Выбрать язык
Книги Ветхого Завета
Книги Нового Завета
с русским текстом1 Тидын деч вара саде пӧръеҥ мыйым мӧҥгеш храмыш пурымо вер деке конден. Мый ужынам: храм лондем йымачын вӱд йыргыктен лектеш. Тудо эрвелкыла йоген, вет храм эрвел могырыш ончен. Вӱд жертвенник деч кечывалвелныла, храмын пурла могыржо йымач, йоген лектын.2 Вара тудо мыйым йӱдвел капка гоч луктын да тӱжвачын эрвел капка деке конден. Мый ужынам: пурла могырым вӱд йога.3 Пӧръеҥ эрвел могырыш каен, кидыштыже висыме кандыра лийын. Тӱжем кынергутым висымеке, тудо мыйым вӱд гоч наҥгаен – вӱд йолшакляка марте лийын.4 Вара эше тӱжем кынергутым висен да мыйым вӱд гоч наҥгаен – тудыжо пулвуй марте лийын. Эше тӱжем кынергутым висен да мыйым наҥгаен – вӱд кыдал марте лийын.5 Тудо эше тӱжем кынергутым висен, но ынде йогын тыгай кугу да келге лийын, тудым йолын вончен кертын омыл, ийын лекташ кӱлын. Тиде йогыным вончен лекташ лийын огыл.
6 Тудо мыланем каласен: «Айдеме эрге, ужыч мо?» Вара мыйым мӧҥгеш тиде йогынын серышкыже конден.7 Тушко пӧртылмеке, мый йогынын кок серыштыжат пеш шуко пушеҥгым ужынам.
8 Тудо мыланем каласен: «Тиде вӱд эрвел кундем могырыш йога да тӧрверыш вола. Тушечын Шинчалан теҥызыш йоген пура, да тудыжын вӱдшӧ саемеш.9 Кушко вӱд йоген мия, тушто тӱрлӧ илыше чонан-влак шолаш тӱҥалыт да пеш шуко кол лиеш. Вет тиде вӱд тусо вӱдым саемда: кушто тиде вӱд йога, тушто чылажат илаш тӱҥалеш.10 Теҥыз серыште колызо-влак Ен-Геди деч Эглаим марте шогаш да вапшыштым шарен кошташ тӱҥалыт. Кугу теҥызыште улмо семын тушто шуко тӱрлӧ кол лиеш.11 Но куп ден пӱялаште вӱд ок саем, нуно шинчаланак кодыт.12 Тиде йогынын кок серыштыжат саскам пуышо тӱрлӧ пушеҥге кушкаш тӱҥалеш. Нунын лышташышт ок лывыжге, саскашт нигунам ок пыте. Вӱд нунын дек святой вер гыч йоген мия, сандене пушеҥге-влак саскам кажне тылзын пуаш тӱҥалыт. Нунын саскашт кочкыш, а лышташышт эм лийыт».
13 Господь Юмо тыге ойла: «Теве чек-влак, нунын почеш те мландым Израильын латкок тукымжылан шеледышаш улыда. Иосиф кок ужашым налеш.14 Тукым-влак коклаште мландым иктӧр шеледыза. Кидем нӧлталын, Мый тудым ача-кочада-шамычлан пуаш сӧренам. Тудо тендан тукым мландыда лиеш.
15 Теве тиде мландын чекше-влак. Йӱдвелне чек Кугу теҥыз деч тӱҥалеш да Хетлон корно дене Лево воктечын Цедад,16 Лево-Хамат, Берот да Сивраим дек – Сивраимже Дамаск ден Емаф кокласе чекыште верланен, – вара Авран чек дене улшо Гацар-Тихон дек шуйна.17 Тыгеракын, чек теҥыз деч Гацар-Енан марте шуйна. Тудо Дамаскын чекше дене кая, Емаф кундем йӱдвелне кодеш. Теве йӱдвел чек.18 Эрвел чек Авран ден Дамаск коклаште тӱҥалеш, умбакыже Галаад ден Израиль мланде кокла гыч Иордан дене эрвел теҥыз деке, вара Тамар деке кая. Теве эрвел чек.19 Кечывалвел чек Тамар деч Мерива-Кадесын вӱдшӧ дек, вара йогын дене Кугу теҥыз деке кая. Теве кечывалвел чек.20 Касвел чеклан Кугу теҥыз шотлалтеш, тудо кечывалвел чек гыч Лево-Хамат ваштареш улшо вер марте шуйна. Теве касвел чек.
21 Тиде мландым шке коклаштыда Израиль тукым еда шеледыза.22 Тудым шкаланда да йот калык еҥ-влаклан, кӧмыт тендан коклаште илат да тыланда йочам шочыктеныт, шерева почеш пайлыза. Нуно шке калыкдан еҥже дене иктӧр лийшаш улыт, Израиль тукым-влак коклаште нунынат пайышт лийшаш.23 Йот калык еҥ могай тукым мландыште ила, тудлан пайым тушто пуыза, – ойла Господь Юмо.
Глава 47