Выбрать язык
Книги Ветхого Завета
Книги Нового Завета
с русским текстом1Египетонь масторста лисемда меле колмоце ковня, колмоце ковть васенце шистонза, израильтяттне састь Синаень шавмодав.2Синь тусть Рефидимста и састь Синаень шавмодав, и тоса стяфтозь эсь кошснон. Тоса Израильсь стяфтозень эсь кошензон пандть ала.
3Моисей куцсь панда пряс Шкайти, и Азорсь пшкядсь тейнза панда пряста, мярьгомок: «Тяфта азк Иаковонь юромонцты, пачфтьк Израилень ломаньтналти:4"Тинь няесть, мезе Мон тиень египтяттненди и кода Мон каннедязь тинь куцьканонь паця лангса, и кандодязь тинь Эстейне.5Сяс, кда тинь ульхтяда кулхцондыкс Тейне и карматада ванфнемонза Монь сотксозень, эста ульхтяда Моннекс сембе масторонь ломаньтналхнень ёткста. Сембе масторсь Монне,6но тинь ульхтяда Тейне озксвятиень оцязорксшикс и иняру ломаньтналкс". Вагот валхне, конатнень тон азсайть Израилень ломаньтналти».7Мзярда Моисей мрдась, сон тердезень Израилень ломаньтналть оцюнянзон и пачфтезень тейст сембе ся валхнень, конатнень Азорсь мярьгсь азомда.8Эста сембе ломаньтналсь фкя вайгяльса мярьгсь каршезонза: «Минь тисаськ семботь, мезе Азорсь мярьгсь». Моисей пачфтезень ломаньтналть валонзон Азорти.
9Азорсь мярьгсь Моисеенди: «Ватт, Мон саян тейть туста коволса, катк ломаньтналсь кульсы, кода Мон карман корхтама мархтот, и кемай тейть пефтома пингс». Мзярда Моисей пачфтезень Азорти ломаньтналть валонзон,10Азорсь мярьгсь Моисеенди: «Архт ломаньтналти и иняруяфтк сонь тячи и ванды. Катк муськсазь эсь щамснон11и анокласазь пряснон колмоце шити, сяс мес колмоце шиня Азорсь сембе ломаньтналть сельмингольде валги Синай пандть лангс.12Ётафтт китькс пандть перьфке, афолезе ётне сонь ломаньтналсь, и азк тейст: "Валом, тяда куценде пандть лангс и тясть токсе пандалть. Эрсь, кие токасы пандть, эряви шавомс.13Сянь, кие токасы пандть, аф мярьгондеви токсемс кядьса. Сон шавома кевса али ляцема налса, кие тя афоль уле: ломань али жувата, сонь аш кода кадомс шиса". Аньцек турамать куватьс кайгомдонза меле тейст мярьгондеви куцемс пандть лангс».14Моисей валгсь пандста ломаньтналти, иняруяфтозень синь, и синь муськозь эсь щамснон.15Сон мярьгсь ломаньтналти: «Уледа анокт колмоце шити; тяда нежетькшне рьвянтенди».
16Колмоце шиня, шобдава, торасть атяпне и кфчиесть ёндолхне. Туста ковол валгсь пандть лангс, и кулевсь пяк кайги турамань вайгяль. Сембе ломаньтналсь, кона ульсь кошнень ваксса, трнатозевсь.17Моисей лихтезе ломаньтналть кошень стяфтома вастста Шкайть мархта васедема, и синь арасть пандалть ваксс.18Синай пандсь марнек вельхтявсь качамса, сяс мес Азорсь валгсь лангозонза толса. Качамсь кепсесь эздонза стане, кода кепси пянакудста, и сембе пандсь пяк трнатсь.19Турамань вайгяльсь сядонга вииякшнесь. Моисей корхтась, и Шкайсь атямонь вайгяльса корхнесь каршезонза.20Азорсь валгсь Синайть лангс, панда пряс. Сяльде Азорсь тердезе Моисеень пандть пряс, и Моисей куцсь тоза.21Азорсь мярьгсь Моисеенди: «Валк и азк ломаньтналти: афолезь ётне китьксть Азорть лангс ваноманкса, афток ламотне эздост кулыхть.22Озксвятихневок, конат малаткшнихть Азорти, катк иняруяфтсазь эсь пряснон, афток Азорсь машфтсыне синь».23Моисей мярьгсь Азорти: «Ломаньтналсь аф куци Синай пандть лангс, сяс мес Тон кардамасть минь, мярьгомок: "Ётафтт китькс пандть перьфке и иняруяфтк сонь"».24Азорсь мярьгсь тейнза: «Архт валк, и меле тага куцть Аарононь мархта. А озксвятихне и ломаньтналсь катк аф ётнесазь китьксть и аф куцендихть Азорти, афток Сон шавсыне синь».25Моисей валгсь ломаньтналти и азондозе тейст семботь.
Глава 19