Выбрать язык
Книги Ветхого Завета
Книги Нового Завета
с русским текстом1Авраам ульсь ни сире и кизодонзонга ламоль. Азорсь сембоса бславазе Авраамонь.2Авраам мярьгсь инь оцю покодиенцты, кона вятезень кудонь сембе тефнень: «Путк кядцень монь сюрокозень*а алу3и варак инголен Азорть, менелень и масторлангонь Шкайть, лемса: тон аф сяват монь цёразти рьвя хананейхнень стирьснон эзда, конатнень модасост мон эрян,4но молят монь модазон, монь юромозти, и тоста сяват рьвя Исаак цёразти».5Покодись мярьгсь тейнза: «А кда стирть аф ули мялец молемс мархтон тя модав? Эста месендема тейне, пачфтема цёраце ся модав, коста тон туть?»6Авраам мярьгсь тейнза: «Аф! Цёразень тяк мрдафне тоза.7Азорсь, менелень Шкайсь, кона сявомань монь алязень кудста и шачема модастон, корхтась тейне и варась инголен: "Тейть и тонь юромонь поладыхненди Мон максса тя модать". Сон кучсы Эсь ангелонц тонь инголет, и тоста тон сяват рьвя цёразти.8А кда стирть аф ули мялец молемс мархтот, эста тон улят нолдаф варамацень эзда, аньцек цёразень тяк мрдафне тоза».9Покодись путозе кяденц Авраамонь, эсь кудазоронц, сюроконц алу и варась тейнза.
10Меле покодись сявсь кемонь верблютт кудазоронц верблюдонзон ёткста, кудазоронц эрь кодама паршинзон-козяшинзон и тусь Месопотамияв, ся ошу, коса эрясь Нахор.11Сон лоткафтозень верблюдонзон ошть маласа, эши ваксс. Тя ульсь илять, ся пингть, мзярда аватне лисендихть ведень амолдама.12Покодись мярьгсь: «Азор, Авраам кудазорозень Шкаец! Няфтьк Эсь аф полафни кельгомацень*б Авраам кудазорозти, катк тячи лиси монь тевозе.13Вага мон ащан ведень лихтибрять ваксса, и ошэряйхнень стирьсна курок сайхть ведень амолдама.14Мон мярьган фкяти эздост: "Эняльдян, комафтк кукшенцень и мон симан эздонза". И кда сон мярьги: "Сипть, мон верблюттненьге симдьсайне", – тя ули вчёк ся, конань Тон кочкайть рьвакс Исаак покодицти. Катк тянь коряс мон содаса, Тон няфтить монь кудазорозти Эсь аф полафни кельгомацень».
15Сон нинге ашезе адела корхтаманц, кода сась Ревекка, Вафуилонь стирец. Вафуил ульсь цёракс Нахоронди, Авраамонь брадонцты, и Милканди, Нахоронь рьванцты. Ревеккань лафтубрясонза ульсь ведень амолдама кукшень.16Стирсь ульсь пяк мазы и аляса нинге апак токак. Сон валгсь лихтибряти, пяшкодезе кукшененц и тусь меки.17Авраамонь покодиец ласьксь каршезонза и мярьгсь тейнза: «Эняльдян, макст тейне симомс аф лама ведьта тонь кукшеньцтот».18Сон мярьгсь: «Сипть, азорозе». Сяка пингть стирсь валхтозе кукшенть лафтубрястонза и симдезе сонь.19Мзярда симдезе сонь, мярьгсь: «Мон амолдан ведь тонь верблюттнендиге, катк топодемс симихть».20Сон курокста каязе кукшеньцтонза ведть очкти, тага ласьксь эшити веденкса и амолдась ведь сембе сонь верблюдонзонды.21Алясь ванць стирть мельге и мезевок ашезь корхта, сяс мес мялецоль шарьхкодемс, бславазе Азорсь сонь кинц али аш.
