Выбрать язык
Книги Ветхого Завета
Книги Нового Завета
с русским текстом1Иосиф макссь кошаркс кудонь вятиенцты, мярьгомок: «Пяшкодить ня ломаттнень кяскавснон ярхцамбяльса, мзяра тейст кандови, и эрть сиянь ярмаконц путк кяскав кургти.2Путк монь кядьгозень, сиянь кядьгозень, инь ёмла брадть кяскав кургозонза марса сёронь ярмаконц мархта». Кудонь вятись тись Иосифонь валонц коряс.
3Шобдава, мзярда валдашкодсь, ня ломаттне ишимснон мархта нолдафтольхть кис.4Синь нинге аф ичкозетольхть ошть эзда, мзярда Иосиф мярьгсь кудонь вятиенцты: «Архт сатыть ня ломаттнень и, мзярда сатсайть, мярьк тейст: "Мес тинь паронкса пандоде кяжса?5Вдь тя кядьгоста симонди азорозе и вельденза сотцесыне салавань и сай пингонь тефнень. Тинь тиеде пяк кальдявста"».6Сон сатозень синь и азозень тейст ня валхнень.7Синь мярьгсть тейнза: «Мезе тон тяфтамсь корхтат, азороньке? Аф, тонь покодихне аф тиендихть тяфтама тефт.8Няить, ся сиянь ярмактьке, конань муськ эсь кяскавсонк, минь меки кандоськ тейть Ханаанонь модаста. Мезенди тейнек салсемс сия али зрня азорцень кудста?9Кона покодицень кядьста мусак кядьготь, ся катк кулы, и минь сембе ляттама урекс азороньконди».10Сон мярьгсь: «Пара. Кода тинь мярьгоде, стане катк ули: кинь кядьста мон муса кядьготь, ся ляды тейне урекс, а тинь ульхтяда аф муворуфт».11Синь эрязста валхтозь эсь кяскавснон модать лангс, и эрсь панжезе кяскавонц.12Кудонь вятись вешендезень, ушедомок оцюста ёмлать самс, и кядьгось мувсь Вениаминонь кяскавста.13Эста браттне ризфть эзда сязезь эсь щамснон, эрсь кеподезе кяскавонц ишимонц лангс, и синь мрдасть ошу.
14Иуда и сонь брадонза састь Иосифонди, кона нинге кудсоль, и прасть инголенза модать лангс.15Иосиф мярьгсь тейст: «Мезе тинь тиеде? Дяряй тинь ашесть сода, монь лацон ломанць няйсыне салава тиф тефнень?»16Иуда мярьгсь: «Мезе тейнек азомс азороньконди? Мезе азомс каршек? Кода няфтемс – минь аф муворуфтама? Шкайсь лихтезе лангти тонь покодихнень муворшиснон. Минь тонь уретне, минь и сявок, кинь кядьста мувсь кядьгось».17Но Иосиф мярьгсь: «Аф, мон мзярдонга тяфта аф тиян. Урекс тейне ляды ся, кинь кядьста мувсь кядьгось, а тинь сетьмоши мархта мрдада алянтенди».
18Эста Иуда нежедсь тейнза и мярьгсь: «Вай, азорозе, макст покодицти корхтамс тейть, и тят кяжие покодицень лангс. Вдь тон кода сонць фараонць.19Азорозе кизефнезень эсь покодиензон, мярьгомок: "Тинь ули алянте али брадонте?"20Минь азоськ азороньконди: "Минь ули пяк сире аляньке, и сонь ули ёмла цёрац, кона шачсь тейнза сиредембяли. Цёрать брадоц кулось, и сон ськамонза лядсь тядянц эзда. Аляньке пяк кельгсы сонь".21Тон мярьготь эсь покодихненди: "Вятесть сонь тейне, мялезе эсь сельмосон няемс сонь".22Минь мярьгоме азороньконди: "Цёрати аш кода кадомс алянц; кадондярясы алянц, ся кулы".23Но тон мярьготь эсь покодихненди: "Аф сандяряй мархтонт ёмла брадонте, эста оду тяда эвондакшне сельминголен".24Мзярда минь мрдаме аляньконди, тонь покодицти, минь азондоськ тейнза, мезе мярьгсь азороньке.25Пингонь ётазь аляньке мярьгсь тейнек: "Арда, тага рамада тейнек аф лама ярхцамбяль".26Минь мярьгоме: "Тейнек аш кода молемс, кда ёмла брадоньке аф моли мархтонк, сяс мес тейнек мярькф аф эвондакшнемс ся ломанть сельминголенза, кда ёмла брадоньке аф ули мархтонк".27И аляньке, тонь покодице, мярьгсь тейнек: "Тинь содасасть, рьвязе шачфтсь тейне кафта цёрат.28Фкясь тусь эздон, и мон мярьгонь: улема, сязендезе вирьбаксянь жувата. И мон тянемс ашине няе сонь.29Кда тяньге сявсасть эздон и мархтонза лиси мезевок кальдяв, эста ризфть эзда тинь пачфтьсасть монь шаржу прязень калму".
30Тяни, кда мон мрдан куду алязти, тонь покодицти, и мархтонк аф ули цёрац, конанди петьф сонь ваймоц,31сон, няемок: цёрац аш, кулы. Тяфта минь, тонь покодихне, пачфтьсаськ шаржу пря покодицень, эсь аляньконь, ризфть эзда калму.32Мон, тонь покодице, максонь алязти вал мрдафтомс цёранц, мярьгомок: "Кда мон аф вятьса сонь тейть, эста лядан муворукс инголет сембе эряфозень перьф".33Сяс, катк мон, тонь покодице, лядан азорти урекс цёрать вастс, а цёрась катк туй брадонзон мархта.34Кода мон мрдан алязти, кда цёрась аф ули мархтон? Монь аш мялезе няемс ся кальдявть, кона сатсы алязень».
Глава 44