Выбрать язык
Книги Ветхого Завета
Книги Нового Завета
с русским текстом1 Латикымше ийын кумшо тылзыжын икымше кечынже мылам Господьын шомакше лийын:2 «Айдеме эрге! Каласе фараонлан, Египет кугыжалан, да тудын калыкшылан:
”Кугулыкет дене тыйым кӧ дене таҥастараш лиеш?
3 Ассирий дене, тиде Ливанысе кедр дене?
Тудын укшыжо-влак мотор лийыныт, ӱмылым пуэныт.
Лийын тудо кӱкшӧ, вуйжо пыл деке шуын.
4 Вӱд-влак тудым йӱктеныт,
мланде йымалысе вӱдшинча-шамыч куштеныт,
нунын йогынжо-влак кушмо вержым авыреныт,
чодырасе чыла пушеҥге дек изэҥерым колтеныт.
5 Сандене тудо чодырасе чыла пушеҥге деч кӱкшырак лийын,
укшыжо-влак одарланен кушкыныт,
шуко вӱд улмылан кӧра шуйненыт.
6 Укшлаштыже тӱрлӧ кайык пыжашым оптен,
укш йымалныже тӱрлӧ янлык игаҥын,
ӱмылыштыжӧ тӱрлӧ кугу калык илен.
7 Кӱкшӧ улмыж дене, кужу укшыж дене тудо моторланен,
вет вожшо-влак кугу вӱд деке шуыныт.
8 Юмын садысе кедр-шамыч тудым ӱмылтен огытыл,
кипарис-влак одар укшлашт дене таҥасен кертын огытыл,
платан-шамычынат тыгай укшлашт лийын огыл.
Юмын садыште ик пушеҥгат тудын гай мотор лийын огыл.
9 Мый тудым моторым, одар укшаным ыштенам,
Эдемын, Юмын садын, пушеҥгыже-влак тудлан кӧраненыт.
10 Сандене Господь Юмо тыге ойла: тудо кӱкшӧ лийын, вуйжо пыл деке тӱкнен, да кугу улмыжлан кӧра тудын шӱмжым кугешнымаш авалтен.11 Садлан Мый тудым калык-влакын озаштын кидышкышт пуэнам, тиде оза тудлан осал пашаже почеш пӧртылтен. Мый тудым поктен колтенам.12 Йот тукым еҥ-влак, калык-шамыч кокла гыч эн осалже-влак, тудым руэн йӧрыктеныт да курыклаш кудалтеныт. Тудын укшлаже чыла лапвер ден коремыш пудырген камвозыныт. Мландымбалысе чыла калык тудын ӱмылжӧ гыч лектын, тудым коден каен.13 Тиде сӱмырлышӧ кашкаште кайык-влак пыжашым оптеныт, укш коклаштыже янлык-шамыч вераҥыныт.14 Вӱд воктене кушшо нимогай пушеҥге тыге кӱшкӧ ынже нӧлталт, вуйжо пыл деке ынже шу манын, тиде лийын. Тек вӱдым йӱшӧ ик пушеҥгат тыге кӱшкӧ ок нӧлталт! Нуно чыланат колат, шӱгарыш волышо айдеме эрге-шамыч дене пырля вес тӱняште лийыт.
15 Господь Юмо тыге ойла: тиде кедрын вес тӱняш кайымыж кечын Мый шортмо йӱлам эртарыктем – мланде йымалысе келге вӱд ден йогынжо-шамычым чарен шогалтем, кугу вӱд-влакым пӱялем. Тудын пытымыжлан кӧра Ливаным шӱлыкаҥдем, чодырасе чыла пушеҥге ойгана.16 Кунам Мый тудым вес тӱняшке шӱгарыш волышо-влак деке волтем, тудын шуҥгалтме йӱк-йӱанже дене калык-шамычым чытырыктем. Тунам Эдемын мланде пундаште улшо пушеҥгыже-влак да Ливанын данле,*а эн сай пушеҥгыже-влак, кудышт ондак вӱдым йӱыныт, чылан куанат.17 Калык-шамыч коклаште тудын ӱмылыштыжӧ илыше да тудын дене ик ушемыште лийше-влак вес тӱняш, керде деч пытыше-шамыч деке, тудын дене пырля волат.18 Эдемысе пушеҥге-влак кокла гыч кудыжо тый денет чап да кугулык дене таҥасен кертын? Но тый нунын семынак мланде пундашыш волтымо лият да пӱчдымӧ-шамыч коклаште, керде деч пытыше-влак воктене кияш тӱҥалат”. Фараоным да тудын шуко чотан калыкшым теве мо вуча», – ойла Господь Юмо.
*а 31:16 Данле – славный, прекрасный.
Глава 31