Выбрать язык
Книги Ветхого Завета
Книги Нового Завета
с русским текстом1 А тый, айдеме эрге, Гог ваштареш пророк шомакым ойло. Каласе: ”Господь Юмо тыге ойла: Гог – Мешех ден Тувалын тӱҥ онжо – Мый тыйын ӱмбакет толам!2 Мый тыйым вес велыш савырем да вӱден наҥгаем. Мый тыйым йӱдвел мучаш гыч луктам да Израиль курыкла ӱмбак сар дене наҥгаем.3 Шола кидет гыч йоҥежым, пурла кидет гыч пикш-влакым перен кудалтем.4 Израиль курыклаште тый шке сарзывиет да пеленет улшо калык-шамыч дене пытет. Мый тыйым вилям кочшо тӱрлӧ кайык ден чодырасе янлыклан кочкаш пуэм.5 Чара вершӧрыштӧ тый пытет, тидым Мый каласенам, – ойла Господь Юмо. –6 Магог мландыш да отролаште лӱдыкшӧ деч посна илыше-влак ӱмбаке Мый тулым колтем. Тунам пален налыт: Мый Господь улам.7 Израиль калыкемым Мый шке святой лӱмем палаш туныктем, тетла тудым шӱктараш ом пу. Тунам калык-влак пален налыт: Мый Господь, Израильын Святойжо, улам.8 Теве чыла тиде толеш да шукталтеш, – ойла Господь Юмо. – Тудо кече лишемеш, кудын нерген ойленам.9 Тунам Израиль олалаште илыше-влак лектыт, тулым ылыжтат да саргуралым – изи да кугу авыртышым, йоҥеж ден пикшым, шугыньо ден умдым – йӱлалташ тӱҥалыт, шым ий нуным йӱлалтат.10 Нуно оргажым нумалаш але чодыраште пум руаш огыт тӱҥал – нуно саргуралым олташ тӱҥалыт. Агыше-влакыштым нуно шке агат, поген налшышт деч шке поген налыт,” – ойла Господь Юмо.
11 Тудо кечын Мый Гоглан Израильыште, Оврим лапверыште,*а теҥыз деч эрвелныла, тойымо верым ойырем. Тудо корныеҥ-влаклан корным петыра, вет тушто Гогым да уло сарзывийжым тоят. Тиде верым ”Гогын сарзывийжын лапверже” манын лӱмдаш тӱҥалыт.12 Мландым эрыкташ манын, Израиль калык нуным шым тылзе тояш тӱҥалеш.13 Элысе уло калык нуным тояш тӱҥалеш да шке чапем ончыктымо кечын тидын дене чаплана, – ойла Господь Юмо. –14 Эл мучко кошташ, мландымбалне киен кодшо-влакым тояш да элым эрыкташ манын, лӱмынак еҥ-шамычым ойырат. Нунылан моло-влакат полшат. Шым тылзе эртымеке, тойыде кодшо-влакым кычалын кошташ тӱҥалыт.15 Коштшо-влак кокла гыч кӧ айдеме лум муэш гын, воктекыже палым шогалтен кода. Тойышо-шамыч вара нине лум Гогын сарзывийжын лапверыштыже тоят.16 Тусо олан лӱмжӧ Гамона, [’сарзывий’]. Тыге нуно мландым эрыктат.
17 А тый, айдеме эрге, – тыге Господь Юмо ойла, – чыла тӱрлӧ кайык ден чодырасе янлыклан каласе: Тарваныза да толза, надырем деке чыла велым погыныза – Израиль курыклаште Мый тыланда кугу надырым шӱшкылам! Те шылым кочкаш да вӱрым йӱаш тӱҥалыда!18 Те виян сарзе-влакын шылыштым кочкаш, мландымбалысе он-шамычын вӱрыштым йӱаш тӱҥалыда. Нуно чыланат Васанысе ӧрдыктарыме тага ден пача, каза ден ӱшкыж гай улыт.19 Тыланда шӱшкылмӧ надыремын коя шылжым те теммеш кочкыда, вӱржым руштмеш йӱыда.20 Мыйын ӱстелтӧрыштем имне ден имнешкын, тале сарзе ден патыр-влакын шылыштым теммеш кочкыда, – ойла Господь Юмо.
21 Мый калык-влак коклаште шке чапем ончыктем. Чыла калык Мыйын ыштыме судем да ӱмбакышт вочшо кидем ужеш.22 Тудо кече гыч Израиль калык палаш тӱҥалеш: Мый нунын Господь Юмышт улам.23 А калык-влак пален налыт: Израиль калык шке сулыкшылан, Мыланем ӱшанле огыл лиймыжлан пленыш наҥгайыме лийын. Садлан Мый нунын деч чурием шылтенам, нуным тушман кидыш пуэнам, да шукын керде деч пытеныт.24 Нунын ару огыллыкышт ден осал пашаштлан кӧра Мый нунын дене тидым ыштенам, нунын деч шке чурием шылтенам.
25 Садлан Господь Юмо тыге ойла: ынде Иаков тукымым плен гыч пӧртылтем, пӱтынь Израиль калыкым серлагем да шке святой лӱмем арален налам.26 Кунам нуно шке мландыштышт лӱдыкшӧ деч посна илаш тӱҥалыт да нуным тетла нигӧ ок тургыжландаре, нуно намысыш пурымыштым умылат да Мыйын ончылнем ондак ыштыме осал пашашт деч вожылыт.27 Кунам нуным вес калык-влак кокла гыч пӧртылтем да тушман мландыла гыч погем, нунын дене мом ыштымем гоч Мый шуко калыкын шинча ончылныжо святой улмем ончыктем.28 Кунам Мый нуным, ончыч вес калык-влак коклаш пленыш колтымеке, угыч шке мландышкышт погем, нуно пален налыт: Мый нунын Господь Юмышт улам. Йот мландеш Мый нигӧм ом кодо.29 Мый нунын деч чурием тетла нигунам ом шылте. Израиль калык ӱмбаке Мый шке Шӱлышем опталам, – ойла Господь Юмо».
*а 39:11 Оврим лапвер – еврей йылмыште тиде «Эртен кайыше-влакын лапверышт» манмым ончыкта.
Глава 39