Выбрать язык
Книги Ветхого Завета
Книги Нового Завета
с русским текстом1Азорсь мярьгсь Ноенди: «Сувак оцю венчти сембе кудэряйхнень мархта. Мон няйса, тяниень эряйхнень ёткста аньцек тон видексшинь ломанят Монь инголен.2Сяфть мархтот сембе ару жувататнень*а эзда сисемонь атяжувата и сисемонь аважувата, а аф ару жувататнень эзда тифтень атяжувата и тифтень аважувата;3менелень нармоттненьге эзда сисемонь атякш и сисемонь авакш, ванфтовоза синь юромсна марнек масторть лангса.4Сисем шида меле Мон кучан масторть лангс пизем, кона кармай молема нильгемонь ши и нильгемонь ве; и машфтсайне масторть лангста сембе эряйхнень, конатнень Мон тиине».5Ной тиезе семботь, мезе мярьгсь Азорсь.
6Ноенди ульсь кота сятт киза, мзярда оцю шадось сась масторть лангс.7Ной, сонь цёранза, рьвац и цёранзон рьвасна сувасть оцю венчти и кяшевсть шада веттнень эзда.8Тяфта жа ару и аф ару жувататне, и модава шашни сембе жувататне9састь Ноенди и кафтонь-кафтонь сувасть оцю венчть потмос: атяжувата и аважувата, кода Шкайсь мярьгсь Ноенди.
10Сисем шида меле шада веттне састь масторть лангс.11Ся кизоть, мзярда Ноенди топодсь кота сятт киза, кизоть омбоце ковстонза и ковть кемзисемце шистонза, почкодсть модапотмонь сембе крхка веттне, и панжевсть менелень вальмятне.12И пизесь масторть лангс нильгемонь ши и нильгемонь ве.13Сяка шиня Ной сувась оцю венчезонза, и мархтонза цёранза: Сим, Хам и Иафет, рьвац и цёранзон рьвасна.14Синь мархтост сувасть сембе жувататне эсь юромснон коряс, сембе кудонь жувататне эсь юромснон коряс, сембе куйхне-ёзмолдыхне, конат шашнихть модава, эсь юромснон коряс, сембе лиендихне эсь юромснон коряс, сембе нармоттне и паця мархтотне.15Синь сувасть Ноень оцю венчезонза кафтонь-кафтонь эрь жуватать эзда, конань эса ули эряфонь ваймопожф.16Кода Шкайсь и мярьгсь Ноенди, оцю венчть потмос сувасть эрь жуватать эзда атяжувата и аважувата. Сонць Азорсь пякстазе кенкшть Ноень мельге.
17Нильгемонь ши ульсь оцю шада масторлангса. Веттне ламолгодсть и кеподезь оцю венчть, и ся кеподсь модать лангста оцю серес.18Веттне вииякшнесть и ваяфнезь модалангть, и оцю венчсь уендсь веттнень ланга.19Шада веттне сяшкава вииясть, нльне вельхтявсть сембе сери панттне, конат улихть марнек менельть ала.20Веттне вииясть и кеподсть вельхкссост кеветие кенерьс, и панттне кяшевсть ведьса.21И кулось сембе эряйсь, кона якась модава: нармоттне, кудонь жувататне, вирьбаксянь жувататне, модава шашни сембе куйхне-ёзмолдыхне и сембе ломаттне.22Сембе, кит эрясть модать коське пялькссонза и кит тарксезь ваймоснон, кулость.23Тяфта модать лангстонза машфтовсь сембе эряйсь: ломаттне, жувататне, куйхне-ёзмолдыхне и нармоттне – сембось ульсь машфтф модать лангста. Шиса илядсь аньцек Ной и сят, кит ульсть мархтонза оцю венчса.24Модась ульсь ведть ала сяда ведьгемонь ши.
*а 7:2 Кода мярьгсь Шкайсь (еврейхненди), улихть ару и аф ару жуватат. Ару жувататнень эзда ярхцсесть и каннезь озксказненди. Сяда лама тянь колга сёрматф Моисеень колмоце книгасонза (Левит) 11 главаса.
Глава 7