Выбрать язык
Книги Ветхого Завета
Книги Нового Завета
с русским текстом1Иаковонь пилес пачкодсь, мезе Лаванонь цёранза корхнихть колганза: «Иаков сявозе аляньконь кядьста семботь, мезец ульсь. Аляньконь уликс-паростонза сон кочказе эстейнза сембе тя козяшить».2Иаков няезе: Лаванонь шамац полафтсь тейнза – сонь ванфоц ульсь ни аф стама ляпе, кода инголи.3Эста Азорсь мярьгсь Иаковонди: «Мрдак атяцень-аляцень модазост, эсь юромонь ломаттненди. Мон улян мархтот».
4Иаков тертьфтезень Рахилень и Лиянь паксяв, коса вановсть учань и сявань стаданза,5и мярьгсь тейст: «Мон няйса, алянтень шама ванфоц полафтсь тейне, сон ни аф стама, кодама ульсь инголи. Но монь алязень Шкаец фалу мархтоноль.6Тинь тинць содасать: мон сембе вийсон покодень алянтень лангс,7а алянте васькафнемань монь и кемонькшкаксть полафнезе тейне питнень пандомать. Но Шкайсь ашезь макса тейнза тиемс тейне кальдяв.8Мзярда сон мярьгсь: "Катк сембе сёрмафне улихть тейть питнень пандомакс", эста сембе учатне верозасть сёрмав вероскат. А мзярда сон мярьгсь: "Катк сембе аф фкя тюсонь учатне улихть тейть питнень пандомакс", эста сембе учатне верозыясть аф фкя тюсонь верозкат.9И тяфта Шкайсь сявозень учатнень и сяватнень алянтень кядьста и максозень тейне.10Весть, учань арнема пингста, онцтон мон кеподине сельмонень и няине: атясяватне, конат кеподсть авасяватнень и аваучатнень лангс, ульсть аф фкя тюсоннет, сёрмафт и тяштькс мархтот.11Шкаень ангелсь пшкядсь тейне онцтон: "Иаков!" Мон мярьгонь: "Мон тясан".12Сон мярьгсь: "Кеподить сельмотнень и ватт: сембе атясяватне, конат кеподсть авасяватнень и аваучатнень лангс, аф фкя тюссот, синь сёрмафт и тяштькс мархтот, сяс мес Мон няйса семботь, мезе Лаван тиенди мархтот.13Мон Шкайсян, кона эвондась тейть Вефильса, коса тон валыть мялямгевть вайса и коса тон максоть Тейне вал. Тяни стяк, лиссть тя модаста и мрдак эсь шачема масторозост"».14Рахиль и Лия мярьгсть каршезонза: «Тейнек сяка аф максови кодамовок талека и уликс-пара аляньконь кудстонза,15сяс мес сон лувсамазь минь ширде сафнень лаца. Сон мимазь минь, и сиянь ярмакть, конань пандозь инксонк, ётафтозе.16Лисенди, сембе козяшись, конань Шкайсь сявозе аляньконь кядьста, минне и минь шабаньконь. Тик семботь, мезе Шкайсь мярьгсь тейть».
17Эста Иаков стясь, озафтозень шабанзон и рьванзон верблюттнень лангс,18сявозень мархтонза сембе жуватанзон, конатне шачсть Месопотамияса, сембе кочкаф уликс-паронц и тусь алянцты, Исааконди, Ханаанонь модав.19Мзярда Лаван тусь учанзон нарама, Рахиль салазень алянц аф афкуксонь шкайнянзон.20А Иаков васькафтозе Арамеянь Лаванть, сёпомок эздонза эсь туманц.21Сон ворьгодсь, сявомок мархтонза сембонц, мезец ульсь; ётазе ляйть*а и тусь Галаадонь панттненди.
22Колмоце шиня Лаванонди азозь: Иаков ворьгодсь.23Эста Лаван сявозень мархтонза эсь тналонь ломанензон и ласьксь Иаковонь мельге сисем шит, и сатозе сонь Галаадонь панттнень лангса.24Но Шкайсь сась Арамеянь Лаванонди веть онцтонза и мярьгсь тейнза: «Ватт, тят корхта Иаковонди аф цебярь, аф кальдяв».
25Мзярда Лаван сатозе Иаковонь, ся ни стяфтозе эсь кошенц панда лангс. А Лаван эсь ломанензон мархта стяфтозе кошенц Галаад пандса.26Лаван мярьгсь Иаковонди: «Мезе тон тиеть? Мезенди тон васькафтомайть монь и сявить стирнень, кода полонц сявфнень?27Мезенди тон васькафтомайть монь и салава ворьгодеть эздон, мезевок апак аст тейне? Мон нолдалихтень тонь кеняртькс потмоса и мор мархта, коряень*б и гуслянь морамаса.28Тон мянь ашеть макса тейне паламс уноконень и стирнень. Прокс аф ёнюста тиеть.29Монь ули виезе тиемс тейнть кальдяв, но тонь аляцень Шкаец исяк веть пшкядсь тейне и мярьгсь: "Ватт, тят корхта Иаковонди аф цебярь, аф кальдяв".30Пара, мярьктяма тон туть, сяс мес пяк лажадоть аляцень кудозонза, но мезенди тон салайть монь шкайнянень?»31Иаков мярьгсь Лаванонди: «Мон тунь салава, сяс мес пелень: сявсайть кядьстон стирьхнень.32Но кулома сянди, кинь кядьста тон мусайть эсь шкайнятнень. Эсь тналонь ломаненьконь ингольде ванк, мезезе монь ули, и мезсь тонне – сянь сявк!» Иаков ашезе сода: Рахиль салазень шкайнятнень.
