Выбрать язык
Книги Ветхого Завета
Книги Нового Завета
с русским текстом1Веселеил тись акация шуфтста марнек плхтамань озксказненди алтарь, конань серец ульсь колма кенерьхть. Алтарсь ульсь ниле ужа мархта: вете кенерьхть кувалмос и вете кенерьхть келес.2Алтарть ниле ужензон лангс сон тись сюрот, конат ульсть фкя марстонь тифксокс алтарть мархта, и алтарть вельхтязе сереса.3Сон тиезень сембе эрявикс кядьготнень-меснень алтарти: кулувонь кочкамс ведаркатнень, кулувонь таргамс каймонятнень, веронь валомс кядьготнень, цянгонятнень и седень кандомс кечетнень. Сембе ня эрявикс кядьготнень-меснень сон тиезень сереста.4Алтарти сон тись пролопонь решётка. Сон тиезе решёткать сереста, кемокстазе алтарть каерксонц алу, потма пяльде, и навазе сонь алтарть кучканцты молемс.5Серень решёткать ниле ужензон лангс сон тись ниле серень суркст, коза тонговихть олкне.6Сон тись акация шуфтста олкт, вельхтязень синь сереса7и тонгозень суркснень потмос, конат алтарть боксонзот. Тянь вельде сонь кармайхть каннемонза. Сон тиезе алтарть седяфста, а потмоц ульсь шава.
8Веселеил тись сереста штамань кядьге и тейнза алкс. Тя штамань кядьгось и алксоц тифтольхть ся шамаваноматнень эзда, конатнень максозь васедемань кошть сувама вастонц ваксса покоди аватне.
9Меле Веселеил тиезе пирьфть. Пирьфть лямбе ширенцты сон тись сяда кенерень кувалмоса перяфкст, конат кодафтольхть шуваняста пяльтьф иляназонь сюреста.10Перяфксненди сон тись комсь орва и орватненди комсь серень алкс. Орватнень кячказсна и соткссна тифтольхть сияста.11Пирьфть кельме ширенцты сон тяфта жа тись котфонь перяфкст, конат ульсть сяда кенерень кувалмоса. Перяфксненди сон тись комсь орва и орватненди комсь серень алкс. Орватнень кячказсна и соткссна тифтольхть сияста.12Пирьфть шинь валгома ширенцтывок сон тись котфонь перяфкст, конат ульсть ведьгемонь кенерень кувалмоса. Перяфксненди сон тись кемонь орват и орватненди кемонь серень алкст. Орватнень кячказсна и соткссна тифтольхть сияста.13Пирьфть инголенцты, кона шинь стяма ширеса, сон тись ведьгемонь кенерень кувалмоса котфонь перяфкст.14Пирьфу сувама вастть фкя бокозонза сон тись кеветие кенерень кувалмоса котфонь перяфкст, перяфксонь кирди колма орват и орватненди колма алкст.15Пирьфу сувама вастть омба бокозонза сон тись кеветие кенерень кувалмоса котфонь перяфкст, перяфксонь кирди колма орват и орватненди колма алкст.16Сембе котфне, конат ульсть пирьфть перьфке, тифтольхть шуваняста пяльтьф иляназонь сюреста.17Орватнень алкссна тифтольхть сереста, а кячказсна и соткссна – сияста. Орва прятне вельхтяфтольхть сияса, и сембе орватне сотфтольхть-кемокстафтольхть фкя-фкянь мархта сиянь сотксса.18Пирьфу сувама вастть котфонь перяфксоц тифоль валда-сенем, якстерь и шобда-якстерь понань сюреста и пяльтьф иляназонь сюреста, сёрма мархта. Сонь кувалмоц ульсь комсь кенерь, серец – вете кенерьхть, пирьфть котфонь перяфксонзон лаца.19Перяфксонь кирди орвада ульсь ниле, орвань алкстонга – ниле. Алксне тифтольхть сереста. Орвань кячкасне и соткссне ульсть сияннет, а орва прятне вельхтяфтольхть сияса.20Иняру кошть, Шкайть эряма вастонц, перьфке и сонь пирьфонц перьфке сембе пяльнятне ульсть сереннет.
21Вага мзяра карьхце ётась иняру кошть, сотксонь кошть, тиемс. Моисей кошардозень левиеннетнень сёрмадомс сембе ня карьхцнень. Тя тевть мельге ваныкс путфоль Ифамар, Аарон озксвятить цёрац.22Веселеил, Уриянь цёрац, Хуронь унокоц Иудань юромста тиезе семботь, мезе Азорсь кошардсь Моисеень вельде.23Тейнза лездсь Аголиав, Ахисамахонь цёрац Данонь юромста, кона маштсь керсема шуфтста и кевста, мазыста кодась и тиендсь сёрмат валда-сенем, якстерь, шобда-якстерь и шуваня иляназонь котфнень лангс.24Зрняда, конань ломаттне кандозь казнекс иняру вастса сембе эрявиксть тиемс, ётафтфоль комсь вейхкса талант и сисем сятт колмогемонь шекель, иняру вастонь шекельть сталмоса.25А сияда, кона кочкафоль Израилень пуромксть лувомста, ётафтфоль сяда талант и фкя тёжянь сисем сятт сизьгемонь вете шекель, иняру вастонь шекельть сталмоса.26Пяле шекель, иняру вастонь шекельть сталмоса, сявфоль эрь лувф ломанть кядьста, конанди топодсь комсь и сяда лама киза. Марнек эздост ульсь 603 550 ломань.27Сяда талант сия тусь иняру вастть алксонзон и перяфксть алксонзон тиемаснонды-валомаснонды. Сяда алкс лиссь сяда талантста. Тифтень талант фкя алксонди.28Фкя тёжянь сисем сятт сизьгемонь вете шекель сия тусь орвань кячкаснень тиемаснонды, орвань прятнень вельхтямаснонды и орвань соткснень тиемаснонды.29Середа, конань ломаттне кандозь казнекс, ульсь сизьгемонь талант и кафта тёжятть ниле сятт шекель.30Эздонза тифтольхть орвань кирди алксне, конат васедемань кошть сувама вастонц вакссот, серень алтарсь и потмозонза путневи серень решёткась, и алтарень сембе кядьготне,31тяфта жа алксне сембе орватненди, конат пирьфсот и пирьфу сувама вастть видесот, иняру кошень сембе пяльнятне и пирьфть перьфке сембе пяльнятне.
Глава 38