Выбрать язык
Книги Ветхого Завета
Книги Нового Завета
с русским текстом1 Мыланем Господьын шомакше лийын:2 «Айдеме эрге! Чуриетым Израиль курыкла деке савыре да нунын ваштареш пророклен ойло!3 Каласе нунылан: Израиль курык-влак! Колыштса Господь Юмын шомакшым. Тыге ойла Господь Юмо курык ден кӱкшака-влаклан, корем ден лапвер-влаклан: Мый тендан ӱмбак кердым колтем, кӱкшакасе кумалме верда-шамычым шалатем.4 Жертвенник ден тӱтырымӧ ӱстелда-влак пытарыме, шалатыме лийыт, пуштмо еҥ-шамычым Мый шояк юмыда-влак ончыко кудалтем.5 Израиль эрге-шамычын капыштым шояк юмышт ончыко шуэм, тендан лулегыдам жертвенник-влакда йыр кышкем.6 Кеч-кушто иледа гынат, олада пустаҥдыме, кӱкшакасе кумалме верда-влак шалатыме лийыт. Жертвенникда сӱмырымӧ, шояк юмыда шалатыме да пытарыме, тӱтырымӧ ӱстелда пудыртымо лийышт манын, тиде ыштыме лиеш. Тыге кидда дене ыштыме чыла пашада йомеш.7 Тендан кокла гыч шукышт пуштмо лийыт, тунам те пален налыда: Мый Господь улам.
8 Но тендан кокла гыч икмынярым Мый илышым кодем. Нуно керде деч утлат да вес элласе калык-влак коклашке шалатыме лийыт.9 Тунам утлен кодшо еҥда-шамыч пленыште лийме калык-влак коклаште Мыйым шарналтат. Мый дечем кораҥше яжар шӱмыштым, шояк юмо-влак почеш кайыше яжар шинчаштым Мый ойгандарем. Чыла осал пашаштлан, ыштыме йырныкыштлан нуно шкаланышт шке йыгыжге лийыт.10 Нуно умылат: Мый Господь улам. Чыла тиде орлыкым нунын ӱмбаке кондем манын, арам огыл ойленам».
11 Тыге ойла Господь Юмо: «Кидетым пералте, йолет дене тавалте да кычкырал: ”Чыла осал йырнык пашажлан Израиль калыкым ойго вуча!” Нуно керде, шужымаш да шучко чер деч колаш тӱҥалыт.12 Кӧ тораште – шучко чер деч кола, кӧ лишне – керде деч пыта, а утлен кодшыжо шужен кола. Тыге Мый нунын ӱмбаке уло шыдем опталам.13 Пуштмо кап-влак жертвенник йыр шке шояк юмышт коклаште, кажне кӱкшӧ чоҥгата ден курык вуйышто, кажне одарле пушеҥге ден ладыра тумо йымалне – шояк юмыштлан тамлыпушым тӱтырымӧ верлаште – кияш тӱҥалыт. Тунам те умыледа: Мый Господь улам.14 Мый нунын ӱмбак кидем нӧлталам да тиде элым ир мланде гыч Дивлаф марте – чыла вере, кушто нуно илат – еҥ илыдыме ошманурыш савырем. Тунам нуно умылат: Мый Господь улам!»
Глава 6