22Мзярда верблюттне лоткасть симомда, алясь сявсь шалхковаряв тонгондови зрнянь пилькс, конань сталмоц ульсь пяле шекель, и зрнянь кафта кядькст, конатнень сталмосна ульсь кемонь зрнянь шекельхть, и максозень синь стирти.23Меле алясь кизефтезе сонь: «Киннят тон стирсь? Азк тейне, аляцень кудса ули тейнек вень ётафтомс васта?»24Сон мярьгсь тейнза: «Мон Вафуилонь стирецан. Сон Нахоронь цёрац, конань Милка шачфтозе тейнза».25И сон нинге мярьгсь: «Минь лама шужярьдонк и пинемдонк, мадомска ули вастоньке».26Эста алясь комась плманжа лангс и сюконясь Азорти,27сон мярьгсь: «Бславаф Азорсь, Авраам кудазорозень Шкаец, кона ашезе када монь кудазорозень, но няфтезе тейнза Эсь аф полафни кельгоманц и видешинц. Азорсь вятезе монь кизень видеста кудазорозень брадонц кудозонза».
28Стирсь ласьксь куду тядянцты и азондозе тейнза, мезе лиссь.29Ревеккань ульсь брадоц, конань лемоцоль Лаван. Лаван эрязста тусь ся ломанти, кона ащесь лихтибрять ваксса.30Мзярда Лаван няезе шалхковарянь пильксть и кядькснень сазоронц кядьса, и мзярда кулезе Ревекка сазоронц эзда сянь, мезе корхтась тейнза ся ломанць, эста Лаван мольсь ся ломанти, кона верблюдонзон мархта ащесь лихтибрять ваксса,31и мярьгсь: «Азорть эзда бславаф ломань, сувак. Мес ащат ушеса? Мон ни аноклань кудсон васта, верблюттнендиге васта аноклань».32И алясь сувась. Лаван прьгафтозень верблюттнень, макссь тейст шужярь и пинем. Аляти и мархтонза саф ломаттненди сон макссь пильгонь штамс ведь.33Меле Авраамонь покодиенцты кандсть ярхцамбяль, но сон мярьгсь: «Мон аф ярхцан, мзярс аф азондса, мезенкса тяза сань». Тейнза мярьгсть: «Азонтк».
34Сон мярьгсь: «Мон Авраамонь покодиецан.35Азорсь пяк козяста бславазе монь кудазорозень, и сон тиевсь оцю и козя ломанькс. Азорсь макссь тейнза учат и букат, сия и зрня, аляурет и аваурет, верблютт и ишипт.36Сарра, кудазорозень рьвац, сиреста шачфтсь кудазорозти цёра, конанди сон максозе сембонц, мезец ули.37Кудазорозе сявсь кядьстон варамань вал и мярьгсь: "Тят сявонде цёразти рьвя ханаанейхнень стирьснон эзда, конатнень модасост мон эрян,38но архт алязень кудозонза, монь юромозон, и тоста сяфть рьвя монь цёразти".39Мон мярьгонь кудазорозти: "А кда стирть аф ули мялец молемс мархтон?"40Сон мярьгсь каршезон: "Азорсь, конань инголе мон якан, кучсы мархтот Эсь ангелонц и ладясы тонь кицень. И тон сяват цёразти рьвя монь юромстон, алязень кудстонза.41Тон улят нолдаф варамацень эзда, кда тейть аф макссазь стирть, мзярда тон саят монь юромозон. Аньцек эста тон улят нолдаф варамацень эзда".
