Библия
Выбрать язык
Книги Ветхого Завета
Книги Нового Завета
с русским текстом
ПРОРОК СОФОНИЙЫН КНИГАЖЕ
3 Глава
1 Ойго тылат, Иерусалим! 9 Израильын утаралт кодшыжо-влак угыч тӱзланат. 14 Куан муро.1 Ойго амыргыше да шакшылалтше, пызырен илыше олалан!
2 Нимогай ойым тудо ок колышт,
шылталымым шотыш ок нал,
Господьлан ок инане,
шке Юмыж деке ок тол.
3 Вуйлатышыже-влак ырлыше лев улыт,
судьяже-влак – йӱд пире тӱча,
эр марте лу падырашымат огыт кодо.
4 Пророкшо-влак – шотдымо еҥ-шамыч,
нуно ӱшанле огытыл,
а иерейже-влак чыла святойым шакшылат,
законым лавыраш тошкат.
5 Но тиде олаште Господь – чын ыштыше,
Тудо чындымылыкым ок ыште.
Кажне кечын шке чын судшым волгыдо семын колта,
эр гычак тӱҥалын, судитлен шога.
Но осалым ыштыше еҥ намысым ок пале.
6 «Пытаренам Мый калык-влакым,
нунын чоткыдо карманышт шалатыме.
Уремлаштым Мый яраш коденам,
нунын дене ок кошт нигӧ.
Олашт лийын пуста,
кодын огыл тушто илыше, нигӧ уке.
7 Мый шоненам: тый Мый дечем лӱдат,
шылталымем ушышкет пыштет.
Тунам пӧртет-влак пытарыме огыт лий ыле,
Мый тыйым мут кучаш ом шогалте ыле.
Но тый осал пашатым эшеат тыршен ыштенат.
8 Сандене Мыйым вучыза, – ойла Господь, –
тудо кече марте, кунам Мый титаклыше семын кынелам,
вет Мый калык-влакым погаш,
кугыжаныш-влакым ӱжын чумыраш
да нунын ӱмбаке кугу шыдем, шке сырымем опталаш
шонен пыштенам.
Мыйын шыдемын тулжо уло мландым йӱлалта!
9 Мый калык-влакын умшаштым арум ыштем,
тунам нуно Господьын лӱмжым ӱжын кумалаш
да Тудлан ик ой дене служитлаш тӱҥалыт.
10 Эфиопийысе эҥер-влак вес вечын
Мыйым шотлен илыше-шамыч,
шалатен колтымо калыкем,
кондат Мылам пӧлекым.
11 Мо дене ондак ончылнем сулыкыш пуренат,
тидын дене тудо кечын намысыш от пуро,
вет тунам Мый тыйын кокла гыч
кугешныше ден тырга-влакым кораҥдем,
да Мыйын святой курыкыштем тетла тый от кугешне.
12 Мый тыйын коклаштет йорло да ӱҥышӧ калыкым кодем,
нуно Господьын лӱмжылан инанаш тӱҥалыт.
13 Израильын утаралт кодшыжо-влак
осалым ышташ, шоякым ойлаш огыт тӱҥал,
нунын умшаштышт ондалчык ок лий.
Нуно шорык семын кочкын кошташ
да ласкан канаш тӱҥалыт,
ок лӱдыктӧ нуным нигӧ».
14 Йывырте, Сион ӱдыр,
куанен кычкыре, Израиль!
Уло чонет дене веселитле, Иерусалим ӱдыр!
15 Господь тылат лукмо суд пунчалжым вашталтен,
тушманетым поктен колтен.
Господь, Израильын кугыжаже, пеленет:
тетла ок кӱл тылат туткар дечын лӱдаш.
16 Тудо кечын Иерусалимлан каласат:
«Ит лӱд, Сион, кидет ынже лушко!»
17 Господь Юмет – тыйын коклаште,
Тудо куатан да конда сеҥымашым.
Тудо тыланет чот куана,
шке йӧратымашыж дене тыйым уэмда,
тыйын шотышто куанен йывырта.
18 «Пайрем укелан кӧра ойгырышо-влакым Мый погем.
Нуно тый дечет умбалне улыт,
нуным намыс темдалын.
*а19 Шыгыремдыше-влакетым тунам Мый мут кучаш шогалтем,
окшаклыше-шамычым утарем,
шалатен колтымо-влакым погем.
Чыла вере нуно чапыште да пагалымаште лийыт,
эсогыл ондак намыслалт илыме мландыштат.
20 Тунам Мый тендам погем да кондем,
мландымбалысе чыла калык коклаште
тыланда чап ден пагалымашым пуэм.
Кунам Мый тендам плен гыч пӧртылтем,
тидым те шке шинчада дене ужыда», – ойла Господь.
*а 3:18 Еврей текстыште тыште мом возымым умылаш неле.
Глава 3
