Выбрать язык
Книги Ветхого Завета
Книги Нового Завета
с русским текстом1 Латкокымшо ийын латкокымшо тылзыжын икымше кечынже мылам Господьын шомакше лийын:2 «Айдеме эрге! Фараон, Египет кугыжа, шотышто ойгырен шортын, тыге муро, тудлан каласе:
”Калык-влак коклаште тый самырык лев гай,
теҥызысе кугу янлык*а гай улат.
Йогынлаште почаҥат,
йолет дене вӱдым румбыкаҥдет,
йогынжо-влакым тошкет.
3 Тыге ойла Господь Юмо:
Погынышо шуко калыкын кидше дене
Мый ӱмбакет шке вапшем шуэм,
Мыйын келдем*б дене нуно тыйым шупшын луктыт.
4 Мый тыйым мландыш шуэм, чара вершӧрыш кудалтем –
ӱмбакет кайык-влак шинчыт,
янлык-шамыч тыйым теммеш кочкыт.
5 Капетым Мый курыкла мучко кышкен пытарем,
тудын дене лапвер-шамычым темем.
6 Йогышо вӱрет дене мландым курыкйол марте йӱктем,
корем-влак вӱрет дене темыт.
7 Кунам тый пытет, Мый кавам петырем,
тушто улшо шӱдыр-шамычым пычкемышыш шылтем,
кечым пыл дене петырем,
тылзе волгалтарымыжым чарна.
8 Каваште йолгыжшо тӱняволгалтыш-влакым
Мый ӱмбалнет пычкемышыш шылтем,
мландетым пычкемыш дене леведам, – ойла Господь Юмо.
9 Кунам калык-влак коклаште, тылат палыдыме мландылаште
тыйын пытымет нерген увертарем,
Мый шуко калыкын шӱмжым аптыратем.
10 Тыйын пӱрымашет дене Мый шуко калыкым лӱдмашыш пуртем.
Тыйын нерген колын, нунын кугыжашт лӱдын чытырнат.
Мый ончылнышт кердем лупшалам,
да пытымет кечын кажныже шке чонжо верч
лӱдын чытыраш тӱҥалеш.
11 Вет Господь Юмо тыге ойла:
Вавилон кугыжан кердыже ӱмбакет толеш.
12 Мый тыйын калыкетым виян-шамычын кердышт дене пытарем.
Нуно калык-влак кокла гыч эн осал улыт,
Египетын кугешнымыжлан нуно мучашым пыштат,
да тудын шуко чотан калыкше пыта.
13 Тудын кугу вӱдшӧ воктене шуко вольык коштеш,
но Мый нуным пӱтынек пытарем,
да айдеме ден вольыкын йолышт
тиде вӱдым тетла огыт румбыкаҥде.
14 Мый тиде вӱдым турлыктарем,
да тудын эҥерже-влак ӱй семын йогаш тӱҥалыт, –
ойла Господь Юмо.
15 Кунам Мый Египетым ир мландыш савырем,
да ончычсо перкелык тушто пыта,
кунам тушто илыше-влакым чылаштым пытарем,
тунам пален налыт: Мый Господь улам”.
16 Теве ойгырен шортмо муро, тудым калык-влакын ӱдырышт Египет да тудын шуко чотан калыкше нерген мураш тӱҥалыт», – ойла Господь Юмо.
17 Латкокымшо ийын тудо тылзынак латвизымше кечынже мылам Господьын шомакше лийын:18 «Айдеме эрге! Египетын калыкше шотышто шортын муро да тудым лӱмлӧ калык-влакын ӱдырышт дене вес тӱняшке, мланде пундашыш волышо-шамыч деке, ужате.
19 Египет, моло деч тый сайрак улат мо?
Воло, пӱчдымӧ-влак дене пырля кий!
20 Керде деч пытыше-влак коклаште египтян-шамыч кияш тӱҥалыт.
