Выбрать язык
Книги Ветхого Завета
Книги Нового Завета
с русским текстомСмузьшись ванфты кальдявда
1Цёрай! Кда тон сявсайть пряс монь валнень
и седисот ванфтсайть монь кошардоманень,
2 ладямок пилецень смузьшити
и панжемок седицень шарьхкодемати;
3 кда тердьсак содамошить
и серьгядьсак ёнть;
4 кда кармат мушендомонза сонь, кода сия,
и вешендемонза, кода кяшф козяши,
5 эста шарьхкодьсак, мезе стамсь Шкайда пелемась,
мусак содамошить Шкайть колга.
6 Вдь Азорсь макссесы смузть,
Сонь кургстонза лисенди содамошись и шарьхкодемась.
7 Сон аноклась сяськома виде ваймотненди,
Сон видешиса якайхнень аралайсна.
8 Сон ванфтсыне виде судть кинзон
и мяленц коряс эряйхнень янцнон араласыне.
9 Эста тон шарьхкодьсак видексшить и видеста судендамать,
видешить и эрь кодама пара кить.
10 Вдь смузьшись сувай тонь седиезт,
и содамошись канды кенярдема тонь ваймоцти,
11 инголькиге арьсемась кармай аралама эсот,
и шарьхкодемась ванфттанза тонь.
12 Сон ванфттанза тонь зиянонь кида,
васькафни ломаньда,
13 сятнень эзда, конат пувордасть виде киста
и якайхть шобда янга;
14 конат кеняртькшнихть зиянонь тиемаснонды,
кеняртькшнихть кяжи тефненди и визьксфтомашити.
15 Синь кисна кичкорхт,
синь эрьгодсть эсь янцост.
16 Смузьшись ванфттанза бралги авада,
лия ломанень рьвада, кона ляпомфнесыне валонзон,
17 кона кадозе одкс пингонь мирденц,
юкстазе сотксть, кона ладяфоль Шкаенц инголе.
18 Сонь кудоц вяти куломати,
кинза – кулофненди.
19 Кудозонза сувайсь меки аф мрдай
и аф стяй ни эряфонь кить лангс.
20 Сяс якак пара вайме ломаттнень кигаст,
и киртть видексшинь ломаттнень янцнон лангса.
21 Вдь видексшинь ломаттне кармайхть эряма масторть лангса,
и виде ваймотне лядыхть лангсонза,
22 а шкайфтомотне улихть машфтфт масторста,
и Шкайть кадыенза улихть юрнек таргафт модаста.
Глава 2