Выбрать язык
Книги Ветхого Завета
Книги Нового Завета
с русским текстом1 Иерусалим ден Иуда гыч Вавилон пленыш наҥгайышаш еҥ-влак коклаште шинчыр дене шинчырлыме Иеремий лийын. Капорол вуйлатыше Навузардан тудым муын да Рамаште эрыкыш колтен. Тидын деч вара Иеремийлан Господь дечын шомак лийын.2 Капорол вуйлатыше Иеремийым шкеж деке кондаш кӱштен да тудлан каласен: «Господь, тыйын Юмет, тиде верыш ты ойгым колташ сӧрен.3 Господь кызыт тидым ыштен, мом каласымыжым шуктен. Вет те Господь ончылно сулыкыш пуренда, Тудым колыштын огыдал, сандене чыла тиде тендан дене лийын.4 Но таче мый кидет гыч шинчырым мучыштарем. Мый денем пырля Вавилоныш кайынет гын, айда каена – мый тыланет мо кӱлешым чыла пуэм. А Вавилоныш пеленем ынет кай гын, тыште код. Шке ончо, пӱтынь мланде ончылнет: кушко шонет, тушко кай».
5 Иеремий эше кораҥын шуктен огыл, Навузардан ешарен: «Вавилон кугыжа Ахикам эрге Годолийым, Шафанын уныкажым, Иуда мландысе ола-влакын вуйлатышыжлан шогалтен. Тый Годолий деке каен да калык коклаште тудын пелен илен кертат. Але куш шонет, тушко кай». Вара капорол вуйлатыше Иеремийлан кочкышым, пӧлекым пуэн да колтен.6 Иеремий Годолий деке, Ахикам эрге деке, Мицпаш каен. Ты мландыште кодымо калык коклаште тудо Годолий пелен илен.
7 Шке еҥышт дене ялыш шылын кайыше сарзывуй-влак колыныт: Вавилон кугыжа кундемтӧралан Годолийым, Ахикам эргым, шогалтен да Вавилон пленыш наҥгайыдыме пӧръеҥ, ӱдырамаш да йоча-шамычым – элысе эн йорло-влакым – тудын кид йымакше пуэн.8 Тунам нуно Годолий деке Мицпаш толыныт. Тиде – Измаил, Нефаний эрге, Карейын Иоханан ден Ионафан эргыже-влак, Танхумефын Сераий эргыже, Нетофа гыч Офан эргыже-влак, Мааха гыч Иезоний да нунын еҥышт.9 Годолий, Ахикамын эргыже, Шафанын уныкаже, нунылан да нунын еҥыштлан товатлен ойлен: «Халдей-влаклан служитлаш ида лӱд, элыштак кодса да Вавилон кугыжан кид йымакше кусныза – тендан дене чыла сай лиеш!10 Мый шкеже Мицпаште кодам, мемнан деке толшо халдей-влак ончылно тендан ӱшанъеҥда лиям. А те йошкар арака, смоква да олив ӱй шапашым ыштыза, тудын дене атыда-влакым темыза да угыч шкаланда налме олалаштыда илыза».
11 Моав кундемыште, аммон-влакын мландыштышт, Идумейыште да моло элыште илыше Иуда тукым еҥ-шамычат колыныт: Вавилон кугыжа Иуда мландыште калыкын икмыняр ужашыжым коден да нунын вуйлатышыштлан Годолийым, Ахикамын эргыжым, Шафанын уныкажым, шогалтен.12 Нине Иуда тукым еҥ-влак поктен колтымо верлашт гыч мӧҥгеш Иуда мландыш, Годолий деке Мицпаш, пӧртылыныт. Нуно пеш шуко йошкар арака ден смоквам шапашленыт.13 Карей эрге Иоханан да ялыш шылын кайыше сарзывуй-влак Годолий деке Мицпаш толыныт14 да тудлан каласеныт: «Ваалис, аммон-шамычын кугыжашт, тыйым пушташ Измаилым, Нефаний эргым, колтен. Тый тидым от пале мо?» Но Ахикам эрге Годолий нунылан ӱшанен огыл.15 Тунам Иоханан, Карей эрге, Мицпаште Годолийлан шыпак каласен: «Тореш ит лий, мый каем да Нефаний эрге Измаилым пуштам – нигӧ нимомат пален ок нал. Молан тудлан тыйым пушташ пуаш? Тунам тый декет погынышо Иуда тукым еҥ-шамыч угыч шаланат, Иудан утаралт кодшыжо-влак пытат».16 Но Годолий, Ахикам эрге, Иохананлан, Карей эргылан, каласен: «Тидым ит ыште! Мом Измаил нерген ойлет – тиде шояк».
Глава 40