Выбрать язык
Книги Ветхого Завета
Книги Нового Завета
с русским текстом1Ся пинкнень сембе масторть лангса ульсь фкя кяль и фкя лацонь корхтама.2Мзярда ломаттне лиссть шинь стяма ширдень модаста и ётнесть фкя вастста омбоцети, синь мусть Сеннаар модаса арся*а васта и лоткасть тоса эряма.3Синь мярьгсть фкя-фкянди: «Эрьда тихтяма сёвоньцта кирпицть и кемокстасаськ синь толса». Кирпицне арасть тейст кев вастс, а модавайсь*б кирпицень кирди пурть вастс.4Синь мярьгсть: «Эрьда тихтяма эстейнек ош и башня, конань серец токай менельти. Тянь вельде минь тихтяма эстейнек оцю лем, и аф срафтофтама масторть келес».
5Азорсь валгсь ошть и башнять ванома, конатнень тиезь ломаттне,6и мярьгсь: «Вага, синь фкя ломаньтнал, и сембе корхтайхть фкя кяльса. И тя синь аньцек ушедозь эсь тевснон. Мезе прязост афоль са, сембось тейст тиеви.7Аде валктама тейст и шорясаськ кяльснон, афольхть шарьхкоде фкя-фкянь».8И Азорсь срафтозень тоста ломаттнень сембе масторть келес. Тяфта синь лоткасть ошень тиема.9Сяс тя ошсь лемневи Вавилонкс*в, вдь тоса Азорсь шорязень сембе масторлангонь ломаттнень кяльснон, и тоста срафтозень ломаттнень сембе масторть келес.
10Тя азкссь Симонь юромонь поладыензон колга. Симонди ульсь сяда киза, мзярда сонь шачсь цёрац Арфаксад. Тя ульсь шадода меле, кафта кизонь ётазь.11Арфаксадонь шачемдонза меле Сим эрясь вете сятт киза, и сонь нинге шачсть цёранза и стиренза.
12Арфаксад эрясь колмогемонь вете киза и сонь шачсь цёрац Сала.13Салань шачемдонза меле Арфаксад эрясь ниле сятт колма киза, и сонь нинге шачсть цёранза и стиренза.
14Мзярда Саланди ульсь колмогемонь киза, сонь шачсь цёрац Евер.15Еверонь шачемдонза меле Сала эрясь ниле сятт колма киза, и сонь нинге шачсть цёранза и стиренза.
16Мзярда Еверонди ульсь колмогемонь ниле киза, сонь шачсь цёрац Фалек.17Фалеконь шачемдонза меле Евер эрясь ниле сятт колмогемонь киза, и сонь нинге шачсть цёранза и стиренза.
18Мзярда Фалеконди ульсь колмогемонь киза, сонь шачсь цёрац Рагав.19Рагавонь шачемдонза меле Фалек эрясь кафта сятт вейхкса киза, и сонь нинге шачсть цёранза и стиренза.
20Мзярда Рагавонди ульсь колмогемонь кафта киза, сонь шачсь цёрац Серух.21Серухонь шачемдонза меле Рагав эрясь кафта сятт сисем киза, и сонь нинге шачсть цёранза и стиренза.
22Мзярда Серухонди ульсь колмогемонь киза, сонь шачсь цёрац Нахор.23Нахоронь шачемдонза меле Серух эрясь кафта сятт киза, и сонь нинге шачсть цёранза и стиренза.
24Мзярда Нахоронди ульсь комсь вейхкса киза, сонь шачсь цёрац Фарра.25Фаррань шачемдонза меле Нахор эрясь сяда кевейхксые киза, и сонь нинге шачсть цёранза и стиренза.
26Мзярда Фарранди ульсь сизьгемонь киза, сонь шачсть цёранза: Аврам, Нахор и Аран.
27Тя азкссь Фаррань юромонь поладыензон колга. Фаррань шачсть цёранза Аврам, Нахор и Аран. Аранонь шачсь цёрац Лот.28Аран кулось Халдеень Урса, нинге мзярда Фарра, сонь аляц, ульсь шиса.29Аврам и Нахор рьвяясть. Аврамонь рьванц лемоц ульсь Сара, а Нахоронь рьванц – Милка, тя Аранонь стирец. Аран – тя Милкань и Искань алясна.30Сара изь пекиякшне, сонь ашельхть иденза.31Фарра сявозе Аврам цёранц, Лот уноконц – Аранонь цёранц, и Сара рьвянянц – Аврам цёранц рьванц, и лиссь мархтост Халдеень Урста. Сонь мялецоль тумс Ханаанонь модав, но Харрану пачкодемста синь лоткасть тоза эряма.32Фарра эрясь кафта сятт вете киза, и кулось Харранца.
*а 11:2 арся – ровный, гладкий; арся васта – равнина
*б 11:3 модавай – земляная смола, нефтяная смола
*в 11:9 Вавилон валсь евреень кяльса мала «шорямс» валть мархта.
Глава 11