Выбрать язык
Книги Ветхого Завета
Книги Нового Завета
с русским текстом1«Вага мезе тейть тиема Аарононь и сонь цёранзон мархта: араст синь Тейне озксвятикс. Сяфть фкя од бука, афсатыксфтома кафта боратт,2аф шапама кшит, вайшуфтонь вайса шоряф аф шапама цюкорхт и аф шапама кеворькст, конат ватьфт вайшуфтонь вайса. Ичить-панить синь тозеронь почфста3и путыть фкя кептерьс. Кантк тя кептерть, мзярда вятьсак од букать и кафта бораттнень.4Вятьк Аарононь и сонь цёранзон васедемань кошть сувама вастонцты, и штайть синь ведьса.5Тяда меле сявить щапнень и срхкафтк Аарононь алгань кувака панарса и вярдень паляса. Лангаст щафтк ингольксть и мяштелангаксть. Карксак Аарононь ингольксонь карксть мархта, кона тиф мазыста.6Прязонза щафтк ашкотфксть и лангсонза кемокстак инярушинь коняфксть.7Сяфть вадемань вай, шудефтьк прянц лангс и ватьк сонь.8Вятить цёранзонга и срхкафтыть синь алгань кувака панарса.9Карксайть Аарононь и сонь цёранзон карксса и щафтыть прязост ашкотфкснень. Эста озксвятемась ули максф тейст пефтома пингонь ладяфксть коряс. Тяфта тон макссак тейст озксвятемань покодемать.
10Вятть бука васедемань кошть инголи, и катк Аарон цёранзон мархта путсазь кядьснон букать прянц лангс.11Печк букать Азорть шамаликонц инголе, васедемань кошть сувама вастонц ваксса.12Сявк сонь веронц и сурса вадить алтарень сюротнень, а сембе лятф верть пяяртьк алтарть алксонцты.13Сявк сембе куять, кона вельхнесыне потмосюлотнень, максоста куянь пяльксть, кафцьке пичемарьхнень*а и лангстост куять, и плхтайть синь алтарть лангса.14А букать сиволенц, кеденц и сюлонзон плхтайть толса лоткама вастонтень эзда ширеса. Тя озксказне пеженкса.
15Тяда меле сявк фкя боранть, и катк Аарон эсь цёранзон мархта путсазь кядьснон боранть пряс.16Печк боранть, кочкак сонь веронц и мархтонза сембе ширде валк алтарть.17Керк боранть пакшень-пакш, штайть сембе потмосюлонзон и пильгопукшензон и путыть синь керф пакшнень и прянц лангс.18И плхтак марнек боранть алтарть лангса. Тя марнек плхтамань озксказне Азорти, танцти шинень озксказне Азорти.
19Сяльде сявк омбоце боранть, и катк Аарон эсь цёранзон мархта путсазь кядьснон сонь прянц лангс.20Печк боранть, и версонза вадить Аарононь и сонь цёранзон види пиле песнон, тяфта жа ватьк види кядьстост оцю сурснон и види пильгстост оцю сурснон. Лятф верса сембе ширде валк алтарть.21Сяфть аф лама вер алтарть лангста и аф лама вадемань вай; мархтост валк Аарононь и сонь щамонзон, сонь цёранзон и синь щамснон. Эста Аарон, сонь цёранза и синь щамсна иняруяфтовихть.22Сявк боранцта куять и куять каряз пакаренц песта*б, куять, кона вельхнесыне потмосюлонзон, максостонза куянь пяльксть, кафцьке пичемарензон и лангстост куять, и тяфта жа боранть фталдонь види пяльксонц, сяс мес тя боранць максови озксвятемас путомань озксказнекс.23Кептерьста, кона путф Азорть инголи, сяфть фкя кши, фкя цюкор, кона ичф вайшуфтонь вайса, и фкя аф шапама кши,24и сембонь тянь путк Аарононь и сонь цёранзон кядьс. Катк синь кеподьсазь нятнень Азорть инголе и макссазь озксказнекс.25Меле сявить кядьстост нятнень и плхтайть алтарть лангса марнек плхтамань озксказнетнень мархта марса. Тя Азорть мяльс туй танцти шинень нолдамась, толонь озксказне Азорти.26Сявк Аарононь озксвятемас путоманц инкса максф боранть мяштепяльксонц и кантк озксказнекс, кеподемок сонь Азорть шамаликонц инголе, – катк тя ули тонь талекаце.27Иняруяфтыть боранть ся пяльксонзон, конат максфтольхть озксказнекс Аарононь и сонь цёранзон озксвятемас путомаснон инкса: боранть мяштепяльксонц и фталдонь пяльксонц, конат кепотьфтольхть Азорть инголе и кантфтольхть озксказнекс.28Ня озксказнетне – Аарононь и сонь цёранзон пефтома пингонь талекасна, конань Израилень ломаттне кармайхть явфнемонза тейст. Катк Израилень ломаттне каннихть тяфтама озксказнет Азорти эсь сетьмошинь озксказнеснон эзда.
