Выбрать язык
Книги Ветхого Завета
Книги Нового Завета
с русским текстом1Иняру вастса покодеманди синь тисть покодемань щапт валда-сенем, якстерь и шобда-якстерь понань сюреста. Тяфта жа Ааронондиге синь тисть иняру щапт, кода Азорсь мярьгсь Моисеенди.2Инголькссь тифоль зрнянь, валда-сенем, якстерь и шобда-якстерь понань сюреста и шуваняста пяльтьф иляназонь сюреста.3Зрнясь чакафоль-тапафоль шуваня лопакс арамозонза, керфоль шуваня сюрекс и мазыста кодафоль валда-сенем, якстерь, шобда-якстерь и иляназонь сюретнень ёткс.4Кафцьке лафтубряса тифтольхть кирдемат, конатнень вельде инголькссь кемокстакшневсь. Сон сотневсь кафцьке пяльде.5Ингольксть перьфке щафневи каркссь ульсь тиф ингольксть лаца и фкя сяка пяльксста: кодафоль зрнянь, валда-сенем, якстерь и шобда-якстерь сюреста, и шуваняста пяльтьф иляназонь сюреста, кода Азорсь мярьгсь Моисеенди.6Оникс кевнятнень тонгозь зрнянь лотконяс. Ня кефнень лангс, кода тяштьксонь путоматненьге лангс, керозь Израилень цёранзон лемснон.7Ня кефне кемокстафтольхть ингольксть лафтубрянзон лангс, кода лятфнембяль Израильть цёранзон колга, кода Азорсь мярьгсь Моисеенди.
8Мяштелангакссь тифоль маштозь, стане жа кода инголькссь: зрнянь, валда-сенем, якстерь и шобда-якстерь понань сюреста и шуваняста пяльтьф иляназонь сюреста.9Мяштелангакссь ульсь ниле ужа мархта, кафтонь крда мянтьф, фкя кядьлувонь кувалмоса и фкя кядьлувонь келеса.10Лангсонза ниле рядса кемокстафтольхть питни кевнят. Васенце рядса – рубин, топаз, изумруд;11омбоцеса – бирюза, сапфир и алмаз;12колмоце рядса – яхонт, агат и аметист;13и нилецеса – хризолит, оникс и яшма. Синь сембе тонкфтольхть зрнянь лотконяс.14Кевняда ульсь кемгафтува, Израилень цёранзон лувксснон коряс. Эрь кевнять лангс, кода тяштьксонь путомать лангс, керфоль тифтень лем кемгафтува юропнень эзда.15Мяштелангаксти тисть ару зрняста эчке уськт, конатнень тиезь-поназь пикскяня лаца.16Мяштелангаксти тяфта жа тисть кафта зрнянь лотконят и кафта зрнянь суркст, и кафта суркснень кемокстазь мяштелангаксть кафта пензонды.17Ня кафта зрнянь уськнень тонгозь кафта суркснень потмос, конат кемокстафтольхть мяштелангаксть кафта певанза,18а кафта уськнень омба песнон кемокстазь кафта лотконятнень мархта и пункстазь ингольксть лафтубрянзонды, инголь пяльде.19Синь тисть нинге кафта зрнянь суркст и кемокстазь синь мяштелангаксть алдонь ужа пензонды, ся пяльде, кона токай ингольксти.20Тяфта жа тисть нинге кафта зрнянь суркст и кемокстазь синь алува, ингольксть лафтубрянь кафта пензонды, инголь пяльде, ся вастса, коса сон стаф, ингольксть карксонц вельхксса.21Мяштелангаксть алдонь сурксонза сотфтольхть ингольксть сурксонзон мархта валда-сенем пикскяняса, кона кирдезе мяштелангаксть карксть вельхксса: афоль нюрьге мяштелангакссь ингольксть лангса. Сембось тифоль стане, кода Азорсь мярьгсь Моисеенди.