42Тячи, эшити пачкодемста мон мярьгонь: "Азор, Авраам кудазорозень Шкаец! Эняльдян Тейть, ладяк монь кизень.43Вага, тяни мон ащан ведень лихтибрять ваксса. Мзярда сей сай стирь ведень амолдама, мон мярьган: 'Эняльдян, макст тейне симомс кукшеньцтот',44и кда сон мярьги тейне: 'Сипть, мон верблюттнендиге амолдан ведь', – тя ули вчёк ся, конань Азорсь кочказе рьвакс кудазорозень цёранцты.45Мон нинге ашень лотка эсь пачкан корхтамда, кода лиссь Ревекка и кукшенец лафтубрясонзоль. Сон валгсь лихтибряти и амолдась ведь. Мон мярьгонь тейнза: "Эняльдян, макст тейне симомс".46Сон эстокиге валхтозе кукшенть лафтубрястонза и мярьгсь: "Сипть, мон верблюттненьге симдьсайне". Мон симонь, и сон верблюдоненьге симдезень.47Мон кизефтине сонь: "Киннят тон стирсь?" Сон мярьгсь: "Мон Вафуилонь стирецан. Сон Нахоронь цёрац, конань Милка шачфтозе тейнза". Эста мон щафтонь шалхковарязонза пилькс и кядензонды кядькст,48и комань плманжа лангс сюконяма Азорти. Мон шнайне Азорть, Авраам кудазорозень Шкаенц, кона видеста вятемань монь сей – сявомс кудазорозень брадонц стиренц сонь цёранцты рьвакс.49Тяни азость тейне: тинь ули мяленте тиемс кудазорозти пара и пяшкодемс сонь мяленц? Азость тейне, тейне эряви содамс, кода улемс сяда тов».
50Лаван и Вафуил мярьгсть каршезонза: «Тя тевсь сась Азорть эзда, тейнек аш кода мярьгомс тонь каршезт аф кальдяв, аф цебярь.51Вага Ревекка инголет, сявк сонь и архт. Катк сон ули рьвакс кудазорцень цёранцты, кода мярьгсь Азорсь».52Мзярда Авраамонь покодиец кулезень ня валхнень, сон сюконясь Азорти модать видес.53Меле сон таргась сиянь и зрнянь паршихть и щапт, и максозень Ревекканди. Тяконь лаца брадонцтывок и тядянцтывок сон макссь козя казнет.54Сон и ся алятне, конат ульсть мархтонза, ярхцасть и симсть, и лядсть тоса удома. Шобдава, мзярда синь стясть, покодись мярьгсь: «Нолдамасть монь кудазорозти».55Но Ревеккань брадоц и тядяц мярьгсть: «Катк стиреньке ащи мархтонк хуш кемоньшка ши, и меле туй».56Но покодись мярьгсь тейст: «Тямасть кирне, сяс мес Азорсь ладязе монь кизень. Нолдамасть, мон туян эсь кудазорозти».57Синь мярьгсть: «Тердьсаськ тяза стирть и кизефтсаськ сонь мяленц».58Синь тердезь Ревеккань и кизефтезь сонь: «Молят тя ломанть мархта?» Сон мярьгсь: «Молян».59Эста синь нолдазь кис Ревекка сазорснон, тейнза покоди авать, кона потяфнезе сонь, Авраамонь покодиенц и сонь ломанензон.60Синь бславазь Ревеккань и мярьгсть тейнза:
«Сазороньке! Катк тонь эздот шачихть
тёжянь тёжятть,
и катк тонь юромонь поладыхне кармайхть азорондама
каршек молихнень ошснон лангса!»
61Меле Ревекка и тейнза покоди аватне озасть верблюттнень лангс и тусть Авраамонь покодиенц мельге. Тяфта Авраамонь покодиец сявозе Ревеккань и тусь.62А Исаак сась Беэр-лахай-роиста, сон эста эрясь Ханаанть лямбе ширесонза.63Илять Исаак лиссь паксяв арьсеманзон арьсема, и мзярда сон кеподезень сельмонзон, няйсь малаткшни верблютт.64Ревекка варжакстсь, няезе Исааконь и валгсь верблюдть лангста.65Сон кизефтезе покодить: «Кие тя ломанць, кона моли паксява минь каршезонк?» Покодись мярьгсь: «Тя монь азорозе». Эста Ревекка сявсь вельхтерда и кяшезе шаманц.66Покодись азондозе Исааконди семботь, мезе сон тись.67Исаак сувафтозе Ревеккань кошу, кона ульсь сонь тядянц, Сарранне, и сявозе сонь рьвакс. Исаак кельгозе Ревеккань и тяфта сонь седиец ваймафтовсь-кемокставсь тядянц куломанц меле.
*а 24:2 сюрок – бедро
*б 24:12 аф полафни кельгома – тя кельгома, кона кирдьсы валонц; неизменная любовь
Глава 24