Выбрать язык
Книги Ветхого Завета
Книги Нового Завета
с русским текстомСмузьшись и Шкайда пелемась
1Цёрай! Тяк юксне монь тонафтомазень,
ванфтыть седисот монь кошардоманень,
2 сяс мес синь кувалгофтсазь тонь эряма шитнень лама кизонди
и кандыхть тейть сетьмоши.
3 Тяйть юксне аф полафни кельгомать*а и валонь кирдемать:
сотыть синь кргазт и сёрмадыть седиезт.
4 Эста Шкайть и ломаттнень эзда
тейть максови кельгома и шнама.
5 Нежетть Азорть лангс сембе седиса,
и тят надия эсь ёнцень лангс.
6 Сембе тевсот вешентть содамс Азорть,
и Сон няфтьсы тейть виде кить.
7 Тят уле смузюкс эсь сельмосот;
пельхть Азорть эзда и киртть ширеса кальдявть эзда:
8 тя канды шумбраши тонь ронгцти,
и кемокстасыне тонь пакарьхнень.
9 Лувк Азорть оцюкс, каннемок Тейнза озксказнет
эсь уликс-пароцень эзда
и сембе васень имошнень эзда;
10 эста тонь утопне вельф пяшкодихть,
и виноградонь люпштама лоткстот*б шудезь-шуди од вина.
11 Цёрай, тят шарфне Азорть ёньц тонафтоманц эзда,
и тят кяжие, мзярда Сон сюци-тонафты эсот,
12 сяс мес кинь Азорсь кельгсы, сянь сюцесы-тонафтсы,
и пара мяльса ваны лангозонза, кода алясь эсь цёранц лангс.
13 Павазу ся, кие мусь смузьши,
ся, кие сатсь шарьхкодема,
14 сяс мес смузьшинь мумась сиянь мумада питни,
и эздонза лезкссь зрняда питни.
15 Сон инь питни кевняда сяда питни;
кодамовок паршись, конань веши тонь седице, аф путови мархтонза ряцок.
16 Куватьс эрямась – сонь види кядьсонза,
а кержиса – козяшись и шнамась.
17 Сонь кинза – тя мяльс туй кит,
сембе сонь янонза – сетьмот.
18 Сон эряфонь шуфта сятненди, кит кундайхть тейнза;
павазуфт сят, кит кемоста кирдихть эзонза!
19 Азорсь смузьшиса путозе модать кеме юр лангс,
ёньца кемокстазень менельхнень.
20 Сонь содамошинц вельде панжевсть потмаксфтома веттне,
и коволхне валондсазь расать.
21 Цёрай! Ванфнек ёнюста арьсемать и прянь кирдемать,
тяйть нолне синь сельмингольдет,
22 и синь кармайхть эряфокс тонь ваймоцти,
ожнакс тонь кргацти.
23 Эста тон аф пелезь кармат якама кицень ланга,
и тонь пильгце аф пупордай.
24 Мзярда мадат – аф кармат пелема,
и мзярда матодоват – онце ули ламбама.
25 Тят пеле аф учсеф кальдявда,
шкайфтомотнень машфтомс кучф зиянда,
26 сяс мес Азорсь ули тейть надияма вастокс,
Сон ванфтсы тонь пильгцень кундамада.
Ульхть кельгозь ужяльдикс*в и видексшинь ломанькс
27 Тяк кадонда нужас повфть лезксфтома,
мзярда тейть вийс коря лездомс тейнза.
28 Тят корхне ялгацти:
«Тячи тук и сак сяльде, мон ванды максан тейть»,
– мзярда тяниёк мархтот ся, мезе сон анай.
29 Тят арьсе мала ломанцень каршес зиян,
мзярда сон аф пелезь эряй мархтот.
30 Тят сялонда ломанть мархта туфталфтома,
мзярда сон ашезь тие тейть кодамовок кальдяв.
31 Тят кая сельме веронь валыть эряфонц лангс,
тяк кочксе сонь фкявок кинц,
32 сяс мес Азорсь туткоды васькафнида,
а виде ваймоть мархта Сон ялгафты.
33 Азорть сюдомац шкайфтомоть кудонц лангса,
а видексшинь ломаттнень кудснон Сон бславасыне.
34 Визьксонь аф содай пеетькшнихнень лангса Сон пееди,
а сятяфненди максы пароказне*г.
35 Смузюфне сатыхть шнама,
а ёньфтомотне – визьксс сувама.
*а 3:3 аф полафни кельгома – евреень кяльса «хесед»; Ташта Сотксса тя пяк эрявикс вал. «Аф полафни кельгома» валзюлмоть смузец – вешфксфтома кельгомс кинь-бди. Тя стама кельгома, кона мезьсовок аф шерьфтеви, сон ванфтови-кирди мезеньге лангс апак ватт. Лиякс мярьгомс, аф ломанть прянь вятемац, аф сталмонь васьфтемась, аф пингсь, аф мезьске лиясь аф кирьфтасазь тя кельгомать виенц. Тяфта кельгись, тии пара седи ваксста и эсь мяль вельде, сонь кивок тянди аф кошярясы, сон кельги аф кати-мезенкса, а тяфтак. Тя кельгомась вельф оцю и кельги учфта лама. Библияса Шкайсь най няфнесы тя кельгомать Эсь ломаньтналонцты.
*б 3:10 рузкс: точило. Тя кафта аф оцю лоткт, конат карафтольхть кевбандса. Фкяти кайсезь кенерьф виноградонь имошнень и пильгса люпшнезь синь. Виноградонь ведсь шудесь омбоце лоткти, и меле тянь эзда тиендсть виноградонь вина.
*в 3:27 кельгозь ужяльди – милостливый, милосердный; кельгозь ужяльдема – милость, милосердие
*г 3:34 пароказне – благодать
Глава 3