Выбрать язык
Книги Ветхого Завета
Книги Нового Завета
с русским текстом1 Матфанын Сафатий эргыже, Пашхурын Годолий эргыже, Шелемийын Юхал эргыже, Малхийын Пашхур эргыже Иеремийын уло калыклан тыге ойлымо шомакшым колыныт:2 «Господь тыге ойла: кӧ тиде олаште кодеш – тудо керде, шужымаш да шучко чер деч кола. А кӧ халдей-влак деке лектеш да шкенжым нунын кидыш пуа – илыше кодеш, тудо чонжым арален кода да илаш тӱҥалеш.3 Тыге ойла Господь: тиде ола Вавилон кугыжан сарзыже-влак кидыш пуымо лиеш, кугыжа тудым садак руалтен налеш».4 Тунам сарзывуй-влак кугыжалан каласеныт: «Тиде еҥым пушташ кӱлеш! Вет тудо, тыгай шомакым ойлен, олаште кодшо сарзе-шамычын кумылыштым, уло калыкын кумылжым волта. Тиде еҥ калыкетлан сайым огыл, а осалым шона».5 Седекий кугыжа вашештен: «Тудо тендан кидыште. Вет кугыжа тендан кумылда ваштареш нимом ыштен ок керт».
6 Тунам Иеремийым руалтен кученыт да вӱд вынемыш волтеныт. Орол кудывечыште улшо тиде вынем кугыжан эрге Малхийын лийын. Иеремийым тушко кандыра дене волтеныт. Вынемыште тунам вӱд огыл, а вишкыде лавыра лийын, да Иеремий тиде лавыраш логалын.7 Эфиоп Авдемелех, кугыжан полатысе евнух-влак кокла гыч иктыже, Иеремийым вынемыш волтымо нерген колын. Кугыжа тиде жапыште Вениамин капка воктене шинчен.8 Авдемелех кугыжан полат гыч лектын да кугыжалан каласен:9 «Мыйын кугыжа озам! Пророк Иеремийым вынемыш кудалтен, тиде еҥ-влак осалым ыштеныт. Тушто тудо шужен кола, вет олаште кинде тетла кодын огыл».
10 Тунам кугыжа эфиоп Авдемелехлан кӱштен каласен: «Пеленет тышеч кумло еҥым нал да пророк Иеремийым вынем гыч лук, уке гын тудо кола».11 Авдемелех еҥ-влакым налын да кугыжан пӧртыш, клат йымалысе пӧлемыш, каен. Тушто тудо шӱкшӧ, тошто вургем ден лапчык-влакым налын да чыла тидым Иеремий деке вынемыш кандыра дене волтен.12 Эфиоп Авдемелех Иеремийлан каласен: «Кандыра ынже пӱч манын, тиде тошто вургем ден лапчыкым коҥлайымакет пыште». Иеремий тыгак ыштен,13 да тудым кандыра дене вынем гыч шупшын луктыныт. Тидын деч вара Иеремий орол кудывечыште кодын.
14 Седекий кугыжа пророк Иеремийым шкеж деке кондаш кӱштен. Пророкым Господьын пӧртшын кумшо пурымо верже деке конденыт. Тушто кугыжа Иеремийлан каласен: «Мый тый дечет икмом йодам, а тый мый дечем нимом ит шылте».15 Иеремий Седекий деч йодын: «Мый тылат вашештем гын, тый мыйым от пушт? Мый тылат каҥашым пуэм гынат, тый мыйым от колышт».16 Седекий кугыжа Иеремийлан шолып товатлен: «Мыланна илышым пуышо Господь дене товатлем: мый тыйым ом пушт, чонетым кычалше нине еҥ-влак кидыш тыйым ом пу».
17 Тунам Иеремий Седекийлан каласен: «Тыге ойла Господь Юмо Саваоф, Израильын Юмыжо: Вавилон кугыжан сарзывуйышт деке лектат да шкендым нунын кидыш пуэт гын, илышет утарет, тиде олат йӱлалтыме ок лий. Тый шкежат, ешетат илыше кодыда.18 А Вавилон кугыжан сарзывуйышт деке от лек гын, тиде ола халдей-шамычын кидышкышт пуымо лиеш. Нуно тудым йӱлалтат, тыят нунын кидышт деч от утло».
19 Седекий кугыжа Иеремийлан каласен: «Мый халдей-влак деке куржшо калыкем деч лӱдам. Халдей-влак мыйым нунылан пуат гын, нуно мый денем торжа лийыт».20 «Халдей-влак тыйым огыт пу, – вашештен Иеремий. – Колышт Господьым. Мом тыланет каласенам, тыгак ыште. Тунам тый денет чыла сай лиеш, тый илыше кодат.21 А Вавилон кугыжан сарзывуйышт деке лекташ от келше гын, Господьын мыланем увертарыме шомакше шукталтеш:22 Иуда кугыжан полатыштыже кодшо чыла ӱдырамашым Вавилон кугыжан сарзывуйышт деке луктыт. Нине ӱдырамаш-влак тылат каласат: ”Ӱшанле йолташет-шамыч тыйым ондаленыт да сеҥеныт. А кунам йолет лавыраш пижын шинчын, нуно тыйым коден каеныт”.23 Тыйын чыла ватет ден йочатым халдей-влак деке наҥгаят, да тый шкежат нунын кидышт деч от утло. Вавилон кугыжа тыйым руалтен куча, а тиде ола йӱлалтыме лиеш».
24 Тунам Седекий Иеремийлан каласен: «Тек тиде кутырымына нерген нигӧ ок пале, тунам тый от коло.25 Сарзывуй-влак, тый денет кутырымем нерген колын, тый декет толыт да ”Каласкале, мом кугыжалан ойленат да мом тудо тыланет ойлен, нимом ит шылте, тунам тыйым огына пушт” маныт гын,26 нунылан вашеште: ”Кугыжа мыйым Ионафанын пӧртышкыжӧ ынже пӧртылтӧ манын, тудым сӧрвален йодынам, вет тушто мыйым колымаш вуча”».
27 Иеремий деке сарзывуй-влак толыныт да йодышташ тӱҥалыныт. Иеремий нунылан кугыжан кӱштымыж семынак вашештен. Сарзывуй-влак тетла нимом каласен огытыл, вет мо нерген тудо кугыжа дене кутырен, нигӧ пален огыл.28 Орол кудывечыште Иеремий Иерусалимым сеҥен налме кече марте лийын. Теве Иерусалим сеҥен налме лийын.
Глава 38