Выбрать язык
Книги Ветхого Завета
Книги Нового Завета
с русским текстом1 Мылам Господьын шомакше лийын:2 «Айдеме эрге! Пророк шомакым ойло, тыге каласе: Господь Юмо тыге ойла:
”Шортса мӱгырен! О, ойган кече!
3 Вет лишне тиде кече, Господьын кечыже лишне!
Пычкемыш кече, калык-влакым судитлыме жап толеш!
4 Египет ӱмбак керде толеш,
Эфиопийым шучкылык авалта –
Египетыште пуштмо еҥ-шамыч кияш тӱҥалыт,
чыла шергаканжым поген налыт,
негыз-влакшым шалатат.
5 Эфиопий, Ливий, Луд эрге-влак
да Египет дене ик ушемыште улшо эл-влакын сарзыже-шамыч,
Хубын да ойпидыш мландын эргыже-шамыч
египтян-влак дене пырля керде деч пытат.
6 Тыге ойла Господь: Египетлан полшышо-влак камвозыт,
тудын кугешныше вий-куатше йомеш.
Мигдол гыч Сиена марте тушто керде деч пытат, –
ойла Господь Юмо.
7 Египет пуста мланде коклаште улшо ир мландыш савырна, шалатыме ола-влак коклаште тудын олаже-влак шалатыме шогаш тӱҥалыт.8 Мый Египетыш тулым колтем, да тудлан полшышо-влак пытарыме лийыт. Тунам пален налыт: Мый Господь улам.9 Тудо кечын Мыйын уверзем-влак пуш дене каят, лӱдыкшым палыде илыше эфиоп-шамычым лӱдмашыш пуртат – Египетым наказатлыме кечын нуным шучкылык авалта. Тиде кече лишемеш!
10 Господь Юмо тыге ойла: Египетын кугу чотан калыкшым Мый Вавилон кугыжа Навуходоносорын кидше дене пытарем.11 Тиде мландым пытараш Мый Вавилон кугыжам да тудын калыкшым, калык-влак кокла гыч эн осалжым, кондем. Нуно шке кердыштым Египет ваштареш луктыт, мландым колышо-шамыч дене темат.12 Мый эҥер-влакым коштем да мландым осал еҥ-шамычын кидышкышт пуэм. Йот тукым еҥ-влакын кидышт дене Мый тиде мландым да тушто мо улым пустаҥдем. Мый, Господь, тидым каласенам.
13 Тыге ойла Господь Юмо: Мемфисыште шояк юмо ден полган-влакым Мый пытарем. Тетла Египетыште вуйлатыше ок лий, Египетым Мый лӱдмашыш пуртем.14 Пафросым пустаҥдем, Цоаныш тулым колтем, тыгак Но ола*а дене судым ыштем.15 Шке шыдем Египетын Син карманже ӱмбак опталам, шуко еҥан Но олам пытарем.16 Египетыш Мый тулым колтем, Синым орлык авалта, Но ола шалатыме лиеш, кечывал кечын Мемфис ӱмбаке тушман-влак кержалтыт.17 Он*б ден Бубастын самырык еҥже-шамыч керде деч пытат, а моло калыкым пленыш налыт.18 Кунам Мый Тафнисыште Египетын кучемвийжым шалатем, тушко пычкемыш толеш. Тудын кугешныше вий-куатше пыта, олам пыл леведеш, ӱдыржӧ-влакым пленыш наҥгаят.19 Тыге Мый Египет дене судым ыштем, тунам пален налыт: Мый Господь улам!”»
20 Латикымше ийын икымше тылзыжын шымше кечынже мылам Господьын шомакше лийын:21 «Айдеме эрге! Мый фараонын, Египет кугыжан, кидшым пудыртенам. Тудым пидын огытыл, эмлен огытыл – тудо ок парем, кердым кучаш вийже ок лий.22 Сандене Господь Юмо тыге ойла: Мый фараон ӱмбаке, Египет кугыжа ӱмбаке, толам! Мый тудын кок кидшымат пудыртем – тазажымат, пудыртымыжымат. Тунам кидше гыч керде мучыштен камвозеш.23 Египтян-шамычым Мый калык-влак коклашке шалатем, тӱрлӧ эллашке пуалтен колтем.24 Вавилон кугыжан кидшым вияным ыштем да кидышкыже шке кердем кучыктем, а фараонын кидшым пудыртем. Тудо, пеш чот сусыргышо, Вавилон кугыжа ончылно йӧсын кечкыжаш тӱҥалеш.25 Вавилон кугыжан кидшым Мый вияным ыштем, а фараонын кидше вийдыме лиеш. Кунам Мый шке кердем Вавилон кугыжан кидышкыже кучыктем, да тудо кердым Египет мланде ӱмбаке нӧлталеш, пален налыт: Мый Господь улам.26 Мый египтян-шамычым калык-влак коклашке шалатем, тӱрлӧ эллашке пуалтен колтем. Тунам пален налыт: Мый Господь улам!»
*а 30:14 Но ола – тиде олан вес лӱмжӧ Фива.
*б 30:17 Он – тиде олан вес лӱмжӧ Илиополь.
Глава 30