Выбрать язык
Книги Ветхого Завета
Книги Нового Завета
с русским текстом1 Господь Юмо тыге ойла: кӧргӧ кудывечысе эрвел капка куд паша кече жапыште петырыме лийшаш. А шуматкечын да у тылзе кечын тудым почман –2 эл вуйлатыше тӱжвал кудывече гоч капка оралтысе ончыл кыдежыш пура да омса янак воктеке шогалеш. Иерей-влак тудын йӱлалтен пуымо надыр ден татулык надыржым кондат. Тудо капка лондемыште Господьлан вуйжым сава да мӧҥгеш лектеш, а капка кас марте почмо кодеш.3 Тек элысе калыкат шуматкече ден у тылзе годым тиде капкаш пурымо вер воктене Господьлан вуйжым сава.4 Эл вуйлатыше шуматкечын Господьлан йӱлалтен пуымо надыр шотеш экшыкдыме куд пача ден ик тагам кондышаш.5 Тага пелен пуышаш кинде надыр ик ефа ложаш лийшаш, а пача-влак пелен – мынярым вуйлатыше пуа. Кажне ефалан ик гин олив ӱй кӱлеш.6 У тылзе кечын эл вуйлатыше надырлан экшыкдыме ик самырык ӱшкыжым, куд пачам да ик тагам кондышаш.7 Кинде надырже тыгай лийшаш: ӱшкыжлан – ик ефа ложаш, тагалан – ик ефа ложаш, а пача-влаклан – мыняр шона, тунаре. Кажне ефалан ик гин олив ӱй кӱлеш.8 Капкашке вуйлатыше ончыл кыдеж гоч пурышаш да тудын гочак лекшаш.
9 Пайрем-влак годым, кунам элысе калык Господьын чурийже ончыко вуйым саваш толеш, йӱдвел капка гоч пурышо еҥ тек кечывалвел капка гоч, а кечывалвел капка гоч пурышо йӱдвел капка гоч лектеш. Нигӧ пурымо капкаж гоч мӧҥгеш лекшаш огыл, тек чыланат ваштареш улшо капка гоч лектыт.10 Эл вуйлатыше нунын дене пырля лийшаш. Кунам калык пура – тудат пурышаш, кунам калык лектеш – тудат лекшаш.11 Пайрем годым да палемдыме посна кечылаште вуйлатышын кинде надырже тыгай лийшаш: кажне ӱшкыжлан – ик ефа ложаш, кажне тагалан – ик ефа ложаш, а пача-влаклан – мыняр шона, тунаре. Кажне ефа ложашлан ик гин олив ӱй кӱлеш.12 А эл вуйлатыше Господьлан йӱлалтен пуымо надырым але татулык надырым шке кумылын кондынеже гын, тек тудлан эрвел капкам почыт, да тудо шке надыржым шуматкечын кондымо надыр семын конда. Вара тудо тушеч лектеш, почешыже капкам петырышаш улыт.
13 Господьлан кажне кечын йӱлалтен пуымо надыр шотеш экшыкдыме икияш пачам кондыман, тудым кажне эрдене кондыман.14 Тудын дене пырля кажне эрдене кинде надырлан ефан ик кудымшо ужашыже эн сай ложашым кондыман, тушко гинын кумшо ужашыже олив ӱйым ешарыман. Господьлан конден шогымо кинде надыр шотышто теве тыгай пунчал, те тудым курым-курымеш шуктен шогышаш улыда.15 Йӱлалтен пуымо надырлан пачам, тыгак кинде надырым да олив ӱйым тек кажне эрдене конден шогат.
16 Господь Юмо тыге ойла: эл вуйлатыше шке эргыж-влак кокла гыч иктажшылан мландым пӧлекла гын, тиде мланде ты эргын эргыж-шамычланак кодеш. Тиде мланде нунын тукым гыч тукымыш куснышо мландышт лиеш.17 Но вуйлатыше шке мландыжым иктаж кулжылан пӧлекла гын, кул тиде мланде дене эрыкыш лекме ий марте веле озалана. Тидын деч вара мланде угыч вуйлатышын лиеш. Югыпого семын тудо вуйлатышын эргыж-влаклан гына куснен кертеш.18 Калыкым поктен колтен, вуйлатыше нунын тукым мландыштым шкаланже налын ок керт. Эргыж-влаклан тудо шке мландыжым гына пуэн кертеш. Мыйын калыкем кокла гыч нигӧм шке мландыж гыч поктен ынышт колто».
19 Вара саде пӧръеҥ мыйым капка воктенысе пурымо вер гоч иерей-влакын йӱдвелкыла ончышо пӧлемышт деке конден. Тушто, нунын касвел могырыштышт, посна вер лийын.20 Тудо мылам каласен: «Тыште иерей-шамыч титак верч надыр ден сулык верч надырым шолтышаш, кинде надырым кӱэштшаш улыт. Святой надыр деке тӱкнымӧ дене калык ынже святитлалт манын, нине надырым тӱжвал кудывечыш лукташ ок лий».21 Вара саде еҥ мыйым тӱжвал кудывечыш луктын да тудын ныл лукыштыжо коштыктен. Мый ужынам: кудывечын кажне лукыштыжо эше изи кудывече лийын.22 Тӱжвал кудывечын ныл лукыштыжо улшо нине изи кудывече-влак печылен налме лийыныт. Нунын кужытышт – нылле кынергут, лопкытышт – кумло кынергут. Ныл лукыштат нуно икгай кугытан лийыныт.23 Кажне кудывече кӧргым кӱ савар авырен, а савар кӧргыштӧ возак-влак вераҥдыме лийыныт.24 Тудо мыланем каласен: «Тиде кочкаш шолтымо вер-влак улыт, храм пелен служитлыше-шамыч тыште калыкын кондымо надырже-влакым шолташ тӱҥалыт».
Глава 46