Выбрать язык
Книги Ветхого Завета
Книги Нового Завета
с русским текстом1 А тый, айдеме эрге, пӱсӧ кердым нал да пондашым нӱжымӧ кӱзӧ дене нӱжымӧ семын ӱпет ден пондашетым нӱжӧ. Вара висам нал да нӱжымӧ ӱпетым кум ужашлан пайле.2 Кунам олам авырен налме жапет пыта, ик ужашыжым ола покшелне йӱлалте. Вес ужашым ола йыр керде дене руэн пытаре. Кумшо ужашым мардеж почеш колто, а Мый кердем луктам да тудым поктен каем.3 Но икмыняр ӱп пырчым кодо да вургем урвалтешет кылде.4 Вара тышечынат икмынярым нал да тулыш кудалте, тидым йӱлалте. Тушеч тул уло Израиль калык ӱмбаке лектеш».
5 Тыге ойла Господь Юмо: «Чыла тиде – Иерусалим нерген! Мый тудым калык-влак коклаште вераҥденам, тудын йырже вес эл-шамыч улыт.6 Но тудо Мыйын законем-влакым моло калык деч чотрак пудыртен, йырже улшо элла-шамыч деч чотрак Мыйын пунчалем-влак ваштареш шогалын. Вет тудо закон-влакем деч кораҥын, пунчал-влакемым огеш шукто.7 Сандене Господь Юмо тыге ойла: те йыр улшо калык-шамыч деч вуянчырак улыда, Мыйын закон-влакем почеш огыда иле, пунчал-влакем огыда шукто, эсогыл йыр улшо калык-шамычын законыштым огыда колышт.8 Сандене Господь Юмо тыге ойла: Мый Шке тыйын ӱмбакет толам, нине калык шинча ончылно тый денет, Иерусалим, судым ыштем.9 Чыла йырныкетлан Мый тый денет тудым ыштем, мом нигунам ыштен омыл да ончыкыжым ышташ ом тӱҥал.10 Тыйын пырдыжет коклаште ача-влак шке эргыштым, а эрге-влак ачаштым кочкаш тӱҥалыт. Мый тый денет судым ыштем, а утлен кодшо еҥет-шамычым чыла велыш шалатен колтем.11 Шкем дене товатлем, – ойла Господь Юмо, – Мыйын святой верем тӱрлӧ йыгыжге йырнык дене шакшылыметлан Мый тыйым пӱчкын кудалтем, тыйым ом чамане, ом серлаге.12 Калыкетын ик ужашыже уремлаштет шучко чер да шужымаш деч кола, вес ужашыже пырдыжет йыр керде деч пыта, а кумшо ужашым чыла велыш шалатен колтем да керде дене поктен каем.13 Тунам веле Мыйын кугун сырымем пыта, нунын ваштареш шыдем лушка, да Мый лыпланем. Кунам Мый ӱмбакышт шыдем опталам, нуно пален налыт: тиде Мый, Господь, нунылан шыде тулем дене ойленам.
14 Йырет улшо калык-влак коклаште Мый тыйым кӱ орашке савырем, воштылчыкыш луктам – кажне эртен кайыше тидым ужеш.15 Кунам Мый пеш чот сырымем дене тый денет судым ыштем да кугу шыдем дене тыйым мут кучаш шогалтем, йырет улшо калык-влаклан тый воштылчык ден мыскылтыш, шучко шижтарымаш лият. Мый, Господь, тидым каласенам.16 Тыйым пытараш манын, ӱмбакет шужымашын осал пикшыже-влакым колтем. Мый шужымашым кугемдем да тыйым кинде деч посна кодем.17 Мый ӱмбакет шужымашым да шучко янлык-влакым колтем, нуно тыйым йоча деч посна кодат. Тыйын гоч шучко чер ден вӱр йоктарымаш эртат, ӱмбакет Мый кердым колтем. Мый, Господь, тидым каласенам».
Глава 5