Выбрать язык
Книги Ветхого Завета
Книги Нового Завета
с русским текстом1Вачашись масторса сядонга вииясь.2Мзярда Египетста кантф сёрось сивовсь, алясна мярьгсь тейст: «Арда тага и рамада тейнек аф лама ярхцамбяль».3Но Иуда мярьгсь каршезонза: «Ся ломанць пяк казямста корхтась мархтонк, сон мярьгсь: "Тяда эвондакшне сельминголен, кда брадонте аф ули мархтонт".4Кда тон нолдасак мархтонк брадоньконь, эста минь мольхтяма и раматама тейть ярхцамбяль.5Но кда аф нолдасак, эста аф мольхтяма, сяс мес ся ломанць мярьгсь тейнек: "Тяда эвондакшне сельминголен, кда брадонте аф ули мархтонт"».6Израиль мярьгсь: «Мезенди тинь тиесть тейне тя кальдявть? Мезенди азость ся ломанти нинге фкя брадонтень колга?»7Синь мярьгсть: «Ся ломанць кизефнесь минь колганк и минь тналоньконь колга. Сон кизефтезе: "Шиса нинге алянте? Улихть-аш нинге брадонте?" Сяс минь азондоськ тейнза, кода ульсь. Коста минь содаськ, сон мярьги: "Вятесть сей брадонтень?"»8Иуда мярьгсь Израиленди, эсь алянцты: «Нолдак цёрать мархтон, и минь тутама кис. Эста сембе минь ляттама шиса и аф кулотама вачашида – аф минь, аф тон, аф минь иденьке.9Мон максан инксонза вал и монь кядьстон вешсак сонь. Кда мон аф вятьса сонь тейть и аф стяфтса инголет, эста лядян муворукс инголет сембе эряфозень перьф.10Кда минь афолеськ тарксе пингть, эста ни кафксть салеме куду».11Израиль алясна мярьгсь тейст: «Кда тевсь тяфта шарсь, эста вага мезе тиеда: сявода мархтонт тя модань козяшит – вадембяльхть, медь, шуфтовай и ладан, фисташкат и миндаль, и кандость синь казнекс ся ломанти.12Сявода мархтонт кафксть сяда лама сиянь ярмак, и мрдафтость ся сиянь ярмакть, кона путфоль кяскавозонт, пади, ся ульсь эльбятькс.13Сявость брадонтень и моледа ся ломанти.14Катк Сембонь Кирди Шкайсь лезды тейнть, и катк ся ломанць варжаксты лангозонт ужяльдезь и нолдасы мархтонт лия брадонтеньге и Вениаминоньге. А кда тейне мярькф юмафтомс иднень, эста катк ули стане».
15Алятне сявозь мархтост ся казнетнень, кафксть сяда лама сиянь ярмак и Вениаминонь. Синь тусть Египету, и тоса стясть Иосифонь инголи.16Мзярда Иосиф няезе ётксост Вениаминонь, сон мярьгсь кудонь вятиенцты: «Сувафтыть ня ломаттнень кудботму, печк жувата и аноклак эздонза ярхцамбяль, сяс мес шиньгучкать ня ломаттне кармайхть ярхцама монь мархтон».17Кудонь вятись тись стане, кода кошардозе Иосиф, и сувафтозень ся ломаттнень Иосифонь кудботмозонза.18Мзярда браттнень вятезь Иосифонь кудозонза, синь эводсть и мярьгсть: «Минь вятемазь тяза сиянь ярмакть инкса, конань путозь минь кяскавозонк васенцеда самстонк. Синь мяльсна сялгадомс и врьгятемс лангозонк, тиемс минь урекс эстейст и сявомс ишимоньконь».19Синь нежедсть Иосифонь кудонь вятиенцты и кенкш лангса корхтазевсть мархтонза,20синь мярьгсть: «Азороньке, кулхцондомасть, минь ни сашендоме тяда инголи ярхцамбялень рамама,21и лиссь тяфта: мзярда лоткаме вень ётафтома, минь юксоськ кяскавоньконь, и эрть сиянь ярмакоц сталмонц коряс путфоль кяскав кургти. Тяни минь кандоськ тя сиянь ярмакть меки.22Сявоме мархтонк тяфта жа лия ярмаковок ярхцамбялень рамаманди. Минь аф содасаськ, кие путозе сиянь ярмаконьконь кяскавозонк».23Сон мярьгсь: «Тяда пичеде и тяда пеле. Тинь Шкаенте и алянтень Шкаец путозе кяскавозонт ся козяшить. Тинь сиянь ярмаконте пачкодсь тейне». Меле сон вятезе тейст Симеононь.24Тя ломанць сувафтозень синь Иосифонь кудозонза, макссь тейст пильгонь штамс ведь и андозень синь ишимснон.25Синь аноклазь казнеснон Иосифонь самс, шиньгучкати, сяс мес кулезь: синь ярхцайхть тоса.
26Мзярда Иосиф сась куду, синь кандозь тейнза казнеснон, конат ульсть мархтост, и сюконясть инголенза модать видес.27Иосиф кизефтсь шумбрашиснон колга и мярьгсь: «Кода эряй-ащи алянте, ся атясь, конань колга тинь азонкшнеде тейне? Сон нинге шиса?»28Синь мярьгсть: «Шумбра тонь покодице, минь аляньке. Нинге шиса». Сембе синь комафтозь пряснон и сюконясть инголенза.29Иосиф кеподезень сельмонзон и няезе Вениамин брадонц, тядянц цёранц, и мярьгсь: «Тя тинь ёмла брадонте, конань колга азонкшнеде тейне?» И мярьгсь: «Катк Шкайть кельгозь ужяльдемац ули тонь мархтот, цёрай».
30Иосиф куроконе тусь тоста, сяс мес седиец таколдозевсь кельгомать эзда брадонцты, и сон аноколь ни аварьгодомс, но лиссь потмонь кудбяльксти и авардсь тоса.31Меле сон штазе шаманц, лиссь и прянь кирдезь мярьгсь: «Кандость ярхцамбяльть».32Ярхцамбяльсь башка кантфоль Иосифонди, башка браттненди и башка Египетонь ломаттненди, конат ярхцасть пялонза. Египтяттне аф ярхцсихть еврейхнень мархта, сяс мес тя тейст туткотьксонь тевкс.33Браттнень озафтозь Иосифонь каршес кизоснон коряс, оцюста сявомок ёмлать самс, и синь ванцть фкя фкянь лангс дивандазь.34Мзярда тейст каннесть ярхцамбяльхть Иосифонь шрастонза, Вениаминонь талекац ульсь ветексть сяда оцю лия браттнень талекаснон коряс. И синь сатомшка вина симсть Иосифонь мархта.
Глава 43