Выбрать язык
Книги Ветхого Завета
Книги Нового Завета
с русским текстом1 Теве Господьын шомакше – тудо Иуда кугыжа Иосийын, Амон эргын, вуйлатыме кечылаштыже Софонийлан, Хусий эргылан, лийын. Хусийже Годолийын эргыже, тудыжо Амарийын эргыже, а Амарий Езекийын эргыже улмаш.
2 «Мландымбач Мый чыла ӱштыл шуэм, – ойла Господь, –
3 айдеме ден вольык-янлыкым,
кавасе кайык ден теҥыз колым пытарем,
осал еҥ-влак дене пырля алгаштарымашым пытарем,
мландымбач еҥ-шамычым ӱштыл шуэм, – ойла Господь. –
4 Иуда да Иерусалимыште илыше-влак ӱмбаке
Мый шке кидем нӧлталам:
тиде верыште Вааллан кумалме деч мо кодшым,
тудлан служитлыше онаеҥ ден иерей-влакын лӱмыштым ӱштыл шуэм.
5 Нуно кавасе шӱдыр-влаклан леведыш ӱмбалне кумалыныт,
Господьланат, Милхомланат*а вуйым савеныт
да нунын лӱмышт дене товатленыт.
6 Господь деч нуно кораҥыныт,
Тудым кычалын огытыл,
Тудын деч каҥашым йодын огытыл.
7 Господь Юмо ончылно шып лий!
Вет Господьын кечыже лишне:
шке калыкше гыч надырлан шӱшкылшаш-влакым Тудо палемден,
Иудам пытараш ӱжшаш еҥ-шамычым ойырен.
8 Господьын надырым кондымо кечынже тыге лиеш:
он-влакым, кугыжан эрге-шамычым,
йот калык семын чийыше чыла еҥым
Мый мут кучаш шогалтем –
9 чылаштым, кӧмыт омса лондемым тошкалаш лӱдыт,
кӧмыт шке озашт-влакын*б пӧртыштым
шыгыремдымаш да ондалымаш дене темат.
10 Тудо кечын, – ойла Господь, –
Кол капка деч варгыжмаш,
олан у ужашыж гыч шортмаш солна,
кӱкшака-влак ӱмбач кугу пытарымаш шокта.
11 Мӱгырен шортса, олан ӱлыл ужашыштыже илыше-влак,
вет сатучо-шамычлан мучаш толеш,
шийлан ужалыше-налше-влак пытарыме лийыт.
12 Тудо жапыште тыге лиеш:
Мый Иерусалимым лампе дене ончен лектам
да кучаж ӱмбалнысе йошкар арака гай улшо-влаклан,*в
”Господь сайымат, осалымат ок ыште”
манын шонышо-влаклан, ӱчым шуктем.
13 Нунын поянлыкышт поген налме,
а пӧртышт пустаҥдыме лийыт.
Шкаланышт нуно пӧртым чоҥат,
но тушто илаш огыт тӱҥал,
виноград аҥа-влакым шындат,
но йошкар аракам огыт йӱ».
14 Господьын кугу кечыже лишне!
Лишне тудо, вашке толын шуэш!
Теве тудо, Господьын кечыжын йӱкшӧ,
тунам виян сарзат йӧсын кычкыраш тӱҥалеш!
15 Тудо кече – шыде кече,
ойго да орлык кече,
пытарымаш да шалатымаш кече,
рӱмбык да пычкемыш кече,
шем пылан, тӱп пычкемыш кече,
16 пучым пуалтыме кече,
чоткыдемдыме ола ден кӱкшӧ башне ваштареш
кычкырен кредалме кече.
17 Мый еҥ-влак ӱмбаке туткарым колтем,
да нуно сокыр семын перныл кошташ тӱҥалыт,
вет Господь ончылно нуно сулыкыш пуреныт.
Нунын вӱрыштым пурак семын чыла вере йоктарат,
капыштым терыс семын кышкат.
18 Господьын шыдыже кечын нуным
ший ден шӧртньышт огыт керт утарен.
Тудын кугу шыдыжын тулжо пӱтынь мландым йӱлалта,
мландымбалне илыше-влаклан мучашым Тудо кенета колта.
*а 1:5 Милхом – аммон-влакын тӱҥ юмышт, тиде лӱм еврей йылмысе ’кугыжа’ шомак дене ик семынрак йоҥга.
*б 1:9 «Озашт-влакын»: тидым «юмышт-влакын» манынат умылаш лиеш. Тыште кучылтмо еврей шомак юмо, еҥ ден кугыжа-влакымат ончыктен кертын.
*в 1:12 Тыште сулыкан илыш дене илаш тунемше еҥ-влак нерген ойлалтеш.
Глава 1