Выбрать язык
Книги Ветхого Завета
Книги Нового Завета
с русским текстомСмузьшинь кись
1Идне, кулхцондость алянтень ёнень максоманц,
лацкас кулхцондость и кочкатада ётть*а.
2 Мон максан тейнть пара тонафтома,
тясть кадонда монь кошардомазень.
3 Вдь монга улень цёракс алязти,
фкя тяка кельгомнякс тядязти.
4 Алязе тонафнемань монь и корхнесь:
«Кирдить валнень седисот;
тиентть кошардоманень коряс и кармат эряма.
5 Сатнек смузьши, сатнек ёнь:
тяйть юксне монь валнень и седицень тяк шарфне эздост.
6 Тяк кадонда смузьшить, и сон кармай ванфнемот тонь;
кельк сонь, и сон кармай аралакшнемот.
7 Инь эрявикссь – смузьшись: сатнек смузьши,
и сембе уликсцень вельде сатнек ёнь.
8 Лувк смузьшить питникс, и сон кепоттянза тонь;
сон канды тейть шнама, кда тон педят тейнза.
9 Сон щафты прязт мазы каштаз,
мазыдонга мазы коняфксса кастянза тонь».
10 Цёрай, кулхцондомак и сявить мяльс монь валнень,
и ламолгодыхть тонь эряма кизотне.
11 Мон няфтьса тейть смузьшинь кить,
вятте виде янга.
12 Мзярда кармат молема, аф васьфтят кодамовок перяфкс,
мзярда туят ласькозь, аф пупордат.
13 Кемоста киртть ёньц тонафтомати, тяк нолне сонь;
ванфнек сонь, сяс мес сон – тонь эряфце.
Шкайфтомотнень и видексшинь ломаттнень кисна-янцна
14 Тят шятне шкайфтомотнень янцнон лангс,
тят яка зиянонь тиихнень киге.
15 Киртть ширеса тя кить эзда, тят яка эзганза,
шарфтт эздонза и ётак вакска.
16 Вдь шкайфтомотне аф матодовихть, кда аф тиихть кальдяв тев;
синь аф сай удомасна, кда кинь-бди аф вятьсазь прамати.
17 Синь аннихть пря кяжса, кода кшиса,
синь кеняртькшнихть веронь валомати, кода винати.
18 Но видексшинь ломаттнень кисна кода зарянь валда,
кона сяда и сяда вандолгоды шиньгучкать самс.
19 А шкайфтомотнень кисна кода вень шобда;
синь аф содасазь, мезть ланга пупордайхть.
Ванфнек седицень
20 Цёрай! Кулхцондыть монь валнень,
ладяк пилецень монь корхтамазти.
21 Катк синь аф тушендыхть тонь сельмингольдет,
ванфнить синь седипотмосот.
22 Вдь синь кандыхть эряф сятненди, кит мусазь синь,
кандыхть шумбраши марнек ронгснонды.
23 Сембода пяк ванфнек эсь седицень,
сяс мес эздонза шудихть эряфонь лихтибрятне.
24 Ёрдак кургстот васькафнемать,
паньк трвастот аф видешить.
25 Катк тонь сельмотне ваныхть видеста,
катк сельмованфце ули таргаф инголи.
26 Молемда инголе лацкас арьсек кицень,
эста сембе тонь китне-якаматне улихть нартть.
27 Тят тушенда кистот аф види шири, аф кержи шири;
шарфтк пильгцень зиянть эзда.
*а 4:1 Тяса корхтави аф содамошинь кочкамать колга, а эряфонь смузьшить колга, кона лезды шарьхкодемс, мезсь виде и мезсь аф виде; понимание, проницательность.
Глава 4