Выбрать язык
Книги Ветхого Завета
Книги Нового Завета
с русским текстом1 Мыланем Господьын шомакше лийын:2 «Айдеме эрге, Тир нерген шортын муро.3 Каласе теҥыз порт воктене верланыше Тирлан, кудыжо отроласе калык-влаклан сатум торгаен:
”Тыге ойла Господь Юмо:
Тир, тый ’эн сӧрал улам’ манын ойлет!
4 Озаланыме кундемет – теҥыз вӱд коклаште,
чоҥышо-шамычет тыйым эн сӧралым ыштеныт.
5 Оҥат-влак Сенирысе кипарис дене ыштыме улыт,
мачтет-шамычым ышташ Ливанысе кедрым конденыт.
6 Пушкольмет-влакым Васанысе тумо дене ыштеныт,
палубетым – Киттим отро гыч кондымо кипарис дене,
тудым слон лу дене сӧрастареныт.
7 Парусет-влак Египетысе тӱрлеман йытын куэм гыч улыт,
тисте семын нуно тылат лийыныт.
Елиса отро гыч кондымо
шемалге-канде да шемалге-йошкар тӱсан куэм
тыйым кече деч леведын.
8 Сидон ден Арвадыште илыше-влак
пушкольмо дене куышет-шамыч лийыныт.
Уста пӧръеҥет-влак, Тир, пуш виктарыше лийыныт.
9 Гевал гыч калык кугурак ден мастар-шамыч тый денет лийыныт,
вӱд ынже пуро манын, шелше-влакетым петыркаленыт.
Теҥызысе чыла корабль ден тушто пашам ыштыше-влак
тый декет торгаяш толыныт.
10 Персий, Луд да Ливий гыч пӧръеҥ-шамыч
тыланет служитленыт, тыйын сарзет лийыныт,
корабль бортлашкет авыртыш ден ӧшлӧк-влакым сакаленыт.
Чыла тидыже тылат эшеат кугу чапым конден.
11 Арвад эрге-влак ден шке сарзывиет пырдыжлаштет шогеныт,
Гамад гыч толшо-влак башньылаштет ороленыт.
Пырдыж мучко пикш лодакыштым сакален,
тыйым эшеат моторым ыштеныт.
12 Фарсис тый денет торгаен, вет тый пеш поян лийынат. Сатуэтлан тудо ший, кӱртньӧ, шемвулно да вулно дене тӱлен.13 Тыгак Иаван, Тувал да Мешех тый денет торгаеныт. Тыйын сатуэтлан нуно кул-влак ден той арверым пуэныт.14 Фогармаште илыше-шамыч тылат сатуэтлан шупшыктышо да кушкыж коштмо имне дене, тыгак мул-влак дене тӱленыт.15 Тый денет Дедан эрге-шамыч торгаеныт, шуко отро-влак сатуэтым налыныт, тыланет слон лу да шем пушеҥге*а дене тӱленыт.16 Сатуэт шуко улмылан кӧра тый денет арамей-шамыч торгаеныт. Нуно сатуэтлан карбункул, шемалге-йошкар да тӱрлыман куэм, чапле йытын вынер, коралл да рубин дене тӱленыт.
17 Иуда ден Израиль мланде тый денет торгаеныт. Сатуэтлан нуно Миннифысе шыдаҥ, шере йӧрвар, мӱй, олив ӱй да бальзам дене тӱленыт.18 Шуко сатуан, пеш поян улметлан кӧра Дамаск тылат Хелбонысо йошкар арака ден ош межым торгаен.19 Ведан да Узал гыч Иаван сатуэтлан таптыме кӱртньым, кассий ден аирым пуэныт.20 Дедан тылат чапле ӧртньӧрлык шартышым торгаен.21 Аравий ден Кедарын онжо-влак сатуэтым пачалан, тага ден казалан вашталтен налыныт.22 Сава ден Рааман купечше-влакат тый денет торгаеныт, сатуэтлан тӱрлӧ эн сай тамлыпушан наста, шергакан кӱ да шӧртньӧ дене тӱленыт.23 Тыгак Харан, Хане, Еден да Саван купечше-влак, Ассирий ден Хилмад тый денет торгаеныт.24 Пазарышкет нуно шергакан вургемым, шемалге-канде да тӱрлеман куэмым, тӱрлӧ тӱсан ковёр ден пеҥгыде кандырам конденыт.
25 Фарсис корабль-шамыч сатуэтым шупшыктеныт.
Теҥыз вӱд ӱмбалне тый тӱрлӧ пого дене темыме коштынат.
26 Пушкольмо дене куышет-влак тыйым теҥыз покшеке луктыныт,
да келге вӱдыштӧ тыйым эрвел мардеж шалатен.
27 Тыйын поянлыкет, арвер ден сатуэт,
корабльыште ыштыше ден пуш виктарышет-влак,
шелше-влакым петыркалыше мастарет-шамыч,
сатучо ден сарзет-влак –
корабльыште лийше чыла еҥ-влак –
сӱмырлымет кечын теҥыз пундашыш порволат.
28 Йыр улшо кундем-влак
нунын магырымышт деч чытырнат.
29 Тунам пушкольмо дене куышо,
корабльыште ыштыше да пушым виктарыше-шамыч
корабль гыч серыш волен шогалыт.
30 Нуно кугу йӱкын магыраш да кочын шорташ тӱҥалыт,
вуйышкышт ломыжым шават, пуракыште пӧрдалыт.
31 Тылат кӧра нуно ӱпыштым нӱжын шуат,
чоштыра вургемым чият,
тыйын верч ойгыраш да чон кочын шорташ тӱҥалыт.
32 Ойгырымышт дене нуно тыйын нерген
тыге шортын мурат:
’Кӧ Тир семын теҥыз вӱд коклаште пытарыме лийын?
33 Теҥыз дене кондымо сатуэтым
тый шуко калыклан ситаренат.
Кугу поянлыкет дене, торгайымет дене
мландымбалысе кугыжа-влакым пойдаренат.
34 А кызыт тыйым теҥыз толкын-влак шалатеныт,
сату ден чыла еҥет тый денет пырля вӱд йымак каеныт.’
35 Тый денет мо лиймым ужын,
отролаште илыше-влак лӱдын ӧрткеныт.
Нунын кугыжашт чытырат,
чурийышт шапалген.
36 Вес калык-влакын сатучышт,
тыйын нерген колын, ӧрын шӱшкалтен колтат.
Тый шучкылыкыш савырненат,
курымешлан йомынат!”»
*а 27:15 Шем пушеҥге – тыште тропикыште кушшо эбен пушеҥге нерген ойлалтеш, чоткыдо да шем тӱсан улмыжлан кӧра тудо пеш шергакан лийын.
Глава 27