Кердым нӧлталме – кучен наҥгаят Египетым
да тудын шуко чотан калыкшым!
21 Египет да тудлан полшышо-влак нерген
виян сарзывуй-шамыч вес тӱняште тыге каласат:
”Теве нунат воленыт да моло пӱчдымӧ-влак коклаште кият,
нуно керде дене пытарыме лийыныт!”
22 Тушто – Ассирий шке калыкше дене,
тудын йырже – нунын шӱгарышт,
нуно чыланат керде деч пытеныт.
23 Нунын шӱгарышт – вес тӱнян эн келге верыштыже.
Ассирийын уло калыкше тудын шӱгарже йыр кия –
илыше-влакын мландыштышт
шучкылыкым шарыше-влак коленыт,
чыланат керде деч пытеныт.
24 Тушто – Елам, шӱгарже йыр шуко чотан калыкше,
керде деч колышо еҥже-влак, кият,
вес тӱняшке нуно пӱчдымӧ воленыт.
Илыше-влакын мландыштышт нуно
ала-кунам шучкылыкым шареныт,
а кызыт шӱгарыш волышо-влак семынак
кугу намысыш пуреныт.
25 Еламын да шуко чотан калыкшын кызыт кийыме верже –
пуштмо еҥ-влак коклаште.
Тудын йырже – нунын шӱгарышт,
керде деч колышо пӱчдымӧ еҥ-влак тушто кият.
Нуно илыше-влакын мландыштышт шучкылыкым шареныт,
а ынде шӱгарыш волышо-влак семынак намысыш пуреныт,
колышо-влак коклашке сӱмырен кудалтыме улыт.
26 Тушто – Мешех ден Тувал,
нунын шуко чотан калыкышт.
Нунын йыр – сарзышт-влакын шӱгарышт,
керде деч колышо пӱчдымӧ еҥ-шамыч тушто кият,
вет илыше-влакын мландыштышт
нуно шучкылыкым шареныт.
27 Огыт кий нуно пӱчдымӧ да пуштмо виян сарзе-влак дене пырля,
кӧмыт шке саргуралышт дене вес тӱняш воленыт,
кӧмытын вуй йымакышт кердым пыштеныт.
Осал пашашт нунын денак кодын,
вет нуно шучко сарзе лийыныт,
илыше-влакын мландышкышт лӱдмашым конденыт.
28 Тыят, фараон, пӱчдымӧ-влак коклашке камвозат, керде деч пытыше-влак коклаште кияш тӱҥалат.29 Тушто Едом, тудын кугыжа ден онжо-влак улыт – вий-куатышт улмо ӱмбач нуно керде дене пуштмо-влак коклаште кият. Кият нуно пӱчдымӧ-влак коклаште, шӱгарыш волышо-влак коклаште.30 Тушто – йӱдвелын вуйлатышыже-влак да Сидонышто илыше-шамыч, нуно тушко пуштмо еҥ-влак дене пырля воленыт. Кугу куатышт дене молым лӱдыктылмылан нуно намысыш пуреныт. Шӱгарыш волышо-влак семынак намысыш пурен, нуно, пӱчдымӧ-влак, керде деч пытыше-шамыч дене пырля кият.31 Фараон уло сарзывийже дене нуным ужеш, да шуко чотан калыкшын пытымыжлан ойгыжо лушка, – ойла Господь Юмо. –32 Кеч Мый фараонлан илыше-влакын мландыштышт лӱдмашым шараш эрыкым пуэнам, тудо шкеже да тудын шуко чотан калыкше керде деч пытыше пӱчдымӧ еҥ-влак коклаште кияш тӱҥалыт, – ойла Господь Юмо».
*а 32:2 Тыште, очыни, крокодил нерген ойлалтеш, тудо – Нил эҥерын да уло Египетын символжо.
*б 32:3 Келде – невод (кол кучымо ӱзгар).
Глава 32