Выбрать язык
Книги Ветхого Завета
Книги Нового Завета
с русским текстом1Куйсь ульсь сембода ёжукс сембе паксянь жувататнень ёткста, конатнень тиезень Азор Шкайсь. Куйсь кизефтезе авать: «Шкайсь афкукс мярьгсь: "Тяда ярхца фкявок шуфтста тя переса"?»2Авась мярьгсь куйти: «Сембе шуфттнень эзда мярьгондеви ярхцамс,3аньцек ся шуфтста, кона переть кучкаса, Шкайсь мярьгсь аф ярхцамс и афи токсемс иможензон, афток кулотама».4«Аф, тинь аф кулотада, – мярьгсь куйсь авати,5– но Шкайсь содасы: ся шиня, мзярда тинь ярхцатада эздост, панжевихть сельмонте, и тинь аратада кода шкайхть и карматада содамонза, мезе стамсь цебярсь и кальдявсь».6Авась няезе, ся шуфтса имошне цебярьхть ярхцамс, ланга ванозь синь мазыхть и пяк мялень салайхть, сяс мес максыхть смузьши. Сон сязсь ся шуфтста имож и ярхцась эздонза; макссь мирденцтывок, и сонга ярхцась.7Эста кафцьконь панжевсть сельмосна, и шарьхкодсть – синь крхтапат. Синь сотсть марс инжир шуфтонь лопат и мархтост вельхтязь перьфснон.
8Мзярда уфазевсь илядень варманясь, синь кулезь, кода Азор Шкайсь якай Эдемонь переса. Адам и сонь рьвац кяшсть Азор Шкайть эзда перень шуфттнень ёткс.9Азор Шкайсь тердезе Адамонь: «Адам, косат?»10Сон мярьгсь каршезонза: «Мон кулине Тонь вайгяльцень переса и эводень; мон кяшень, сяс мес крхтапан».11Азор Шкайсь мярьгсь: «Кие азозе тейть – тон крхтапат? Афоли тон ярхцать ся шуфтста, конань эзда Мон кардайхтень ярхцамс?»12Адам мярьгсь: «Авась, конань Тон максыть тейне мархтон эряманди, тя сон макссь тейне имож ся шуфтста, и мон ярхцань».13Эста Азор Шкайсь мярьгсь авати: «Мезе тон тиеть?» Авась мярьгсь: «Куйсь васькафтомань, и мон ярхцань».
14Азор Шкайсь мярьгсь куйти:
«Сянкса, мес тиить тянь,
тон сембода пяк улят сюдоф сембе кудонь жувататнень
и сембе вирьбаксянь жувататнень ёткса;
тон кармат шашнема пекцень лангса
и эряфоньберьф кармат ярхцама пульда.
15Мон тиян кяжбе
тонь и авать ёткса,
тонь юромонь поладыхнень и сонь юромонь поладыензон ёткса;
сонь юромонь поладыец тапасы тонь пряцень,
а тон пупасак сонь кочкяряти*б».
16Авати Шкайсь мярьгсь:
«Мон пяк касфтса пеке кандомань маятамацень;
сярятьфонь кирдезь кармат шачфнемост шабатнень.
Мирдцти педезь педи сембе мяльце,
и сон кармай азорондама лангсот».
17Адамонди Шкайсь мярьгсь:
«Сяс мес тон кулхцондыть рьвяцень и ярхцать шуфтста,
конань эзда Мон кардайхтень ярхцамс,
масторсь сюдовсь тонь инксот.
Тон эряфоньберьф кармат маятазь сатнема эздонза ярхцамбяль.
18Модась раштай тейть сялги тишет и кумбарафт,
и тон кармат ярхцама паксянь тишеда.
19Ливозьботмоса кармат сатнемонза кшицень,
мзярс аф мрдат меки модати,
конань эзда улеть сявф.
Пульста тон тифат
и пульти меки мрдат».
20Адам лемдезе рьванц Евакс*в, сяс мес сон арась тядякс сембе эряйхненди.21Азор Шкайсь тись Адамонди и сонь рьванцты кедень щапт, и щафтозень лангозост.
22Азор Шкайсь мярьгсь: «Вага, содамок цебярть и кальдявть, Адам арась кода эздонк фкясь. Кода ба тяни сон афолезе венепте кяденц и афоль сязе нинге ся шуфтстонга, кона максы эряф, и ярхцамок эздонза, афоль ара пефтома эряйкс».23Сяс Азор Шкайсь панезе ломанть Эдемонь переста соксемс-витцемс модать, конань эзда сон сявфоль.24Сон панезе Адамонь, а Эдемонь переть шинь стяма ширезонза путсь херувипт-ангелхт и толонь юрнай-шаронды тор*г; путозень синь ванфтомс кить, кона вяти эрямань шуфтти.
*а 3:0 пежес сувамась – грехопадение
*б 3:15 Тя вастсь валда-валс ётафневи: «Мон тиян кяжбе тонь и авать ёткса, тонь видьмоцень и сонь видьмонц (али: Видьмонц) ёткса; сон (али: Сон) тапасы тонь пряцень, а тон пупасак сонь (али: Сонь) кочкяряти».
*а 3:20 Евреень кяльса «ева» валсь пяк мала «эряма» валть мархта.
*б 3:24 тор – меч
Глава 3