вастсонза,
15 и тернесыне вакска ётнихнень,
конат молихть видеста эсь кигаст:
16 «Эряфонь аф содай, сак тяза!»
И сянди, кинь кржа ёньдонза, сон мярьгсь:
17 «Салаф веттне ламбапт,
салава сивф кшись танцти».
18 И тов молись аф содасы: тосот кулофне,
сонь инжиенза тонашить крхка вастсонзот.
*а 9:1 орва – столб
Глава 9