Библия
Выбрать язык
Книги Ветхого Завета
Книги Нового Завета
с русским текстом
ПРОРОК ОСИЙЫН КНИГАЖЕ
5 Глава
1 Израиль ден Иудан, нунын вуйлатышышт-влакын сулыкышт. 8 Иуда ден Израиль коклаште сар.1 Колыштса тидым, иерей-влак,
Израиль тукым, тӱткын колышт,
кугыжан пӧртшӧ, пылышет савыре!
Тыланда суд лиеш,
вет лийында те Мицпаште оптыш,
Фаворышто шындыме вапш.
2 Яжарлыкыш те келгын пижын шинчында,
тендам Мый мут кучаш шогалтем.
3 Ефрем нерген чыла палем,
Израилят Мый дечем шылтыме огыл.
Тый, Ефрем, яжарланет,
Израилят шкенжым шакшылен!
4 Пашашт-влак шке Юмышт дек пӧртылаш чаракым шындат,
вет кӧргыштышт – яжарлык шӱлыш,
Господьым нуно огыт пале.
5 Израильын кугешнымыже шке ваштарешыжак танык лиеш.
Израиль ден Ефрем сулыкыштлан кӧра шӱртнят,
нунын дене пырля Иудат шӱртня.
6 Шолдыра да тыгыде вольыкшо дене
Израиль Господьым кычалаш кая,
но Тудым ок му: Израиль деч Тудо кораҥын.
7 Господьлан нуно ӱшанле лийын огытыл,
ситмыж
*а йоча-влакым нуно ыштеныт.
У тылзе годым эртарыме йӱлашт
ынде нуным да мландыштым пытымашке шукта.
8 Гиваште тӱкӧ дене, Рамаште пуч дене пуалтыза,
Беф-Авеныште увертарыза:
”Шеҥгелнет тушман, Вениамин!”
9 Мут кучаш шогалтыме кечын Ефрем пуста верыш савырна.
Израиль тукым-влаклан Мый тиде чыным увертаренам.
10 Иудан онжо-влак межам кусарыше еҥ гай лийыныт,
тидлан Мый ӱмбакышт шыдем вӱд семын йоктарем.
11 Ефрем пызырналтын, Юмын судшо шукталтын,
вет тудо полган юмо-влак почеш уло кумылын каен.
12 Мый Ефремлан когарш гай,
Иуда тукымлан шӱйшӧ сусыр гай лиям.
13 Кунам Ефрем шке чержым ужын,
Иуда – шке сусыржым,
тунам Ефрем Ассирийыш каен,
Иарев кугыжа дек
*б шке еҥже-влакым колтен.
Но тудыжо ок керт эмлен,
огеш керт сусырдам паремден.
14 Вет Мый Ефремлан лев гай,
Иуда тукымлан самырык лев гай улам.
Мый, Мый нуным кӱрыштам да каем,
Мый нуным наҥгаем, нигӧ ок утаре!
15 Титакыштым умылымешкышт
да, ойгырен, чурием кычалаш тӱҥалмешкышт,
Мый каем, шке декем пӧртылам.
*а 5:7 Ситмыж – внебрачный.
*б 5:13 «Иарев кугыжа дек» – тидым ’кугу кугыжа дек’ манынат кусараш лиеш, «Иарев» шомак тыште лӱм огыл, а Ассирий кугыжан титулжо лийын кертеш.
Глава 5
