Выбрать язык
Книги Ветхого Завета
Книги Нового Завета
с русским текстом1 Теве тукым-влакын лӱмышт.
Йӱдвелне чек Хетлон корно дене Лево-Хаматыш, вара Гацар-Енаныш кая. Тудо Дамаск да Емаф кундем воктечын эрта. Чыла тиде мланде эрвел гыч касвел марте – Данын мландыже.2 Данын мландыж деч кечывалвелкыла, эрвел гыч касвел марте – Асирын мландыже.3 Асирын мландыж деч кечывалвелкыла, эрвел гыч касвел марте – Неффалимын мландыже.4 Неффалимын мландыж деч кечывалвелкыла, эрвел гыч касвел марте – Манассийын мландыже.5 Манассийын мландыж деч кечывалвелкыла, эрвел гыч касвел марте – Ефремын мландыже.6 Ефремын мландыж деч кечывалвелкыла, эрвел гыч касвел марте – Рувимын мландыже.7 Рувимын мландыж деч кечывалвелкыла, эрвел гыч касвел марте – Иудан мландыже.
8 Иудан мландыж деч кечывалвелкыла, эрвел гыч касвел марте – святой мланде ужаш. Тудын лопкытшо – коло вич тӱжем кынергут, а эрвел гыч касвелкыла висаш гын, кужытшо тукым мланде-влак дене икгай. Тиде мланде покшелне храм лиеш.9 Господьлан ойырымо мландын кужытшо коло вич тӱжем кынергут, лопкытшо лу тӱжем кынергут*а лиеш.10 Тыште иерей-влаклан ойырымо святой мланде ужаш лиеш. Тудын кужытшо йӱдвелне коло вич тӱжем кынергут, касвелне лопкытшо лу тӱжем кынергут, эрвелне лопкытшо лу тӱжем кынергут да кечывалвелне кужытшо коло вич тӱжем кынергут. Тушто Господьын храмже шогаш тӱҥалеш.11 Тиде мланде святитлен шогалтыме Садок урлык иерей-влаклан лиеш. Израиль эрге-шамычын Мый дечем кораҥмышт жапыште нуно Мыланем ӱшанлын служитленыт, левит-влак семын Мыйым коден каен огытыл.12 Святой мланде ужаш гыч тиде мланде ужаш, святой деч святой мланде ужаш, нунын лиеш. Тудо левит-влакын мландышт воктене верлана.13 Левит-шамыч мландым иерей-влакын мландышт воктене налыт. Тудын кужытшо – коло вич тӱжем кынергут, лопкытшо – лу тӱжем кынергут. Тиде мландын чумыр кужытшо коло вич тӱжем кынергут, лопкытшо коло тӱжем кынергут лиеш.14 Тиде мландым нуно ужаленат, вашталтенат огыт керт. Тудо вес кидыш вончышаш огыл, вет тудо – Господьын святой мландыже.
15 А кодшо вич тӱжем кынергут лопкытан да коло вич тӱжем кынергут кужытан мланде олаште илыше-влаклан лиеш. Тыште илыме вер ден пасу-влак лийыт, нунын покшелнышт – ола.16 Олан кугытшо тыгай: йӱдвел могыр – ныл тӱжемат вичшӱдӧ кынергут, кечывалвел могыр – ныл тӱжемат вичшӱдӧ кынергут, эрвел могыр – ныл тӱжемат вичшӱдӧ кынергут да касвел могыр – ныл тӱжемат вичшӱдӧ кынергут.17 Йырым-йыр олам пасу-влак авыраш тӱҥалыт: йӱдвелке – кокшӱдӧ витле кынергут, кечывалвелке – кокшӱдӧ витле кынергут, эрвелке – кокшӱдӧ витле кынергут да касвелке – кокшӱдӧ витле кынергут.18 А святой мланде ужаш воктене кодшо мландын лектышыже олаште пашам ыштыше-влаклан кочкыш лиеш. Тиде мланде эрвелкыла лу тӱжем кынергутлан да касвелкыла лу тӱжем кынергутлан шуйна.19 Олаште пашам ыштыше-шамыч Израильын чыла тукымжо гыч лийыт, нуно тиде мландым курал-ӱден кертыт.20 Посна ойырымо тиде мланде ужаш – святой мланде ужаш да олан мландыже – ныл могырымат икгай лиеш: кужытшо ден лопкытшо – коло вич тӱжем кынергут дене.
21 Моло мланде, кудо святой мланде ужаш ден ола мландын кок велныже кодеш, эл вуйлатышылан лиеш. Коло вич тӱжем кынергут лопкытан ик мланде ужашыже эрвелкыла чек дек шумеш шуйна, тыгак коло вич тӱжем кынергут лопкытан вес мланде ужашыже касвелкыла чек дек шумеш шуйна. Тиде мланде-влакын чумыр кужытшо тукым мланде дене икгай лиеш. Покшелне храм улман святой мланде ужаш верлана.22 Тыгеракын, левит-влакын мландышт да олан мландыже эл вуйлатышын мландыж покшелне верланат. Иуда ден Вениаминын мланде чекышт коклаште улшо мланде эл вуйлатышылан лиеш.
23 Кодшо тукым-влакын мландышт.
Эрвел гыч касвел мучаш марте Вениаминын мландыже лиеш.24 Вениаминын чекше деч кечывалвелкыла, эрвел гыч касвел мучаш марте – Симеонын мландыже.25 Симеонын чекше деч кечывалвелкыла, эрвел гыч касвел мучаш марте – Иссахарын мландыже.26 Иссахарын чекше деч кечывалвелкыла, эрвел гыч касвел мучаш марте – Завулонын мландыже.27 Завулонын чекше деч кечывалвелкыла, эрвел гыч касвел мучаш марте, Гадын мландыже лиеш.28 Гадын чекше, пӱтынь мландын кечывалвел чекше, Тамар деч Мерива-Кадесын вӱдшӧ дек кая, вара йогын дене – Кугу теҥыз деке.29 Теве тиде мландым те Израиль тукым-влаклан шерева почеш шеледен пуэда, нунын кучен илыме мландышт тыгай лийыт, – ойла Господь Юмо.
30 Теве ола гыч лекме вер-влак. Йӱдвел могырым, кудыжын кужытшо ныл тӱжем вичшӱдӧ кынергут,31 кум капка лиеш: Рувим капка, Иуда капка да Левий капка. Капка-шамыч Израиль тукым-влакын лӱмышт дене лӱмдымӧ лийыт.32 Эрвел могырым, кудыжын кужытшо ныл тӱжем вичшӱдӧ кынергут, кум капка лиеш: Иосиф капка, Вениамин капка, Дан капка.33 Кечывалвел могырым, кудыжын кужытшо ныл тӱжем вичшӱдӧ кынергут, кум капка лиеш: Симеон капка, Иссахар капка, Завулон капка.34 Касвел могырымат, кудыжын кужытшо ныл тӱжем вичшӱдӧ кынергут, кум капка лиеш: Гад капка, Асир капка, Неффалим капка.35 Ола йыр шуйналтше пырдыжын чумыр кужытшо латкандаш тӱжем кынергут лиеш. Тудо кече гыч олан лӱмжӧ тыгай лиеш: ”Тушто Господь”».
*а 48:9 Але «коло тӱжем кынергут».
Глава 48