Выбрать язык
Книги Ветхого Завета
Книги Нового Завета
с русским текстом1Азорсь эвондась Авраамонди Мамре тумоналть ваксса. Авраам шиньгучкань псить пингста озафоль кошенцты сувама вастть ваксса,2и мзярда сон кеподезень сельмонзон, няйсь колма алят, конат ащесть инголенза. Синь няемстост Авраам кошенц эзда ласьксь каршезост, сюконясь инголест модать видес3и мярьгсь: «Азорозе! Кда тонь мяльце ладяф тейне, эста тят ёта покодицень вакска.4Мяленте, мон мярьган кандомс тейнть пильгонь штамс ведь? Тинь вайматада тя шуфтть ала,5а мон ся пингть кандан кши, тинь кочкатада вийхть и меле поладсасть кинтень, – вдь тянкса тинь и суваде эсь покодиентень пяли». Синь мярьгсть: «Пара, тик сянь, мезе мярьготь».
6Авраам эрязста сувась Сарранди кошу и мярьгсь: «Куроконе сяфть колма парьхть сембода цебярь почф, ичт шапакс и пидек кшит».7Меле Авраам ласьксь стаданцты, сявсь тоста фкя од и куя вазня, максозе покодити, и ся эстокиге ушедсь аноклама эздонза ярхцамбяль.8Авраам путсь конакнень инголи скалвай, лофца и пидеф-рястаф вазня, и мзярс синь ярхцасть, сон ащесь вакссост шуфтть ала.
9Синь кизефтезь Авраамонь: «Коса тонь рьвяце Сарра?» Авраам мярьгсь: «Тяса, кошть потмоса».10Фкясь эздост мярьгсь: «Сай кизоть тяка пингть Мон тага саян тейть и эста Саррань, тонь рьвяцень, кармай цёраняц». А Сарра ся пингть ащесь тя ломанть фтала, кошу сувама вастть ваксса, и кулхцондсь.11Авраам и Сарра ульсть пяк сирет, и Саррань ашельхть ни авань виенза шабань шачфтомс.12Сарра потмова пеедезевсь и мярьгсь эсь пачканза: «Сиредень мон, дяряй ашезь ёта мирде мархта кеняртькшнемань пингозе? Мирдезевок сире ни».13Но Азорсь мярьгсь Авраамонди: «Мес Сарра пеедезевсь и мярьгсь: "Дяряй мон, сиресь, шачфтован?"14Дяряй Азорти ули аф тиеви тев? Сай кизоть тяка пингть Мон мрдан тейть, и Саррань кармай цёраняц».15Сарра ашезь виденця, сяс мес пяк эводсь, аньцек мярьгсь: «Мон ашень пееде». Но Сон мярьгсь: «Аф, тон пеедеть».
16Конакне стясть и срхкасть тума Содому. Авраам лиссь мархтост, прважамост.17Азорсь мярьгсь: «Дяряй сёпса Авраамонь эзда сянь, мезе мялезе тиемс?18Вдь Авраамонь эзда лиси оцю и вии ломаньтнал, и Авраамонь вельде бслававихть масторлангонь сембе ломаньтналхне.19Тянкса Мон кочкайне сонь: катк сон кошардсыне-тонафтсыне эсь идензон и сембе юромонь поладыензон якамс Азорть киганза, эрямс видексшиса и тиендемс видеста».20Азорсь мярьгсь: «Пешкодыхть-пеняцяйхть Содомть и Гоморрать лангс, сяс мес пяк стакат синь пежесна.21Валган и ванца, и карман содамонза: афкукс синь тиендьсазь сембонь сянь, мезень колга Мон кулян авардемат-пешкодомат, али аф?»
22Алятне шарфтсть тоста и тусть Содому, но Авраам лядсь ащема Азорть инголе.23Авраам нежедсь Тейнза и мярьгсь: «Дяряй Тон машфтсак видексшинь ломанть зиянонь тиить мархта?24Улендяряй тя ошса ведьгемонь видексшинь ломань, дяряй Тон сяка машфтсак сонь и аф ужяльдьсак тя вастть ня видексшинь ломаттнень инкса?25Тянди аш кода улемс. Тон аф машфтсак видексшинь ломанть зиянонь тиить мархта. Тон аф тият фкя лаца видексшинь ломанть мархта и зиянонь тиить мархта. Тон тяфта аф тият! Дяряй марнек масторлангонь Судьясь тиенди аф видеста?»26Азорсь мярьгсь: «Кда Мон муян Содом ошса ведьгемонь видексшинь ломань, эста Мон ужяльдьса сембе ся вастть синь инксост».
27Авраам мярьгсь каршезонза: «Мон аньцек пулян и кулуван, но сяка аф пелезеван корхтамс Азорозти.28А кда ведьгемонти синь аф саты вете ломаньцна, дяряй сянкса, мес аф сатни вете ломатть, Тон машфтсак сембе ошть?» Азорсь мярьгсь: «Аф машфтса, кда муян тоса нильгемонь вете видексшинь ломань».29Авраам ашезь лотка корхтамда Азорти, мярьгсь: «А кда тоса муви аньцек нильгемонь?» Азорсь мярьгсь: «Ня нильгемоттненьге инкса Мон аф тиса тянь».30Авраам мярьгсь: «Азорозе, тяйть сафта кяшнень, мес мон нинге карман корхтама. А кда тоса муви колмогемонь видексшинь ломань?» Сон мярьгсь: «Аф тиса тянь, кда муян тоса колмогемонь».31Авраам мярьгсь: «Мон аф пелезеван тага корхтамс Азорозти. А кда тоса муви комсь ломань?» Сон мярьгсь каршезонза: «Комсь видексшинь ломань инкса Мон ванфтса ошть машфтомада».32Авраам мярьгсь: «Азорозе, тяйть сафта кяшнень, тя ули мекольце кизефксозе. Кда тоса эздост ули аньцек кемонь?» Азорсь мярьгсь: «Ня кемоттнень инкса Мон ванфтса ошть машфтомада».33Авраамонь мархта корхтамда меле Азорсь тусь тоста, а Авраам мрдась кудозонза.
Глава 18