Выбрать язык
Книги Ветхого Завета
Книги Нового Завета
с русским текстом1Моисей мярьгсь каршезонза: «А кда синь аф кемайхть тейне и аф кулхцондсазь валнень, и мярьгихть: "Азорсь ашезь эвондакшне тейть"?»2Азорсь мярьгсь тейнза: «Мезе тонь кядьсот?» Сон мярьгсь каршезонза: «Байдек».3Азорсь мярьгсь: «Ёрдак сонь модать лангс». Моисей ёрдазе байдеконц модать лангс, и ся арась куйкс. Моисей ворьгодсь ваксстонза,4но Азорсь мярьгсь тейнза: «Венептьк кядцень и сявк сонь пулода». Моисей венептезе кяденц, сявозе куйть, и кядьсонза сон арась байдекокс.5«Тянь вельде синь кемайхть: тейть эвондакшнесь Азорсь, атянь-атяснон Шкайсна – Авраамонь Шкаец, Исааконь Шкаец и Иаковонь Шкаец».6Азорсь нинге мярьгсь тейнза: «Навак кядцень повозт». Моисей навазе кяденц повозонза, и мзярда таргазе сонь, няезе, кядец акшемсь наксафты урмать эзда, арась кода лов.7Азорсь тага мярьгсь: «Нинге весть навак кядцень повозт». Моисей тага весть навазе кяденц повозонза, и мзярда таргазе тоста, няезе, кядец меки арась сембе ронгонц лаца.8«Кда синь аф кемайхть тейть и васенце дивань тяштькссь аф полафтсыне мяльснон, эста синь кемайхть омбоце дивань тяштьксти.9А кда ня кафта тяштькснендинге аф кемайхть и тонь валхненьге аф кулхцондсазь, эста амолдак Нилста ведь и пяяртьк сонь модать лангс. Нилста сявф ведсь тиеви веркс модать лангса».
10Моисей мярьгсь Азорти: «Вай, Азор, мон аф маштан лац корхтама. Мон тяфтамкс улень инголинге и тянинге, мзярда Тон корхтат покодицень мархта. Мон корхтан стакаста и кялезе повонды».11Азорсь мярьгсь: «Кие максозе ломанти кургть? Кие тиендьсы ломанть аф корхтайкс али пярявкс, няикс али сокоркс? Дяряй аф Мон, Азорсь?12Тяни архт. Мон улян мархтот, мзярда тон кармат корхтама и тонафтте, мезе азомс».13Но Моисей мярьгсь: «Азор! Эняльдян, кучк киньге лиянь».14Эста Азорсь лаказевсь кяжса Моисеень лангс и мярьгсь: «Кали аш тонь Аарон брадце, кона левиеннетнень эзда? Мон содаса, сон машты лац корхтама. И вага, сон лиссь ни каршезт, и мзярда няйхтянза, седиец пяк кенярди.15Тон кармат корхтама тейнза и путсайть валнень сонь кургозонза, а Мон улян лездыкс тейнть корхтамстонт, и карман тонафнемонт, мезе тиемс.16Сон тонь вастозт кармай корхтама ломаньтналти. Тяфта сон ули тейть кургокс, а тон улят тейнза Шкай вастс.17Сявк кядезт тя байдекть: вельденза кармат тиендема дивань тяштькст».
18Моисей мрдась Иофоронди, эсь атявозенцты, и мярьгсь тейнза: «Монь мялезе мрдамс эсь ломаньтналозти, кона Египетса; ванца, шисот нинге али аф». Иофор мярьгсь Моисеенди: «Мольхть сетьмоши мархта».
19Азорсь мярьгсь Моисеенди Мадиамонь модаса: «Архт, мрдак Египету, сяс мес кулость сембе, кит ёрасть шавомс тонь».20Эста Моисей сявозе рьванц и цёранзон, озафтозень синь ишим лангс и тусь Египетонь мастору. И Моисей сявозе кядезонза Шкаень байдекть.21Азорсь мярьгсь Моисеенди: «Мзярда мрдат Египету, ватт, тиить фараонть инголе сембе тяштькснень, конатнень Мон максыне тейть тиемс. А Мон кевонзафтса фараонть седиенц, и сон аф нолдасы ломаньтналть.22Эста азк фараонти: "Тяфта корхтай Азорсь: Израильсь – Монь васень цёразе.23Мон корхтан тейть: Нолдак цёразень, катк сон моли Тейне сюконяма. А кда аф нолдасак, эста Мон шавса тонь васень цёрацень"».
24Ки лангса, удома лоткама вастса, лиссь тяфта: Азорсь васьфтезе Моисеень и ёразе шавомс сонь.25Эста Сепфора сявсь кевонь пеель, керозе цёранц киськопенц и, токафтомок Моисеень пильгонзонды, мярьгсь: «Тон монь веронь мирдезят».26И Азорсь кадозе Моисеень. Эста Сепфора мярьгсь: «Веронь мирдезе киськопень керомать вельде».
27Азорсь мярьгсь Аарононди: «Архт шавмодав Моисеень васьфтема». Аарон тусь, и васьфтезе Моисеень Шкайть пандонц лангса, и палазе сонь.28Моисей азондозе Аарононди семботь сянь, мезе мархта кучезе сонь Азорсь. Сон тяфта жа азондсь сембе дивань тяштькснень колга, конатнень Азорсь кошардозе тиемс.29Меле Моисей и Аарон мольсть и кочказь Израилень ломаньтналть сембе оцюнянзон.30Аарон азондозень сембе валхнень, конатнень Азорсь корхтазень Моисеенди, и Моисей тиезень дивань тяштькснень ломаньтналть инголе.31Эста ломаньтналсь кемась тейст. И мзярда синь кулезь: Азорсь няезень синь маятамаснон и сась лездома Израилень ломаньтналти, эста синь комафтозь шамаснон модать видес и сюконясть.
Глава 4