Выбрать язык
Книги Ветхого Завета
Книги Нового Завета
с русским текстом1Мзярда Исаак сиредсь и сонь сельмонза мезевок ни ашесть няе, сон тердезе Исавонь, оцю цёранц, и мярьгсь тейнза: «Цёрай!» Ся мярьгсь каршезонза: «Мон тясан».2Исаак мярьгсь: «Няйсак, мон сиредень и аф содаса, мзярда кулан.3Тяни архт сявить эсь тюрембяльхнень: налса ляцемацень и налхнень, мольхть паксяв и кундак тейне вирьбаксянь жувата.4Аноклак эздонза танцти ярхцамбяль, конань мон кельгса, и кантк сонь тейне; мон ярхцан эздонза и бславате тонь куломдон инголе».
5Ревекка кулезе, мезе Исаак корхтась Исав цёранцты. Мзярда Исав тусь паксяв алянцты жуватань кундама,6Ревекка мярьгсь Иаковонди, эсь цёранцты: «Мон кулине, кода аляце корхтась Исав брадцти:7"Кантт тейне кундаф вирьбаксянь жувата и аноклак эздонза танцти ярхцамбяль. Мон ярхцан и бславате тонь Азорть инголе, мзярс ашень кула".8Тяни, цёрай, кулхцонтт, мезе мон азан тейть и тик, мезе мярьган тиемда.9Архт стадав и кантт тоста кафта цебярь сява лефкст, и мон аноклан эздост аляцти танцти ярхцамбяль, конань сон кельгсы.10А меле тон кандсак тя ярхцамбяльть аляцти; сон ярхцай эздонза и бславатанза куломда инголе».11Иаков мярьгсь Ревекка тядянцты: «Но Исав брадозе понав ломань, а монь кедезе вадяв.12Месендян, кда алязе токасамань? Эста мон улян васькафникс сонь сельминголенза, и бславамать вастс сон сюдосамань».13Тядяц мярьгсь тейнза: «Катк ся сюдомась ули монь лангсон, цёрай. Аньцек кулхцондыть монь валнень и архт кантт тейне, мезе анань».14Иаков мольсь и кандсь тядянцты кафта од сяват. Тядяц аноклась танцти ярхцамбяль, конань кельгсы Иаковонь аляц.15Меле Ревекка сявозень Исавонь, эсь оцю цёранц, сембода цебярь щамонзон, конат ульсть кудсонза, и щафтозень ёмла цёранц Иаковонь лангс,16а кядензон и крхтапа крганц ашкодозень сявань кедьса.17Сяльде сон максозе Иаков цёранц кядьс танцти ярхцамбяльть и кшить, конань пидезе.
18Иаков сувась алянцты и мярьгсь: «Аляй!» Сон каршезонза: «Мон тясан. Тон конась, цёрай?»19Иаков мярьгсь алянцты: «Мон Исав, тонь васень цёраце. Мон тиине сянь, мезе тон мярьгондеть. Аф ламода кепотть и озак, ярхцак вирьбаксянь жуватазень эзда, и меле бславамак монь».20Исаак мярьгсь цёранцты: «Кода тон тяшкава курок кундайть сонь, цёрай?» Сон мярьгсь: «Азорсь, тонь Шкайце, кучезе сонь каршезон».21Но Исаак мярьгсь Иаковонди: «Цёрай, нежетть малазон, монь мялезе токамс тонь кядьса: тон видекс Исават, али аф».22Иаков нежедсь Исааконди, эсь алянцты, и ся ётафтозень ланганза кядензон, и мярьгсь: «Вайгяльсь Иаковонне, а кяттне Исавоннет».23Исаак ашезе сода Иаковонь, сяс мес сонь кяденза понафтольхть Исавоннетнень лаца, и Исаак бславазе сонь.24Исаак кизефнесы: «Исав цёрай, тя видекс тонат?» Сон мярьгсь каршезонза: «Монан».25Эста Исаак мярьгсь: «Цёрай, венептьк тейне ярхцамбяльть, мон ярхцан вирьбаксянь жуватацень эзда и бславате тонь». Иаков венептезе тейнза ярхцамбяльть, и сон ярхцась. Кандсь винавок, и сон симсь.26Тяда меле Исаак аляц мярьгсь тейнза: «Цёрай, нежетть малазон и паламак монь».
