Выбрать язык
Книги Ветхого Завета
Книги Нового Завета
с русским текстом1«Тик качафтомань озксказнень кандомс алтарть*а. Тик сонь акация шуфтста.2Катк сон ули ниле ужа мархта: фкя кенерь кувалмос, фкя кенерь келес и кафта кенерьхть серес. Катк сюронза улихть фкя тифксокс мархтонза.3Вельхтяк алтарть сембе пяльде ару зрняса: вярде, боконзон, сюронзон, и перьфканза тик зрнянь каеркс.4Алтарть каерксонц ала кафта ужензон лангс тик зрнянь кафта суркст. Тиить синь фкя-фкянь каршес, алтарть кафцьке бокованза. Эзост кармайхть тонгондовома олкне, алтарть каннеманкса.5Олкненьге тиить акация шуфтста и вельхтяйть зрняса.6Путк качафтомань алтарть котфонь перяфксть инголи, конань фтала ащи сотксонь арзясь, – и пежень нолдама вельхксть инголи, кона сотксонь арзять лангса. Тоса Мон карман васетькшнема мархтот.
7Катк Аарон эрь шобдаване, мзярда кармай латцемост валдоптоматнень, плхнесы танцти шинень нолдамать качафтомань алтарть лангса.8Тяфта жа илять, валдоптоматнень толснон крьвястемста, катк Аарон плхнесы танцти шинень нолдамать. Сон плхнема Азорть инголе эрь шиня, юромста юромс.9Тяда плхне тя алтарть лангса кодамовок лия танцти шинень нолдама али марнек плхтамань озксказне, али кшинь озксказне, и кодамовок симомбяль тяда кайсе лангозонза.10Катк Аарон весть кизоти ётафни аруяфтомань обуця алтарть сюронзон лангса. Весть кизоти, юромста юромс, эряви аруяфнемс алтарсь ся озксказнеть версонза, кона кантф пежетнень нолдаманкса. Алтарсь пяк иняру, и сон Азорть».
11Азорсь мярьгсь Моисеенди:12«Мзярда тон кармат Израилень ломаттнень ваномост и лувсайть синь лувксснон, эста катк эрсь лувомстонза максы Азорти питне эсь эряфонц инкса, и эста, мзярда тон кармат лувомост, кодамовок кальдяв аф токасыне синь.13Эрсь, кие ули лувф, катк максы пяле шекель иняру вастонь шекельть сталмонц коряс, конань сталмоц ульсь комсь гера*б. Шекельть пялец максома Азорти.14Эрь лувф ломанць, конанди топодсь комсь али сяда лама киза, катк максы Азорти тяфтама озксказне.15Мзярда макстада Азорти озксказне эряфонтень идеманц-рамаманц инкса, эста козясь катк аф максси шекельть пяледонза лама, а ашусь – шекельть пяледонза кржа.16Ярмакнень, конат максфт Израилень ломаттнень эряфснон идемаснон-рамамаснон инкса, сявить и нолдайть тевс васедемань кошса покодеманди. Тя лятфнембяль Азорть инголе Израилень ломаттнень колга, тинь ваймонтень идемаснон-рамамаснон колга».
17Азорсь мярьгсь Моисеенди:18«Тик сереста штамань кядьге серень алкс мархта. Путк сонь васедемань кошть и озксказнень кандома алтарть ёткс, и каяк эзонза ведь.19Катк Аарон и сонь цёранза штакшнесазь тоса кядьснон и пильгснон.20Васедемань кошть потмос сувамда инголе катк штакшнихть ведьса, афток кулыхть. Тяфта жа, мзярда нежедихть покодема озксказнень кандома алтарти, Азорти толонь озксказнетнень плхтама,21катк штакшнесазь кядьснон и пильгснон ведьса, афток кулыхть. Тя ладяфкссь максф тейнза и сонь уноконь-уноконзонды юромста юромс пефтома пингс».
22Азорсь мярьгсь Моисеенди:23«Сявить сембода цебярь танцти шине надобиятнень: вете сятт шекель шуди смирна, тянь эзда пяленц – кафта сятт ведьгемонь шекель танцти шине корица, кафта сятт ведьгемонь шекель танцти шине нюди.24Сяфть нинге вете сятт шекель кассия, кона фкя иняру вастонь шекельть сталмоса, и нилешка литра вайшуфтонь вай.25Тик эздост танцти шине вай иняру вадеманди, тик сонь стане цебярьста, кода тиендьсазь танцти шине вайхнень тиисна. Тя вайсь ули иняру вадеманди.26Ватьк мархтонза васедемань кошть и сотксонь арзять,27шрать и семботь, мезсь моли мархтонза, валдоптомань кирдемать и семботь, мезсь моли мархтонза, качафтомань алтарть,28марнек плхтамань озксказненди алтарть и семботь, мезсь моли мархтонза, штамань кядьготь и алксонц,29и иняруяфтыть синь, и синь арайхть пяк инярукс. Сембось, мезсь токай тейст – иняруяй.30Ватьк Аарононьге, сонь цёранзонга, и иняруяфтыть синь, катк синь улихть Тейне озксвятикс.31А Израилень ломаттненди азк: тя ули Монь ваезе иняру вадеманди юромстонт юромс.32Тясть ваденде тя вайса лия ломаттнень ронгснон и тяда тиенде тя вайть лаца вай. Сон иняру: катк инярукс ули тейнтьке.33Эрсь, кие тии тянь лаца вай али кие вадьсы мархтонза ширдень ломанть, ся ули паньф эсь ломаньтналстонза».34Азорсь мярьгсь Моисеенди: «Сяфть танцти шине надобият-месть: стакти, оних, танцти шине халван и ару ливан, сембода сяфть фкя унксонь сталмоса,35и тик эздост шоряфкс качафтоманди, тик сонь стане жа лац, кода тянь тиендьсы маштысь: салукс, арукс и инярукс.36Тапак сонь почфокс и путк сотксонь арзять инголи васедемань кошу, коса Мон карман васетькшнема мархтот. Катк тя шоряфкссь ули тейть пяк иняру.37Тяда тиенде эстейнть танцти шинень нолдамат тя шоряфксть коряс, катк сон ули тейнть инярушикс, кона лемтьф Азорти.38Кие тии эстейнза тянь лаца шоряфкс и кармай качафтома мархтонза эсь мяленц петеманкса, ся ули паньф ломаньтналстонза».
*а 30:1 жертвенник для воскурения благовоний
*б 30:13 Фкя гераса 0.6 грапт.
Глава 30