Выбрать язык
Книги Ветхого Завета
Книги Нового Завета
с русским текстом1Иосиф вятьфоль Египету, и Египетонь ломанць Потифар, фараононь оцязоргудса покодись, фараонть ванфтыензон оцюнясна, рамазе сонь измаильтяттнень кядьста, конат вятезь сонь тоза.2Азорсь ульсь Иосифонь мархта, сяс сонь тевонза мольсть пяк лац. Иосиф эрясь египетонь кудазоронц пяле,3и ся няезе: Азорсь Иосифонь мархта, и сембоса, мезе сон тиенди, Азорсь максси тейнза сатфкс.4Иосиф тусь кудазоронц мяльс и ся тиезе сонь эстейнза покодикс. Потифар путозе сонь эсь кудсонза тевонь вятикс и максозе кядялонза семботь, мезец ульсь.
5Ся пингста сявомок, мзярда Потифар путозе Иосифонь тевонь вятикс эсь кудсонза и сембе уликсонц лангса, Азорсь бславазе египтянинть кудонц Иосифонь инкса. Азорть бславамац ульсь семботь лангса, мезе ульсь Потифаронь кудсонза и паксясонза.6И тяфта Потифар кадозе Иосифонь кядялу семботь, мезец ульсь, и эсь ярхцамбяльдонза башка ашезь пичеде мезеньге колга.
Иосиф мазыель ронгонь и шамань ширдевок.7Пингонь ётазь Иосифонь лангс путсь сельме кудазоронц рьвац. Авась мярьгсь: «Удок мархтон».8Но Иосиф ашезь тие стане и мярьгсь кудазоронц рьванцты: «Тон няйсак, монь мархтон кудазорозе кудонь тевса мезенксонга аф пичеди, и монь кядялон максозе сембонц, мезец ули.9Тя кудса аш мондедон оцю ломань. Сон семботь максозе монь кядялон, тондедот башка, сяс мес тон сонь рьвацат. Кода мон тиян сяшка кальдяв и суван пежес Шкайть инголе!»10Шиста шис авась корхнесь Иосифонди тянь колга, но Иосиф ашезе кулхцонда сонь: сон ашезь мадонда мархтонза и мянь ашезь ляткшне ваксозонза.
11Фкя шиня лиссь тяфта: мзярда Иосиф сувась куду эсь тевонзон тиема, а кудстоннетнень эзда кивок ашель кудса,12авась фатязе сонь лангань щамда и мярьгсь: «Удок мархтон». Но Иосиф, кадомок эсь щамонзон авать кядьса, ёрдась пря инголи и ворьгодсь кудста.13Авась няемок, Иосиф кадозе щамонц сонь кядьсонза и ворьгодсь кудста,14тердезень кудса эряензон и мярьгсь тейст тяфта: «Ваность, Потифар вятезе тя евреень алять кудозонк лангсонк наругаманди. Сон сась тейне и ёрась удомс мархтон, но мон кайгиста пешкодонь.15Сон, марямок монь пешкодомазень, кадозе эсь щамонц ваксозон и ворьгодсь кудста».16Авась кадозе щамть эстейнза, мзярс ашезь са куду Иосифонь кудазороц.17Рьвясь азондозе мирденцты сякоть, мярьгомок: «Ся евреень уресь, конань тон вятить тейнек, сашендсь наругама лангсон.18Но мзярда мон ушедонь пешкодома, сон кадозе ваксозон щамонц и ворьгодсь тяста».19Мзярда Иосифонь кудазороц кулезень рьванц валонзон, конатнень сон азозень тейнза, мярьгомок: «Тяфта тонь уреце тись монь мархтон», сон лаказевсь кяжса.20Сон сявозе Иосифонь и ёрдазе пякстамгуду, косольхть оцязорть пякстафонза. Тяфта Иосиф повсь пякстамгуду.
21Азорсь ульсь Иосифонь мархта и няфтезе тейнза Эсь аф полафни кельгоманц: Сон ладязе пякстамгудонь оцюнять седиенц Иосифонди.22Пякстамгудонь оцюнясь максозень Иосифонь кядялу сембе пякстафнень, конат ульсть пякстамгудса, и сембоса, мезе синь тоса тиендсть, сон ульсь тевонь вятикс.23Пякстамгудонь оцюнясь афи ванць сянь мельге, мезсь ульсь Иосифонь кядяла, сяс мес Азорсь ульсь Иосифонь мархта и макссесь сатфкс сембе тевсонза.
Глава 39