27Иаков нежедсь алянцты и палазе сонь. Исаак марязе щамонзон эзда шинеть и бславазе сонь тяфтама валса:
«Вага, цёразень шинец
ёфси паксянь шине, конань бславазе Азорсь!
28Катк Шкайсь максы тейть менелень раса,
козяста раштай мода, лама кши и вина.
29Катк ломаньтналхне покодихть лангозт,
катк сембе юропне комайхть инголет.
Ульхть азоркс эсь браттненди,
и тядяцень цёранза катк комайхть инголет.
Сюдофт сят, кит сюдотядязь тонь,
бславафт сят, кит бславатядязь тонь!»
30Мзярда Исаак бславазе Иаковонь, и Иаков аньцек лиссь Исаак алянц эзда, Исав брадоц мрдась кундама вастста.31Сонга аноклась танцти ярхцамбяль, кандозе алянц инголи и мярьгсь тейнза: «Аляй, стяк вастстот и ярхцак монь вирьбаксянь жуватадон, и меле бславамак монь».32Но Исаак аляц мярьгсь тейза: «Кият тон?» Сон каршезонза мярьгсь: «Тя мон, тон васень цёраце, Исав».33Исаак трнатомшка эводсь и мярьгсь: «Эста киель ся, кона кундась и кандсь тейне вирьбаксянь жувата? Мон ярхцань ни сембода тонь самдот инголе и бславайне сонь. И монь бславамазе ляды лангсонза».
34Мзярда Исав кулезень алянц валонзон, сон кайгиста и пяк ризназь ювадезевсь, и мярьгсь алянцты: «Аляй, бславамак моньге!»35Но сон мярьгсь: «Брадце сась и васькафтозь сявозе тонь бславамацень».36Исав мярьгсь: «Аф стак сонь лемдезь Иаковкс*а! Вдь сон ни кафксть васькафтомань монь: сявозе монь васень шачфокс улемазень, и вага, тяни сявозе монь бславамазеньге». Исав тага мярьгсь: «Дяряй тейне ашезь ляда бславамаце?»37Исаак мярьгсь каршезонза: «Вага, мон путыне сонь азоркс тонь лангсот, мон максыне сембе брадонзон тейнза покодикс, мон казине сонь кшиса и винаса. Мезе мон тяни тиян тейть, цёрай?»38Эста Исав мярьгсь алянцты: «Аляй, дяряй тонь аньцек фкя бславамаце? Аляй, бславамак моньге!» И Исав вярьгак вайгяльхть аварьгодсь.39Эста Исаак аляц мярьгсь каршезонза:
«Тон кармат эряма
ичкозе иможень канды модатнень эзда
и менелень расафтома.
40Тон кармат эряма сянь эзда, мезе саты тонь торце,
и кармат покодема эсь брадцень лангс.
Но сай стама пинге, мзярда тон мянят кядялдонза
и ёрдасак сялдазстот сонь ашконц».
41Исав лакась кяжса Иаковонь лангс бславамать инкса, конаса аляц бславазе сонь. Исав арьсесь эсь потмованза: «Курок сайхть алязень колга явсемань шитне, эста мон шавса Иаков брадозень».42Ревекканди пачфтезь, мезе арьси тиемс Исав, оцю цёрац. Эста сон тердезе Иаковонь, ёмла цёранц, и мярьгсь тейнза: «Исав брадце мяльшакшни шавомс тонь.43Тяни, цёрай, кулхцонтт, мезе мон азан тейть: ворьготть Лаванонди, монь брадозти Харрану.44Эряк ширесонза снярс, мзярс аф ётай брадцень кяжец.45Мзярда сон лоткай кяжиякшнемда лангозт и юкстасы, мезе тон тиеть тейнза, эста мон кучан мельгат ломатть и сяфте тоста. Монь аш мялезе фкя шиста юмафтомс кафцьке цёранень».
46Ревекка мярьгсь Исааконди: «Монь эрямска аш мялезе хеттейхнень стирьснон инкса. Кда Иаков сяви рьвя хеттейхнень стирьснон эзда, и сон ули нятнень лаца, конат эряйхть тя модаса, эста мезенди тейне эрямс?»
*а 27:36 Иаков лемть смузец – «кочкяря» и нинге «сон васькафни». Ванк нинге 1 Моис. 25:26.
Глава 27