Библия
Выбрать язык
Книги Ветхого Завета
Книги Нового Завета
с русским текстом
ПРОРОК СОФОНИЙЫН КНИГАЖЕ
2 Глава
1 Господь деке савырныза! 4 Йыр улшо калык-влаклан Господь судым ышта.1 Погыно, чумырго, намысдыме калык,
2 кунам палемдыме кече,
арва семын чоҥештен толшо кече эше шуын огыл,
кунам Господьын йӱлышӧ шыдыже эше толын огыл,
Господьын шыде кечыже ӱмбакыда эше возын огыл!
3 А те, мландымбалысе ӱҥышӧ еҥ-влак,
Господьын чынлыкшым шуктен шогышо-шамыч,
Господьым кычалза!
Чын ыштымашым кычалза,
ӱҥышӧ лияш тыршыза,
тунам Господьын шыде кечынже ала утаралт кодыда.
4 Вет Газа ола лиеш кудалтен кодымо,
Аскалон – пустаҥдыме,
Азотышто илыше-влакым кечывал кечын поктен колтат,
Екроным вожге луктын кудалтат.
5 Ойго теҥыз серыште илыше крит калыклан!
Ханаан, филистим-влакын мландыже,
Господьын шомакше тыйын ваштареш:
«Мый тыйым пытарем,
нигӧ огеш код утаралтын!»
6 Теҥыз воктенысе кундемда такыр пасуш савырна,
тудо кӱтымӧ вер, шорыквече лиеш.
7 Тиде кундем Иуда тукымын утаралт кодшыжо-влаклан логалеш –
тушто нуно кӱтӱштым кӱташ тӱҥалыт,
Аскалонысо пӧртлаште кастене малаш возыт,
вет Господь Юмышт нунын дек мелын савырна,
нуным плен гыч пӧртылта.
8 «Колынам Мый Моавын игылтмыжым
да Аммон эрге-влакын койдарымыштым,
кузе нуно Мыйын калыкем мыскыленыт,
тудын мландыштыже шкештым озалан ужыныт.
9 Сандене Мый Шкем дене товатлем, –
ойла Господь Саваоф, Израильын Юмыжо, –
Моав дене Содом семын,
Аммон калык дене Гоморра семын лиеш:
мландыштышт почкалтыш кушкын шогалеш,
нуно шинчалан вынемыш, курымешлан пуста ир мландыш савырнат.
Мыйын калыкем гыч илен кодшо-влак нуным агат,
Мыйын еҥем кокла гыч утаралт кодшо-шамыч
нунын мландыштын озашт лийыт».
10 Теве мо нуным вуча шкеныштым кӱшкӧ шындымылан,
вет нуно Господь Саваофын калыкше ӱмбак кӱшыч онченыт,
тудым нимоэш ужыныт.
11 Господь нунылан лӱдыкшӧ лиеш,
вет Тудо мландымбалысе чыла юмым укеш луктеш.
Тунам эсогыл тора отролаште илыше чыла калык
Тудлан шке мландыж гыч вуйжым сава.
12 «Теат, эфиоп-влак, Мыйын кердем деч пытеда».
13 Шуялта Тудо кидшым йӱдвелке да Ассирийым пытара,
шалата Ниневийым, ир мланде гай кошкышым ышта.
14 Тушто вольык ден тӱрлӧ янлык возыт канаш,
тумна ден шоҥшо-влак колонно коклаште тӱҥалыт малаш,
окна гыч нунын йӱкышт тӱҥалеш шокташ.
Омса лондемыштышт – пытарымаш,
кедр пырня-влак кодыт чара.
15 Тиде мо саде куанле ола, азапым палыде илыше?
Шкаланже тудо ойлен: «Уке мый гаем весе»,
а кызыт тудын деч лач кӱ ора кодын,
янлык илыме верыш савырнен.
Кажныже, кӧ эртен кая воктечше,
ӧрын шӱшкалта, кидше дене лупшалеш.
Глава 2
