Выбрать язык
Книги Ветхого Завета
Книги Нового Завета
с русским текстом1 Мыланем Господьын шомакше лийын:2 «Айдеме эрге! Шке чуриетым Магог мландыште улшо Гог деке, Мешех ден Тувалын тӱҥ онышт*а деке, савыре да тудын ваштареш пророк шомакым ойло.3 Каласе тудлан: ”Тыге ойла Господь Юмо: Гог, Мешех ден Тувалын тӱҥ онжо, Мый тыйын ӱмбакет толам!4 Мый тыйым вес велыш савырем, умшашкет кугу эҥыримым пыштем да тыйым, уло сарзывиетым вӱден наҥгаем: имнет-влакым, саргуралан да сарлык вургеман имнешкет-влакым, кугу да изи авыртышан, кердан шуко еҥетым,5 нунын дене пырля Персий, Эфиопий да Ливий гыч авыртыш ден ӧшлӧкан пӧръеҥ-шамычым,6 Гомерым сарзывийже дене, йӱдвел мучаш гыч Фогарма тукымым сарзывийже дене – тый денет пырля кайыше шуко чотан калык-влакым наҥгаем.7 Тый шкеже да тый декет погынышо чумыр сарзывий, ямдылалтса, сарым тӱҥалаш ямде лийза! Тый нунын онышт лий!8 Жап эртымеке, тый ӱжмӧ лият. Кунам пытартыш ий-влак толыт, тый сар деч вара угыч тӱзланыше мландыш кает – тушто илыше-шамыч, кӧмытым вес калык-влак коклаш шалатеныт улмаш, кужу жап пустаҥын шогышо Израиль курыклаште погымо лийыныт. Тышке пӧртылтымеке, нуно лӱдыкшӧ деч посна илат.9 Тый тӱтан семын нӧлталтат, шке сарзывиет да пеленет улшо калык-влак дене пырля пӱтынь мландым леведше пыл ора гай лият.
10 Господь Юмо тыге ойла: тудо кечылаште тыйым уда шонымаш-влак авалтат, да тый осал пашам шонен пыштет.11 Тый каласет: ’Пырдыж дене авырыдыме илем-влак ваштареш каем да лӱдыкшӧ деч посна, тыныслын илыше калык ӱмбаке кержалтам. Нуно авырыше пырдыж деч посна илат, тӱкылтышыштат, капкаштат уке’.12 Тый агаш да руалтен налаш тӱҥалат, йот калык-шамыч кокла гыч погымо, шалатыме верлашке илаш пӧртылшӧ калык ваштареш шке кидетым савырет – тудыжо кызыт вольык да тӱрлӧ пого дене озалана, Мланде кылымдыште*б ила.13 Сава ден Дедан, тыгак Фарсисын купечше-шамыч шке самырык лев-влакышт дене тылат каласат: ’Тый руалтен налаш толынат? Агаш, шӧртньӧ ден шийым наҥгаяш, вольык ден погым шупшын налаш, кугу агымашым ышташ сарзывиетым погенат?’”14 Сандене пророк шомакым ойло, айдеме эрге, Гоглан каласе: ”Тыге ойла Господь Юмо: тиде жапыште Мыйын Израиль калыкем лӱдыкшӧ деч посна илаш тӱҥалеш. Но тый тарванет*в15 да шке верет гыч, йӱдвел мучаш гыч, лектат. Тый денет пырля тыгак имне ӱмбалне шинчыше шуко тӱрлӧ калык лиеш – пеш кугу тӱшка, шуко чотан сарзывий.16 Мыйын Израиль калыкем ӱмбак тый пӱтынь мландым леведше пыл ора семын кает. Пытартыш кечылаште Мый тыйым шке мландышкем колтем. Тунам калык-влак Мыйым пален налыт, вет мом тый денет, Гог, нунын шинча ончылнышт ыштем – тидын гоч Мый нунылан святой улмем ончыктем.
17 Господь Юмо тыге ойла: тыйын нерген огыл мо Мый ожнак шке тарзем-влак, Израильын пророкшо-шамыч, гоч ойленам? Мый тыйым Израиль калык ваштареш кондем манын, нуно тунам пророклен ойленыт.18 Тудо кечын, кунам Гог Израиль мланде ӱмбак толеш, – ойла Господь Юмо, – Мыйын кугу деч кугу шыдем ылыжеш.19 Кугун сырымем дене, ылыжше шыдем дене Мый ойлем: тудо кечын Израильыште пеш кугу мланде чытырналтмаш лиеш.20 Мыйын чурий ончылнем теҥызысе кол, кавасе кайык, чодырасе янлык, мланде ӱмбалнысе нушкын коштшо тыгыде чонан-влак да мландымбалне улшо чыла еҥ чытыраш тӱҥалыт. Курык-влак шаланат, курыкоҥ-шамыч камвозыт, чыла пырдыж мландымбаке сӱмырла.21 Мый чыла курыкыштем Гог ваштареш кердым ӱжам, – ойла Господь Юмо, – тудын кажне сарзыже шке кердыжым йолташыже ӱмбак нӧлталеш.22 Мый тудын дене судым ыштем, тудым шучко чер да вӱрым йоктарымаш дене наказатлем. Мый тудын ӱмбаке, пеленже улшо сарзывий ден калык-влак ӱмбаке чыла мушкын колтышо кугу йӱрым, кӱан шолемым да чӱкчыгишан тулым йоктарем.23 Мый шке кугулык ден святой улмем ончыктем, шуко калык-влакын шинча ончылнышт Шкемым палдарем. Тунам нуно пален налыт: Мый Господь улам”.
*а 38:2 «Мешех ден Фувалын тӱҥ онышт»: южо кусарымаште тидым «Рош, Мешех ден Фувалын онышт» манын кусарыме, но «Рош» лӱман вер але калык Библийыште ок вашлият – тиде мут ’вуй, вуйлатыше’ манмым ончыкта. Тыгак – 38:3, 39:1.
*б 38:12 Мланде кылымде – Пуп Земли, еврей текстыште тиде лӱм, очыни, курыкысо верым ончыкта.
*в 38:14 «Тиде жапыште Мыйын Израиль калыкем лӱдыкшӧ деч посна илаш тӱҥалеш. Но тый тарванет»: Тидым тыгеат кусараш лиеш: «Израиль калыкемын лӱдыкшӧ деч посна илаш тӱҥалме кечын тый тидым пален налат».
Глава 38