Выбрать язык
Книги Ветхого Завета
Книги Нового Завета
с русским текстомВанфнек пряцень лия ломанть инкса валонь максомада
1Цёрай! Кда тон максоть вал лия ломанть инкса,
кда сявить эсь лангозт тейть аф содаф ломанть шумонзон*а,
2 эста тон сотыть кяттнень эсь валонь максомацень мархта,
тонцень валхне кундадязь тонь.
3 Цёрай, вага мезе тик эсь прянь идеманди
– вдь тон повоть лия ломанть кядьс:
мольхть ся ломанти, прак пильгозонза
и эняльтть нолдамацень колга.
4 Тят макса сельмотненди матодовомс,
сельмокерхненди коневомс.
5 Идек пря, кода вирьбаксянь сявась ворьгоди сатыенц эзда,
кода нармонць лийкстай кундаенц кядьста.
Нолашить колга
6 Нолапарь, архт панжамти,
ватт сонь тевонзон лангс, и ёнияк.
7 Сонь лангсонза аш оцюня,
аш мельганза ваны, аш азороцка,
8 но сон кизонда аноклакшнесы кшинц,
нумань пингста кочксесы ярхцамбяленц.
9 Нолапарь, мзярс тон кармат мадозь ащема?
Мзярда сргозят удомацень эзда?
10 Аф ламоняс удат, аф ламоняс нуват,
аф ламоняс кядень путозь нюрьксят,
11 и ашушись сай тейть кода нельги-салай ломань,
и ашсь – кода тор мархта ломань.
Аф виде вайме ломанть пец
12 Ковга аф кондясти и пяк кальдяв ся ломанць,
кона якси-васькафни сембе вастова,
13 кона салава чипоряй сельмот, тутмии пилькт
и кядьса-сурса няфни тяштькст-месть.
14 Сон седисонза канни кичкор мяльхть:
сон фалу арьси кода ба тиемс кальдяв
и срхкафни сялондомат.
15 Тянкса сонь апак учентт сатсы юмамась-арамась,
аф кенери варжакстомска – прай, и аф пчкафтови ни.
Сисепне, конатнень Шкайсь афолезень няе
16 Ва ня кототнень афолезень няе Азорсь,
сисемцеть эзда туткоды Сонь ваймоц:
17 прянь няи сельмотнень, васькафни кяльть,
кяттнень, конат шудефтьсазь аф муворуть веронц,
18 седить, кона арьси-понай кальдяв мяльхть,
пилькнень, конат эрязста ласькихть зиянонь тиема,
19 судса аф виде няфтемань максыть, кона ваймонцка тарксесы васькафнемаса,
и ломанть, кона кепси сялондомат эсь брадонзон ёткса.
Кие полафтсы поланц – ся ёньфтома
20 Цёрай! Кулхцонтк аляцень кошардоманц,
тят шарфне тядяцень ёньц путомадонза.
21 Кирдить синь фалу эсь седисот,
повфтайть синь кргазт.
22 Мзярда туят кис, синь кармайхть вятемот тонь;
мзярда мадат, кармайхть ванфнемот;
мзярда сргозят, кармайхть корхнема мархтот:
23 сяс мес кошаркссь – тя валдоптома,
ёньц путомась – тя валда,
сюцемась-тонафтомась – тя эряфти вяти ки.
24 Синь ванфттядязь тонь аф пара авада,
лиять рьванц ламбама валдонза.
25 Тят арьсе эсь седисот сонь мазышинц колга,
тят васькафтов сельмованфонц эзда.
26 Вдь усксеви авась нельгсы мекольце кши сускомтьке,
а лия мирдень рьвясь сявсы питнидонга питни ваймоть.б
27 Дяряй кивок сявови повозонза тол
щамонц апак плхтак?
28 Дяряй кивок ётави крфай сеттнень ланга
пильгонь апак пидек?
29 Тяфта ули сяньге мархта, кие якай лиять рьванцты:
кие ктморяй мархтонза, ся ули наказаф.
30 Салайда безярдихть,
хуш сон салай пеконц топафтомс, вачашинь сюнеда,*в
31 но кундандярясазь, эста панды сисемонь-крда,
макссы сембе уликсонц кудстонза.
32 А кие усксеви лиянь рьвя мархта, сянь аш ёнец;
тяфта тиендись юмафтсы-арафтсы эсь прянц.
33 Сонь учсесазь пикссемась и визьксшись,
и тя визьксшись аф нардави лангстонза.
34 Вдь кунелямась вятьсы мирдть пяляскодомас,
сон ули аф ужяльдикс, мзярда сай кяжень пандома шись.
35 Сон кодамовок питнень пандома аф сяви тянкса,
сон аф топафтови, мзяра казне тон афолеть канда тейнза.
*а 6:1 шума – долг (денежный)
*б 6:26 Тя вастть ули лия шарьхкодемацка: Вдь усксеви авать питнец – кши суском, a лия мирдень рьвять инкса пандат эряфцень мархта.
*в 6:30 Тя вастть ули лия шарьхкодемацка: Салайть судендасазь аф казямста, кда сон салай вачашинь сюнеда, пеконц пяшкодеманкса.
Глава 6