Выбрать язык
Книги Ветхого Завета
Книги Нового Завета
с русским текстом1Ся пингть Иуда тусь брадонзон эзда. Сон кармась эряма Одоллам ошса фкя ломанть ширеса, конань лемоц ульсь Хира.2Тоса Иуда няйсь стирь, ханаанеянь алять, Шуань, стиренц. Иуда сявозе сонь рьвакс и удось мархтонза.3Сон пекиясь и шачфтсь цёра, и Иуда лемдезе сонь Иркс.4Авась тага пекиясь и шачфтсь цёра, конань лемдезе Онанкс.5И нинге шачфтсь цёра и лемдезе сонь Шелакс. Мзярда сон шачфтозе Шелань, Иуда ульсь Хезивса.6Иронди, эсь васень цёранцты, Иуда сявсь рьвя, конань лемоцоль Фамарь.7Но Иронь, Иудань васень цёранц, тевонза ульсть кальдяфт Азорть сельминголенза, и сяс Азорсь кулофтозе сонь.8Эста Иуда мярьгсь Онанонди: «Удок брадцень удаванц мархта, рьвяяк лангозонза, кода альгя, и макст брадцти юромонь поладыхть».9Но Онан содазе: ся идсь, кона шачи, ули аф сонне, сяс сон, фалу, мзярда сашендсь удома брадонц рьванц мархта, шудефнезе алянь видьмонц модати: афоль шача идь брадонцты.10Тяфта сон тись кяжи тев Азорть сельминголе, и Азорсь кулофтозе соньге.11Иуда мярьгсь Фамаренди, эсь рьвянянцты: «Эряк удавакс эсь аляцень кудса, мзярс аф касы Шела цёразе». Иуда арьсесь: «Тявок цёразе афоль кула кафта брадонзон лаца». Фамарь тусь и кармась эряма эсь алянц кудса.
12Ётась лама пингта и кулось Шуань стирец, Иудань рьвац. Мзярда Иудань седиец озась ризфта меле, сон Хира ялганц мархта, кона ульсь одолламитянин, тусь Фамнав учанзон нарайснонды.13Фамаренди азозь: «Вага, тонь атявозце моли Фамнав учанзон нарама».14Эста Фамарь каяфтозень удавань щамонзон, вельхтязе прянц вельхтердаса, кяшезе шаманц и озась Енаимонь ортатнень ваксс, конат ащихть Фамнав вяти кить лангса. Вдь Фамарь няезе: сон тянемс апак макст рьвакс Шеланди, хуш Шела ни кассь.
15Иуда няезе сонь и лувозе усксеви авакс, сяс мес сон кяшезе шаманц.16Иуда нежедсь тейнза и мярьгсь: «Монь мялезе удомс мархтот». Сон ашезе сода: тя сонь рьвяняц. Фамарь мярьгсь каршезонза: «Мезе тон максат тейне мархтон удомать инкса?»17Сон мярьгсь: «Мон кучан тейть сява лефкс эсь стадастон». Фамарь мярьгсь: «Катт тейне кодамовок кемокстама, мзярс нинге ашеть куча сява лефкс».18Сон мярьгсь: «Кодама кемокстама тейть кадома?» Фамарь мярьгсь: «Кргазт повфтаф тяштьксонь путомацень и байдекцень, кона кядьсот». Сон максозень синь тейнза и удось мархтонза, и Фамарь пекиясь эздонза.19Фамарь тусь тоста, валхтозе вельхтерданц и меки щазень удавань щамонзон.
20Иуда кучезе одолламитянин ялганц кандомс авати сява лефксть и сявомс кядьстонза сянь, мезе сон кадондсь кемокстаманди, но ялгац ашезе му авать.21Сон кармась кизефнемост тостонь эряйхнень, корхнемок тейст: «Коса усксеви авась*а, кона ульсь Енаимса кить ваксса?» Но синь мярьгсть: «Тяса ашель усксеви ава».22Сон мрдась Иуданди и мярьгсь: «Мон ашине му сонь. Тостонь эряйхневок мярьгсть, кле тоса ашель усксеви ава».23Иуда мярьгсь: «Катк ся сембось ляды кядьсонза, аньцек тязаст ушеда лангсонк пеетькшнема. Мон вдь кучень сява лефкс, но тон ашить му авать».
24Колмошка ковда меле Иуданди пачфтезь: «Тонь рьвяняце, Фамарь, усксевсь аля мархта и тяни пеки эздонза». Иуда мярьгсь: «Лихтесть сонь и плхтасть».25Но мзярда Фамарень вятезь плхтамас, сон эняльдсь пачфтемс атявозенцты: «Мон пекуван сянь эзда, киннет ня паршихне». И нинге мярьгсь: «Содайть, киннет нят кргас повфневи тяштьксонь путомась и байдексь?»26Иуда содазень и мярьгсь: «Сон мондедон виде. Мон вдь ашине макса сонь рьвакс Шела цёразти». Иуда оду ашезь уда мархтонза.27Мзярда Фамарень сась шачфтома пингоц, содазь – пексонза кафтасть.28Шачфтомста лиссь фкять кядец, и бокон соты авась сюлмась сонь кядезонза якстерь сюреня, и мярьгсь: «Тя лиссь васенцекс».29Но шабась мрдафтозе кяденц, и лиссь брадоц. Бокон соты авась мярьгсь: «Кода тон ётавоть перяфксть пачка?» И лемтьфоль иднясь Фарескс*б.30Сонь мельганза лиссь брадоц, конань кядьсонза ульсь якстерь сюреня. И сон лемтьфоль Заракс*в.
*а 38:21 Ханаанонь аф афкуксонь шкайхнень кудсост покодсть усксеви ават. Тяса, 21 и 22 стихса корхтави тяфтама усксеви ава колга.
*б 38:29 Фарес лемть смузец – «перяфксонь пачка ётама».
*в 38:30 Зара лемть смузец – «вандолды, кода якстерь заря».
Глава 38