Выбрать язык
Книги Ветхого Завета
Книги Нового Завета
с русским текстом1Сарра эрясь сяда комсь сисем киза. Нят ульсть Саррань эряма кизонза.2Сон кулось Кириаф-Арбаса. Тяни тя вастсь лемневи Хевронкс, кона Ханаанонь модаса. Авраам мольсь Саррань явсема, и авардсь вельхкссонза.3Меле Авраам стясь кулоф рьванц ваксста, мольсь хеттейхненди и мярьгсь:4«Мон тинь модасонт ширде саф ломанян, омба мастороннян. Максода тейне модасонт васта калмонди, тейне эряви калмамс кулоф рьвязе».5Хеттейхне мярьгсть каршезонза:6«Азор, кулхцондомасть. Тон минь ётксонк Шкаень оцюнят. Калмак кулоф рьвяцень сембода цебярь калмонь вастсонк. Минь эздонк кивок аф шарфты эняльдемацень эзда, минь макстама тейть калмонь васта рьвяцень калмамс».7Авраам стясь, сюконясь хеттейхненди, ся модань ломаттненди,8и мярьгсь тейст: «Кда тинь макстада тейне калмамс кулоф рьвязень, эста кулхцондомасть монь и эняльдеда инксон Ефрононь инголе, кона Цохаронь цёрац,9катк сон мисы тейне Махпела кевботмаронц, кона пакся песонза, араза тя кевботмарсь монь юромозти калмонь вастокс тинь ётксонт. Мон рамалине сонь ладяф питнеда».10А Ефрон озафоль хеттейхнень ёткса, ошень ортатнень ваксса. Сон кайгиста пшкядсь Авраамонди сембе хеттейхнень ингольде, конат пуромсть тоса, и мярьгсь:11«Аф, азорозе, кулхцондомак монь. Мон ярмакфтома максса тейть ся паксять и кевботмарть, кона лангсонза. Мон максса сонь тейть ломаньтналозень сельминголенза. Калмак тоса кулоф рьвяцень».12Авраам сюконясь ся модань ломаттнень инголе13и кайгиста корхтась Ефрононди ся модань ломаттнень ингольде: «Кулхцондомак монь. Мон максан тейть паксять инкса сиянь ярмак, сявк сонь кядьстон, и эста мон калмаса тоса кулоф рьвязень».14Ефрон мярьгсь Авраамонь валонзон каршес:15«Азорозе, кулхцондомак. Тя модать питнец ниле сятт сиянь шекель*а. Дяряй тя лама тейне и тейтьке? Калмак кулоф рьвяцень».16Авраам кулхцондозе Ефрононь корхтаманц и ункстась тейнза сняра сия, мзяра сон азсь хеттейхнень ингольде: ниле сятт сиянь шекельхть, конат нолявсть тевс мишендихнень-рамсихнень ёткса.
17Тяфта Ефрононь паксяц, кона Махпеласа Мамреть ваксса, и кевботмарсь, кона лангсонза, и сембе шуфттне, конат паксять лангсот и перьфканзот,18ётасть Авраамонь кядьс. Тянь няезь сембе хеттейхне, конат пуромсть ошень ортатнень ваксс.19Тяда меле Авраам калмазе Саррань, эсь рьванц, кевботмарса, кона ащи Махпелань паксяса, Мамреть ваксса Ханаанонь модаса. Тяни тя вастсь лемневи Хевронкс.20Тяфта тя паксясь и лангстонза кевботмарсь хеттейхнень кядьста ётасть Авраамонди, и сон тиезе сонь эсь юромонцты калма вастокс.
*а 23:15 Шекель – тя сталмонь ункстама мера. Пингонь ётазь тяфта кармасть лемнемост ярмакнень. 400 шекель – тя сия, конань сталмоц ульсь 4,6 килат. Тя ульсь пяк оцю питне.
Глава 23