Выбрать язык
Книги Ветхого Завета
Книги Нового Завета
с русским текстом1Азорсь мярьгсь Моисеенди:2«Макск Тейне Израилень ломаньтналста эрь васень шачфть, кона панжезе тядянь потмоть, – цёрашабать и жуватань атялефксть, сяс мес синь Моннет».
3Моисей мярьгсь ломаньтналти: «Мяляфтость тя шить, мзярда тинь лиседе Египетста, урексшинь кудста, вдь Азорсь Эсь кеме кяденц вельде лихтедязь тинь тоста. Тя шиня тяда ярхца шапама кшида.4Тячи, Авив ковста*а, тинь листяда Египетста.5Азорсь варась тонь атянь-атятненди максомс тейть ханаанейхнень, хеттейхнень, аморрейхнень, евейхнень и иевусейхнень модаснон. Сяс мзярда Сон вяттянза тонь модав, коса шуди лофца и медь, эста ётафнек тя ковня тяфтама обуця:6сисем шит ярхцак аф шапама кшида, а сисемце шиня ётафтт Азорть лемс ила.7Аф шапама кшида эряви ярхцамс сисем шит. Косонга тонь ширесот тяза уле шапафтома али шапафтома лангса ичф кши.8Ся шиня азк эсь цёрацти: "Тиендемок тяфта, мон лятфнеса сянь, мезе Азорсь тись тейне, мзярда мон лисень Египетста".9Катк тя койсь-ладяфкссь ули кода тяштькс кядцень лангса и кода лятфнембяль конясот, улеза тянь вельде Азорть тонафтомац тонь кургсот, сяс мес Азорсь Эсь кеме кяденц вельде лихтензе тонь Египетста.10Пяшкотькшнек тя койть-ладяфксть кизоста кизос, ладяф пингста.11Мзярда Азорсь сувафттанза тонь Ханаанонь модав, кода варась тейть и тонь атянь-атятненди, и макссы сонь тейть, –12эста макск Азорти эрь васень шачф цёранять, кона панжезе тядянь потмоть. Тяфта жа эрь жуватань васень шачф атялефксть макссек Азорти.13Но ишимть васень шачф вашенянц вастс макссек вероскя. А кда аш мяльце тянь тиемс, эста пувордак ишимвашенять прянц. Сембе васень шачф цёратнень идемаснон инкса пантт питне*б.14И мзярда кизефттянза цёраце, мярьгомок: "Кодама тянь смузец?", эста азк тейнза: "Азорсь Эсь кеме кяденц вельде лихтемазь минь Египетста, урексшинь кудста.15Мзярда фараонць мольсь каршек и ашемазь нолне минь, Азорсь шавозень Египетонь масторса сембе васень шачфнень, цёрашабаста сявозь жуватань атялефкснень самс. Тянкса мон каннесайне Азорти озксказнекс жуватань атялефкснень, васень шачфнень, конат панжезь тядянь потмоть, а эсь васень цёранень инкса паннян питне".16Катк тя ули кода тяштькс кядцень лангса и кода лятфнембяль конясот, сяс мес Азорсь Эсь кеме кяденц вельде лихтемазь минь Египетста».
17Мзярда фараонць нолдазе Израилень ломаньтналть, Шкайсь ашезень вяте синь Филистимань модава, хуш ся кись ульсь сяда нюрьхкя. Шкайсь арьсесь: «Мзярда Израилень ломаньтналсь няйсы, тейст сави тюремс, синь полафтсазь мяльснон и мрдайхть Египету».18Сянь вастс Азорсь вятезе ломаньтналть кувака киге, шавмодать пачк Якстерь оцюведти. Израилень ломаньтналсь лиссь Египетонь масторста тюреманди анок.19Моисей сявозень мархтонза Иосифонь пакарензон, сяс мес Иосиф сявсь варамань вал Израилень цёранзон кядьста, мярьгомок: «Мзярда Шкайсь сай тейнть лездома, эста лихтесть тяста монь пакарнень».20Израилень ломаттне тусть Сокхофста и стяфтозь кошснон Ефамса, шавмодать песа.21Шить Азорсь мольсь инголест коволонь орваса, няфнемок тейст кить, а веть – толонь орваса, валдопнемок киснон. Сяс синь мольсть и шить, и веть.22Коволонь орвась ашезь аеркшне ломаньтналть эзда шить и толонь орвась – веть.
*б 13:13 тяса: выкуп
Глава 13