Выбрать язык
Книги Ветхого Завета
Книги Нового Завета
с русским текстом1Иаков варжакстсь и няезе: каршезонза моли Исав, и мархтонза ниле сятт ломань. Эста Иаков мярьгсь Лиянь, Рахилень и кафта аваурензон идьснонды арамс эсь тядяснон ваксс.2Сон арафтозень авауретнень и синь идьснон инголи, мельгаст Лиянь и сонь идензон, а Рахилень и Иосифонь мекольцексокс.3Сонць Иаков мольсь сембонь инголе и, мзярда кармась малаткшнема брадонцты, сисемксть комась модать видес.4Но Исав ласьксь каршезонза, ашкодозе сонь, лаподсь мяштезонза и палазе, и синь аварьгодсть.5Мзярда Исав кеподезень сельмонзон, сон няезень аватнень и шабатнень и кизефтезе: «Кит нят мархтот?» Иаков мярьгсь каршезонза: «Идне, конатнень Шкайсь максозень тонь покодицти Эсь кельгозь ужяльдеманц*а коряс».6Эста авауретне нежедсть идьснон мархта и сюконясть модать видес.7Нежедсь Лиявок идензон мархта, и сюконясть модать видес. Синь мельгаст нежедсь Рахиль Иосифонь мархта, и сюконясть модать видес.8Исав кизефтезе: «Мезенди тон кучить сембе ся стадатнень, конатнень мон васьфтине?» Иаков мярьгсь каршезонза: «Tя сянкса: васьфтелемань азорозе пара мяльса».9Но Исав мярьгсь: «Брадозе, монь сембодон лама. Катк тоннесь ляды кядьсот».10Иаков мярьгсь: «Аф, кда тонь мяльце ладяф тейне, эста сявк кядьстон казнезень. Тейне няемс тонь шамацень, тя сяка, кда кивок няелезе Шкайть шаманц, вдь тон кельгозь васьфтемайть монь.11Сявк казнезень*б, конань мон кандыне тейть, сяс мес Шкайсь Эсь кельгозь ужяльдеманц коряс макссь тейне, и монь ули сембозе, мезе эряви». Иаков пяк эняльдсь Исавонди, и ся сявозе казнеть.
12Исав мярьгсь: «Аде тутама кис. Мон карман молема тонь инголет».13Но Иаков мярьгсь тейнза: «Азорозе содасы: иттне ёмлат, а учане, сяване и траксоне потямат, кда хуш фкя ши вишкста панемс эсост, сембе стадась кулы.14Катк азорозе моли эсь покодиенц инголе, а мон карман молема валомне, стане, кода молевихть жувататне, конат инголен, и кода молевихть иттне, и саян азорозти Сеиру».15Исав мярьгсь: «Мон кадан мархтот мзярошка ломань моннетнень эзда». Иаков мярьгсь: «Мезенди? Стадонга азорозе васьфтемань монь пара мяльса».16И тяфта Исав сяка шиня тусь Сеиру.17А Иаков тусь Сокхофу, коса тись эстейнза куд, а жуватанзонды – латот-кошт. Тянкса и лемдезе тя вастть Сокхофкс*в.
18Месопотамияста мрдамста, Иаков шумбраста сась Сихем ошу*г, кона Ханаанонь модаса, и лоткась ошть видес.19Мода пакшть, коса сон стяфтозе эсь кошенц, Иаков рамазе сяда сиянь ярмакта Емморонь, Сихемонь алянц, цёранзон кядьста.20Сон тись тоса алтарь и макссь тейнза лем «Шкай, Израилень Шкай».
*а 33:5 кельгозь ужяльдема – милость
*б 33:11 буквальна «бславамазень»
*в 33:17 Сокхоф валть смузец – «кошт, латот».
*г 33:18 али: Салим ошу
Глава 33