Выбрать язык
Книги Ветхого Завета
Книги Нового Завета
с русским текстомВанфтк пряцень усксеви авада
1Цёрай! Тиентть монь валнень коряс,
ванфнить седисот монь кошардоманень.
2 Тиентть монь кошардоманень коряс и кармат эряма,
ванфнить монь тонафтоманень, кода эсь сельмоцень.
3 Сотыть синь эсь сурхнень лангс,
сёрмадыть седицень лангс.
4 Мярьк смузьшити: «Тон монь сазорозят!»,
ёнть лемтьк мала ялгакс,
5 ванфтоледязь тонь бралги авада,
лия ломанень рьвада, кона ламбама валса уски эсь мельганза.
6 Эсь кудсон мон ванонь вальмава,
вальмякенкшева,
7 и эряфонь аф содай цёратнень ёткса мон няень од цёра,
конань ашель ёнец.
8 Сон мольсь ульцява фкя авать кудуженц малава,
и кирдезе эсь кинц сонь кудозонза.
9 Тя ульсь илять, мзярда ни шопотькшнесь
и малаткшнесь весь.
10 И вага, каршезонза лиссь ся авась,
усксевинь щамса и кичкор мяль мархта.
11 Сон ульсь прянь аф кирди и визьксонь аф содай;
сон аф ащеви кудса:
12 сон али ульцяса, али мишендема-рамсема вастса,
али салава учси кудужетнень ваксса.
13 Авась фатязе цёрать, палсезе сонь
и визьксфтома шамаса корхнесь тейнза:
14 «Мон тячи кандонь Шкайти сетьмошинь озксказне*а,
пяшкодине максф валнень и монь лядсь лама сивольдон.
15 Сяс мон лисень каршезт,
вешендихтень – и муйхтень.
16 Мон ацайне эсь вастозень вельхксса,
Египетонь лама тюсонь котфса.
17 Валыне эсь вастозень смирнань,
алоень и корицань шинеса.
18 Сувак, карматама иретьфнема фкянь-фкянь кельгомаса,
шобдавать самс топодемс кельгонттяма фкя-фкянь.
19 Мирдезе аш кудса,
сон тусь ичкоздень кис.
20 Сон сявсь мархтонза сия мархта кяскавня
и мрдай куду аньцек пяшксе ковонь шити*б».
21 Авась васькафтозе цёрать лама ламбама валса,
ляпе трванзон мархта сявозе сонь кядялонза.
22 Цёрась эстокиге тусь мельганза,
кода бука, кона моли печкомас,
кода сярда, кона ласьки кундамас,
23 мзярс налсь аф ётай максонц пачка;
сон кода нармонь, кона ёрдай пря туфксс,
и аф шарьхкодьсы, тя пачфтьсы куломас.
24 Сяс, идне, кулхцондомасть монь,
сявость мяльс монь валнень.
25 Тят макса седицти шарфтомс усксеви авать кинзон лангс,
тят яка сонь янонзон ланга,
26 сяс мес сон ламотнень прафтозень сяськфста,
сон шавсь лама вии аля.
27 Усксеви авать кудоц – тя тонашис вяти ки,
кона валги куломать крхка вастонзонды.
*а 7:14 Озксказнесь, конань колга тяса корхтави, няфнезе Шкайть и ломанть ладямаснон. Сембе озксказнетнень ёткста, конатнень еврейхне каннезь Шкайти, аньцек тя озксказнеть сиволенц эзда мярьгондевсь ярхцамс озксказнень кандытиге.
*б 7:20 пяшксе ковонь ши – полнолуние
Глава 7