22Синь тисть вярдень паля, конань ланга щафневсь инголькссь. Вярдень палясь марнек кодафоль валда-сенем понань сюреста.23Кучкасонза тифоль прянь тонгомс варя, стама, кодама ваксарщамса, и тя варять перьфке нолдафоль котфонь каеркс: афоль сязендев тя вастса палясь.24Вярдень палять эленц перьфке синь тисть марьнят валда-сенем, якстерь и шобда-якстерь сюреста.25Синь тисть ару зрняста пайгонят и повфтазь синь марьнятнень ёткс, вярдень палять эленц перьфке:26пайгоня и марьня, пайгоня и марьня, и тяфта вярдень палять сембе эленц перьфке. Вярдень палясь тифоль иняру кошса покодеманди, кода Азорсь мярьгсь Моисеенди.
27Аарононди и сонь цёранзонды тисть алгань кувака панархт, конат кодафтольхть шуваня иляназонь сюреста.28Тяфта жа шуваня иляназонь сюреста кодафтольхть прянь ашкотфкссь и прянь карксне, и пяльтьф иляназонь сюреста – алгань понксне.29Карксське кодафоль пяльтьф иляназста, валда-сенем, якстерь и шобда-якстерь понань сюреста, и лангсонза мазыста тифтольхть сёрмат, кода Азорсь мярьгсь Моисеенди.
30Синь тисть ару зрняста вадяв седяфкя, иняру коняфкс, и кода керсихть тяштьксонь путомать лангс, стане синь керсть-сёрмадсть коняфксть лангс: «Азорть иняруяфоц».31Тя коняфксти сюлмасть валда-сенем понань каркскя, конань вельде коняфкссь сотови прянь ашкотфксти, кода Азорсь мярьгсь Моисеенди.
32Тяфта шумордафтольхть сембе тефне Шкаень эряма вастса, васедемань кошса. Израилень ломаттне тиезь семботь стане, кода Азорсь мярьгсь Моисеенди.33Синь кандозь Моисеенди иняру кошть пяльксонзон, сонь вельхтерданц и семботь, мезсь моли мархтонза: кячказонзон, стена-седяфонзон, олгонзон, орванзон и алксонзон,34вельхксть, кона тиф якстерьста архтф боранонь кеттнень эзда, и вельхксть, кона тиф сенем кеттнень эзда, и котфонь перяфксть, кона персесы фкя пяльксть омбоцеть эзда,35сотксонь арзять, сонь олгонзон и пежень нолдама вельхксть,36шрать, семботь, мезсь моли мархтонза, и иняру кшитнень, конатнень путнесазь Азорть инголе,37ару зрняста тиф валдоптомань кирдемать, сонь валдоптоманзон и семботь, мезсь моли валдоптомань кирдемать мархта, и тяфта жа валдонь кирдемс вай,38зрнянь алтарть, вадемань вайть, качафтоманди танцти шинень нолдаматнень, иняру кошть сувама вастонцты котфонь перяфксть,39серень алтарть и потмозонза путневи серень решёткать, алтарть олгонзон и семботь, мезсь моли алтарть мархта, штамань кядьготь и алксонц,40пирьфть котфонь перяфксонзон, орванзон и алксонзон, пирьфу сувама вастти котфонь перяфксть, пирьфть пиксонзон и пяльнянзон, и семботь, мезсь эряви васедемань кошса покодеманди,41иняру вастса покодемань щапнень, Аарон озксвятить иняру щамонзон и щапнень сонь цёранзонды озксвятемань тевса покодеманди.42Кода Азорсь мярьгсь Моисеенди, тяфта Израилень ломаттне тиезь ня сембе тефнень.43Мзярда Моисей ванозе семботь сянь, мезе синь тисть, сон няезе: синь семботь тиезь стане, кода мярьгсь Азорсь. И Моисей бславазень синь.
Глава 39