33Лаван сувсесь Иаковонь кошезонза, Лияньге кошезонза, кафцьке авауретненьге кошезост, но ашезень му синь. Лиянь кошстонза лисемда меле, сон сувась Рахилень кошезонза.34Но Рахиль сявозень шкайнятнень, путозень синь верблюдонь камбразть*в алу и озась лангозост. Лаван ванозе сембе кошть, но ашезень му синь.35Рахиль мярьгсь алянцты: «Азорозе, тят кяжие лангозон, мон аф стяван тонь инголет, сяс мес монь молихть авань тевне». Лаван вешендезень, но ашезень му аф афкуксонь шкайнятнень.
36Эста Иаковонь састь кяженза и сон ушедсь пялькстома Лаванонь мархта. Иаков мярьгсь Лаванонди: «Кодама кяжи тевозень инкса и кодама пежезень инкса тон ласькат мельган?37Вага, тон ваныть сембе монь паршизень. Мезе ёткстост муть эсь кудонь паршихнень эзда? Няфтьк тянь сембе монь ломаннень и эсь ломаттнень ингольде. Катк синь тиихть суд минь ётксонк.38Мон комсь киза улень тонь ширесот. Тонь учатне и сяватне ашезь кайсе лефксснон, и мон ашень ярхцсе боранда тонь стадастот.39Вирьбаксянь жуватаса повафть мон ашине канне тейть, мон монць тянкса пандонь. Поваф жуватать тон вешендить монь кядьстон, аф ваномок шить сонь салазь али веть.40Шить монь маятафтомань опана псись, а веть – кельмось, и удомазе ворьготькшнесь сельмонень эзда.41Тяфта ётась комсь кизось тонь ширесот. Кемнилие кизот мон покодень лангозт кафта стирьхнень инкса и кота кизот тонь учатнень и сяватнень инкса, а тон кемоньксть полафнить тейне питнень пандомать.42Кда мархтон афоль уле алязень Шкаец, Авраамонь Шкаец, Ся, конань эзда пели Исаак, тон тяни нолдалемайть монь шавонь кятть. Но Шкайсь няезе, мзяра сталма мон кирдень и кода покодень эсь кядьвийсон, и исяк веть арась ширезон».
43Лаван мярьгсь Иаковонь каршес: «Ня стирьхне – монь стирне, ня иттне – монь идне, ня жувататне – монь жуватане, сембось, мезть тон няйсак – монне. Но тяни мон ни мезевок аф тиеван эсь стирненди и синь идьснонды, конатнень синь шачфтозь.44Аре ладятама соткс монь и тонь ётксонк, и катк тя соткссь ули ётксонк ладямань няфтемакс».
45Эста Иаков сявсь кев и стяфтозе сонь мялямгевкс.46Иаков мярьгсь эсь тналонь ломанензонды: «Кочкада кефт». Синь кочкасть кефт, тисть эздост мар и лангсонза ярхцасть.47Лаван лемдезе тя вастть Иегар-Сагадуфакс, а Иаков лемдезе сонь Галаадкс*г.48Лаван мярьгсь: «Тячи тя кев марсь кемокстасы-няфтьсы минь ётксонк ладяф сотксть». Сяс сон лемневи Галаадкс,49и нинге Мицпакс*д, сяс мес Лаван мярьгсь: «Катк Азорсь ваны мельган и мельгатка, мзярда минь кяшефтама фкя-фкянь сельмингольде.50Кда тон кармат кальдявста тиендема монь стирнень мархта, али кда монь стирьдон башка сяват лия рьват, эста содак, хуш аш ломань, кона няелезе, Шкайсь няйсы, и Сон видеть няиец минь ётксонк».51Лаван мярьгсь Иаковонди: «Вага кев марсь и вага мялямгевсь, конань мон стяфтыне минь ёткозонк.52Тя кев марсь и тя мялямгевсь кемокстасазь ладяманьконь: мон аф ётан тейть кяж мархта тя кев марть вакска и тонга аф ётат тейне кяж мархта тя кев марть и мялямгевть вакска.53Авраамонь Шкаец и Нахоронь Шкаец, минь аляньконь Шкайсна, катк ули тейнек судьякс». Иаков варась ся Шкайть лемса, конань эзда пельсь Исаак аляц.54Иаков печкозе озксказнеть кев марть лангса и тердезень эсь тналонь ломанензон ярхцама. Синь ярхцасть и ётафтозь тоса веть.
55Варьхмодемшовор Лаван стясь, палазень эсь уноконзон и стирензон, и бславазень синь. Тяда меле сонь тусь и мрдась куду.
*а 31:21 Евфрат
*б 31:27 коряй – бубенец
*в 31:34 камбраз – седло
*г 31:47 Иегар-Сагадуфа (арамеякс) и Галаад (еврейкс) валхнень смузьсна – «кемокстамань-няфтемань кев мар».
*д 31:49 Мицпа валть смузец – «ванома васта».
Глава 31