Выбрать язык
Книги Ветхого Завета
Книги Нового Завета
с русским текстомМезенди эрявихть валмуворксне
1 Соломононь, Давидонь цёранц, Израилень оцязорть, валмуворксонза*а.
2 Синь тонафтыхть смузьшити и максыхть ётть,
синь лездыхть шарьхкодемс смузю валхнень, конат панчсесазь, мезсь виде и мезсь аф виде.
3 Синь содафтыхть видексшить*б, судть и видеста тиендемать мархта,
конатнень вельде тон сафтсак эряфса.
4 Эряфонь аф содайхненди*в синь максыхть шарьхкодема,
од цёрати – содамоши и инголи арьсема.
5 Смузюсь кулхцондсыне валмуворкснень и касфтсы содамошинц,
ёнюсь муй эсост ёньц тонафтомат.
6 Синь вельдест сон шарьхкодьсыне валмуворкснень и валвеляфкснень*г,
смузюфнень валснон и содама ёфксснон.
Азорда пелемась – тя смузьшить ушетксоц
7 Азорда пелемась – тя смузьшить ушетксоц;
аньцек ёньфтомотне*д безярдихть смузьшида и ёньц тонафтомада.
8 Цёрай, кулхцонтк аляцень ёнень максоманц,
тят шарфне тядяцень тонафтоманц эздовок,
9 сяс мес тя – пяк мазы каштаз тонь пряцти,
ожнат тонь кргацти.
Тят моле пежень тиихнень мельге
10 Цёрай! Кда пежень тиихне кармайхть ускомот эсь ширезост,
тят макссе пря.
11 Кда кармайхть корхтама:
«Аде мархтонк, вештяма веронь валомс васта,
ужеть фтала салава учсаськ аф муворуфнень,
12 нильсаськ синь живойнек, кода тонашись,
ронгонек-мезнек, кода калмось кулофнень.
13 Минь салатама эрь кодама питни паршихть,
пяшкодьсаськ кудоньконь сатфса.
14 Каяк жерьбацень минь мархтонк*е,
и ярмак кяскавоньке кармай марстонне».
15 Цёрай! Tят яка мархтост синь кигаст,
тят шятне синь янцнон лангс,
16 сяс мес синь пильгсна ласькихть кальдявонь тиема,
эряскодыхть веронь валома.
17 Путнемс туфкст*ж нармоттнень сельминголест –
тя шава тев,
18 но ня ломаттне, салава учсемок ужа фтала,
эсь пряснон вятьсазь куломати,
ащемок салавань вастса,
валсазь эсь верснон.
19 Тя учсы эрть, кинь мялец козякодомс саламать вельде,
васькафтозь сатф козяшись сявсы сонь эряфонц.
Смузьшись терди
20 Смузьшись терди ульця кучкаса,
ювади мишендема-рамсема вастса.
21 Сон корхтай-тонафты куротнень жалфу ужесост,
ошень ортатнень ваксса азондсы эсь валонц:
22 «Эряфонь аф содайхть, мзярс тинь карматада
кельгомонза эряфса аф шарьхкодемать?
Мзярс кяжиста пеетькшнихне*з кармайхть
петнемост эсь мяльснон пеетькшнемаснон мархта?
Мзярс шава прятне кармайхть
аф няемонза содамошить?»
23 Шарфтость мялентень монь сюцемазти-тонафтомазти:
мон валса лангозонт эсь ваймопожфозень
и пачфтьсайне тейнть эсь валнень.
24 Мзярда мон тернедязь, тинь ашемасть кулхцонда;
мзярда мон венепнине кядезень, кивок изь вана ширезон.
25 Тинь шарфтоде сембе монь ёньц тонафтоманень эзда,
и ашесть кулхцонда сюцеманень.
26 Сяс монга пеедян, мзярда лангозонт прай зиян,
рахан, мзярда тинь саттядязь оцю пелема;
27 мзярда оцю пелемась саттядязь, кода вишке давол,
и зиянць ётай лангант, кода вии варма,
мзярда маятамась и ризфсь люпштатядязь тинь.
28 Эста кармайхть тернемон монь,
и мон мезевок аф азан каршезост;
пяк кармайхть вешендемон,
и аф мусамазь.
29 Тя сяс, мес синь прокс афолезь няе содамошить
и ашезь кочка Шкайда пелемать,
30 мес синь шарфтсть монь ёньц тонафтомазень эзда,
и фкявок сюцемазень ашезь кулхцонда.
31 Тянкса тейст максови тевснон коряс,
синь топафтовихть эсь равжа мяльснон-арьсемаснон эзда.
32 Вдь эряфонь аф содайхнень машфтсыне чуваньшисна,
и ёньфтомотнень юмафтсыне мезеньге колга аф арьсемасна.
33 Но ся, кие кулхцондсамань монь,
кармай эряма зиянфтома и сетьмошиса,
кодамовок кальдявда аф пелезь».
*а 1:1 валмуворкс – пословица, поговорка
*б 1:3 видексши – праведность
*в 1:4 «Эряфонь аф содай» – еврейкс «пэтий». Евреень кяльса тя валсь канни тяфтама смузь: ломань, конань аш эряфонь шарьхкодемац и опытоц, и сянкса тейнза аф сафтови эряфса. Но эряфонь аф содайсь анок тонафнемс, сон кулхцондсыне ёнень максоматнень, и тянь вельде ёнияй; простак.
*г 1:6 валвеляфкс – иносказание, намёк
*д 1:7 Евреень валсь «кэсийл», кона тяса ётафтф кода «ёньфтома», корхтай аф прявий ширде лафчень колга, а меколанкт, сянь колга, кие эсь прянц лувсы сембода ёнюкс. Тяфтама ломанць прянь няи, кашан, аф кулхцонды ёньц тонафтомат, и сяс сидеста канды зиян эстейнза и лия ломаттнендиге. Евреень кяльса ули лия валга «ёньфтомоти» – «эвийл». Тяфтамсь аф ёнюшидонза башка нинге кяжи и фалу тяряфты тиемс ломаттненди кальдяв. Евреень кяльса ули нинге фкя вал – «навал», кона тяфта жа канни смузь «ёньфтома». Но тя ёньфтомось аф кемай Шкайти и мянь безярди эздонза.
*е 1:14 Лиякс нинге шарьхкодеви: «прафтт мархтонк фкя тевс».
*ж 17 туфкс – нармонень и ёмла жуватанянь кундамбяль
*з 1:22 Евреень валсь «лец», кона тяса ётафтф кода «кяжиста пеетькшни», канни смузь: ломань, кона пееди сембе цебярть и видеть лангса, семботь лангса, мезсь Шкаенне; глумливый, кощунник, насмешник.
Глава 1