29Аарононь иняру щамонза куломдонза меле катк ётнихть сонь цёранзонды. И мзярда конанцка эздост вадьсазь вайса и ладясазь озксвятиень покодемас, эста тейнза улема щаф тя щамса.30Ся цёрась, кона арай озксвятикс Аарононь вастс и кона кармай сувсема васедемань кошу иняру вастса покодеманди, катк щасыне ня щапнень сисем шинди.
31Сявк боранть, кона максф озксвятемас путомать инкса, и пидек сиволенц иняру вастса.32Катк Аарон и сонь цёранза васедемань кошть сувама вастонц ваксса сивсазь тя боранть сиволенц ся кшить мархта, кона кептерьса.33Тянь вельде нолдавихть синь пежесна озксвятемас максомстост и тя тевс иняруяфтомстост. Киндивок лиянди аф мярьгондеви ярхцамс тянь эзда, сяс мес тя ярхцамбяльсь иняру.34Кда озксвятемас максомань сивольть и кшить эзда мезевок ляды шобдаванди, ся эряви плхтамс толса. Эздонза аф мярьгондеви ярхцамс, сяс мес тя иняру ярхцамбяль.35Тик Аарононь и сонь цёранзон мархта сембоса стане, кода Мон мярьгонь тейть. Катк озксвятемас путомасна моли сисем шит.36Эрь шиня каннек озксказнекс од бука пежетнень нолдаманкса. Мзярда тон кандат пежень нолдама озксказне алтарть лангса, эста аруяфнек алтарть, иняруяфнек сонь, вадемок вайса.37Сисем шит аруяфнек алтарть, и иняруяфтк сонь. Алтарсь арай пяк инярукс. Сембось, мезсь токай алтарти, тиеви инярукс».
38«Тейть эряви эрь шиня каннемс фкя кизонь кафта верост.39Фкя верозть каннек шобдава, а омбоцеть – илять.40Шобдавань верозть мархта озксказненди каннек кафтошка литра тозеронь почф, кона шоряф фкашка литра кядьса тапаф вайшуфтонь вайса, а алтарть лангс каяманди каннек литрашка вина.41Омбоце верозть каннек илять тяфтама жа кшинь озксказне мархта, кодама ульсь шобдава, и тяфтама жа каяма мархта. Тя танцти шине, кона мялезонза Азорти, Азорти кантф марнек плхтамань озксказне.42Ня марнек плхтамань озксказнетне юромста юромс фалу каннемат Азорть инголи васедемань кошть сувама вастонц ваксса, коса Мон карман васетькшнема мархтонт и коса карман корхтама мархтот.43Тоса Мон карман васетькшнема Израилень ломаттненьге мархта, и ся вастсь иняруяфтови Монь иневалдсон.44Мон иняруяфтса васедемань кошть и алтарть. Иняруяфтса Аарононьге, сонь цёранзонга, катк покодихть Тейне озксвятиень тевса.45Мон карман эряма Израилень ломаньтналть ёткса и улян тейст Шкайкс,46и синь кармайхть содамонза: Мон Азорсь, синь Шкайсна, кона лихтезень синь Египетонь масторста, сяс мес Монь мялезе эрямс синь ётксост. Мон Азорсь, синь Шкайсна».
*а 29:13 пичемарь – почка, внутренний орган
*б 29:22 куять каряз пакаренц песта – тяса корхтави боранть курдюконц колга
Глава 29