Библия
Выбрать язык
Книги Ветхого Завета
Книги Нового Завета
с русским текстом
ПРОРОК ОСИЙЫН КНИГАЖЕ
6 Глава
1 Израильтян-влак Господь деке пӧртылаш кӱлмӧ нерген ойлат. 4 Нуно Господь дене ыштыме ойпидышым пудыртеныт.1 Шке орлыкыштышт нуно Мыйым
уло шӱм-чон дене кычалаш тӱҥалыт да каласат:
”Каена, Господь деке пӧртылына!
Тудо мемнам сусыртен, Тудак мемнам паремда.
Тудо мемнам эмгатен, Тудак сусырнам пидеш.
2 Кок кече гыч мемнам ылыжта,
кумшо кечын йол ӱмбак шогалта,
да ме Тудын чурийже ончылно илаш тӱҥалына.
3 Айста Господьым пален налаш тыршена,
тидлан уло вийнам пыштена.
Кузе кажне кечын эр ӱжара волгалтеш,
Тудат мемнан деке чынжымак толеш.
Йӱр семын, мландым вӱдыжтарыше шошо йӱр семын
Тудо мемнан деке толеш”.
4 Мом Мылам тый денет ышташ, Ефрем?
Мом тый денет ышташ, Иуда?
Ӱшанле улмыда – эр тӱтыра гай, вашке йомшо лупс гай.
5 Сандене Мый тендам пророк-влакын мутышт дене кыренам,
умшам гыч лекше шомакем дене пытаренам.
Мыйын судем волгенче семын волгалтын.
6 Надырым огыл, а порылыкым ужнем,
Юмым палымаш Мылам надыр йӱлалтыме деч утларак келша.
7 Адам семын
*а нуно ойпидышым пудыртеныт,
тушто Мыланем ӱшанле лийын огытыл.
8 Галаад – осалым ыштыше еҥ-влакын олашт,
вӱр дене тудо амырген.
9 Кузе агыше-влак еҥым ваҥен шинчат,
туге иерей тӱшка Сихем корнышто пуштеда,
йырнык паша-влакым ышта.
10 Израиль калык коклаште шучко пашам ужам:
Ефрем яжарлана,
Израиль шкенжым шакшылен.
11 Кунам Мый калыкем плен гыч пӧртылтем,
тыйымат, Иуда, тӱредме жап вуча.
*а 6:7 «Адам семын»: тидым «Адам ола воктене ыштыме семын» але «Айдеме семын» манынат кусараш лиеш.
Глава 6
