Выбрать язык
Книги Ветхого Завета
Книги Нового Завета
с русским текстом1Мзярда ломаттне кармасть ламолгодома масторлангса и синь шачендсть стирьсна,2эста Шкаень цёратне няезь ломанень стирьхнень мазышиснон, и сявондезь синь эстейст рьвакс, кинди кона мялезонзоль.3Азорсь мярьгсь: «Монь Ваймопожфозе ули ломанть эса аф пефтома, сяс мес ломанть ронгоц и ваймоц колафт; катк сонь эряфонц кувалмоц ули сяда комсь киза».4Ся пингоня и сяда мелевок масторлангса ульсть пяк сери и вии ломатть, сяс мес Шкаень цёратне кармасть сашендома ломанень стирьхненди, а сят кармасть шачфнема эздост шабат. Нят вии и кунардонь пингста содаф ломатть.
5Азорсь няезе: ломаттнень эзда пяк лама кяжда масторлангса, и синь мяльсна-арьсемасна фалу тиендемс аньцек кальдяв.6Сяс Азорсь каендась, мес тись ломань масторлангса, и седиец пяшкодсь ризфта.7И Азорсь мярьгсь: «Мон машфтсайне масторть лангста ломаттнень, конатнень тиине. Ломаттнень мархта машфтсайне жувататнень, куйхнень-ёзмолдыхнень и менелень нармоттнень, сяс мес Мон каендань, мес тиине синь».8Но Ной тусь Азорть мяльс и сатозе Сонь пара мяленц.
9Тя азкссь Ноень колга. Ся пингонь ломаттнень ёткса Ной ульсь видексшинь*а и афсатыксфтома*б ломанькс; сонь эряфоц сотфоль Шкайть мархта.10Ноень шачсть колма цёранза: Сим, Хам и Иафет.11Масторсь колавсь-гастявсь Шкайть сельминголенза и пяшкодсь веронь валомаса.12Шкайсь варжакстсь масторть лангс и няезе: сон колавсь-гастявсь, сяс мес масторлангонь сембе эряйхне тусть нулготьксонь киге.
13Шкайсь мярьгсь Ноенди: «Мон сань мяльс машфтомс сембонь, кие эряй масторть лангса, сяс мес синь инксост масторлангсь пяшкодсь веронь валомаса. Мон машфтсайне синь масторть лангста.14Тик эстейть оцю венч гофер шуфтста. Венчть потмоса тик перяфкст, а лангонц и потмонц вадить кяшеса.15Tик oцю венчть тяфта: катк кувалмоц ули колма сятт кенерь*в, келец – ведьгемонь кенерь, а серец – колмогемонь кенерь.16Тик оцю венчса ётка, кеподемок вельхксть фкя кенерь лангс стенатнень эзда, а венчть бокса тик кенкш. Венчть потмоса тик колма яруст.17Ватт, Мон кучан масторть лангс оцюдонга оцю шада менель ала сембе эряйхнень машфтоманкса; масторлангса сембось ули машфтф.18Но тонь мархтот Мон ладяса Эсь сотксозень*г. Тейть сувама оцю венчти и сявомат мархтот цёратне, рьвяце и цёратнень рьвасна.19Тяфта жа сяфть мархтот оцю венчть потмос сембе жувататнень и сембе эряй ваймотнень эзда кафтонь: атяжувата и аважувата, лядост шиса тонь мархтот.20Тейть сайхть нармоттне эсь юромснон коряс, кудонь жувататне эсь юромснон коряс и модава шашни сембе жувататне эсь юромснон коряс кафтонь-кафтонь, и тянь вельде лядыхть шиса.21Кочкак ламоня эрь кодама ярхцамбяль и сявк мархтот, улеза мезе ярхцамс эстейтьке, тейстка».22Ной тиезе семботь тянь. Кода Шкайсь мярьгсь, тяфта сон и тиезе.
*а 6:9 видексшинь – праведный
*б 6:9 афсатыксфтома – без недостатков, совершенный, непорочный
*в 6:15 Кенерь – кувалмонь ункстама, 45 см. малава. Лисенди, оцю венчть кувалмоц, келец и серец ульсть 135x22x13 м.
*г 6:18 соткс – тяса: договор, завет; ладямс соткс – заключить договор, завет
Глава 6