Выбрать язык
Книги Ветхого Завета
Книги Нового Завета
с русским текстом1 Иуда кугыжа Седекийын кандаш ий да индеш тылзе вуйлатымекше, Вавилон кугыжа Навуходоносор уло сарзывийже дене Иерусалим деке толын да тудым авырен налын.2 А Седекийын лу ий, кум тылзе да кандаш кече вуйлатымекше, олам сеҥен налыныт.3 Вавилон кугыжан тӧраже-влак олашке пуреныт да Покшел капка воктеке шинчыныт. Тиде – Нергал-Шарецер, Самгар-Нево, евнух-влакым вуйлатыше Сарсехим, тӱҥ шӱдырмужаҥ*а Нергал-Шарецер да Вавилон кугыжан моло тӧраже.4 Нуным ужмеке, Иуда кугыжа Седекий да чыла сарзыже куржыныт – ола гыч кугыжан садвечыже да кок пырдыж кокласе капка гоч йӱдым лектыныт, тӧрвер корно дене куржыныт.5 Но халдей сарзе-влак почешышт каеныт да Седекийым Иерихонысо тӧрверыште поктен шуыныт. Нуно кугыжам руалтен кученыт да Вавилон кугыжа Навуходоносор деке Емаф мландысе Ривлаш наҥгаеныт. Тушто Навуходоносор тудлан судым ыштен.6 Ривлаште Вавилон кугыжа Седекийын эргыже-влакым тудын шинча ончылныжо шӱшкыл пуштын, тыгак Иудан чыла тӧражым пытарен.7 Тидын деч вара Седекийын шинчажым шӱтен да, Вавилоныш наҥгаяш манын, тудым той шинчыр дене шинчырлен.
8 Халдей-шамыч кугыжан полатшым да калыкын пӧртшӧ-влакым йӱлалтеныт, Иерусалимын пырдыжшым шалатеныт.9 Олаште кодшо-влакым, тыгак Вавилон кугыжа дек вончышо-шамычым, кӧмыт утлен кодыныт, капорол вуйлатыше Навузардан чылаштым Вавилоныш наҥгаен.10 Но икмыняр йорло еҥым, кудыштын нимошт лийын огыл, капорол вуйлатыше Навузардан Иуда мландеш коден да нунылан тудо кечынак виноград аҥа ден пасу-влакым пуэн.
11 А Иеремий шотышто Вавилон кугыжа Навуходоносор капорол вуйлатыше Навузарданлан тыгай кӱштымашым пуэн:12 «Тудым кычал му да полшен шого. Тудлан нимо удам ит ыште, чыла йодмыжым шукто».13 Капорол вуйлатыше Навузардан, евнух-влакым вуйлатыше Навузазван, тӱҥ шӱдырмужаҥ Нергал-Шарецер да Вавилон кугыжан моло тӧраже14 Иеремийым кондаш еҥ-влакым колтеныт. Нунышт тудым орол кудывече гыч налыныт да Шафан эрге Ахикамын Годолий эргыжлан Иеремийым мӧҥгыжӧ намиен кодаш кӱштеныт. Тыге Иеремий шке калыкше коклаште илаш кодын.
15 Кунам Иеремий эше орол кудывечыште петырымаште улмаш, тудлан Господьын шомакше лийын:16 «Кай, эфиоп Авдемелехлан каласе: тыге ойла Господь Саваоф, Израильын Юмыжо: тиде ола нерген мом ойлымо шомакем Мый шуктем – тудлан тиде сайыш огыл, а ойгыш савырна! Тиде кече лишемеш, кунам тый шомакем шукталтмым шке шинчат дене ужат.17 Но тыйым Мый тудо кечын утарем, – ойла Господь, – кӧмыт деч лӱдат, тый нунын кидыш от логал.18 Мый тыйым утарем. Тый керде деч от камвоч, илыше кодат, вет тый Мыланем инанет, – ойла Господь».
*а 39:3 Шӱдырмужаҥ – звездочёт.
Глава 39