Выбрать язык
Книги Ветхого Завета
Книги Нового Завета
с русским текстом1 Иоаким эрге Иехоний олмеш Седекий, Иосий эрге, кугыжаланаш тӱҥалын. Иудан кугыжажлан тудым Вавилон кугыжа Навуходоносор шогалтен.2 Пророк Иеремий гоч ойлымо Господьын шомакшым Седекият, тарзыже-влакат, элысе калыкат колыштын огытыл.3 Седекий кугыжа пророк Иеремий деке Иегухалым, Селемий эргым, да иерей Софонийым, Маасей эргым, тыге каласаш колтен: «Мемнан верч Господь Юмыланна кумал».
4 Иеремий тунам калык коклаште эрыкан илен, тудым эше казаматыш петырен огытыл улмаш.5 Тиде жапыште Египет гыч фараонын сарзывийже толаш лектын. Иерусалимым авырен налше халдей-влак, тидын нерген колмеке, Иерусалим деч чакнен каеныт.6 Пророк Иеремийлан Господь деч шомак лийын:7 «Тыге ойла Господь, Израильын Юмыжо: тендам Мый декем каҥашым йодаш колтышо Иуда кугыжалан тыге каласыза: тыланда полшаш толшо фараонын сарзывийже мӧҥгеш шке Египет мландышкыже пӧртылеш,8 а халдей-влак угыч толыт да тиде ола ӱмбак кержалтыт, тудым сеҥен налыт да йӱлалтат.9 Тыге ойла Господь: халдей-влак мемнан деч чынжымак каят манын, шкендам ида ондале. Нуно огыт кай!10 Тендан дене кредалше халдей-влакын сарзывийыштым те кырен шалатеда ыле гынат, да нунын сусыргышо-влакышт гына кодыт ыле гын, нуно омашышт гыч лектыт да тиде олам йӱлалтат ыле».
11 Кунам халдей-влакын сарзывийышт фараонын сарзывийжылан кӧра Иерусалим деч чакнен каен,12 Иеремий Иерусалим гыч Вениамин мландыш каяш лектын – тушто тудо шке тукым мланде пайжым налаш шонен.13 Но кунам тудо Вениамин капка деке миен шуын, Иреий лӱман орол вуйлатыше – Селемийын эргыже, Ананийын уныкаже – пророк Иеремийым пӱтырен кучен да каласен: «Тый халдей-влак деке куржнет!»14 Иеремий вашештен: «Тиде чын огыл! Мый халдей-влак деке ом курж». Но Иреий тудым колыштын огыл, Иеремийым пӱтырен кучен да тӧра-шамыч деке конден.15 Тӧра-влак Иеремийлан шыдешкыше лийыныт. Нуно тудым кыреныт да казаматыш, возкалыше Ионафанын пӧртышкыжӧ, шынденыт – тиде пӧртым казаматыш савыреныт улмаш.16 Тыге Иеремий подвалысе казаматыш логалын да тушто кужу жап лийын.
17 Вара Седекий кугыжа Иеремийым шкеж деке кондаш колтен. Кугыжа шке полатыштыже пророк деч шыпак йодын: «Господь деч шомак уло мо?» Иеремий вашештен: «Уло. Тый Вавилон кугыжа кидыш логалат».18 Иеремий Седекий кугыжалан эше каласен: «Мо дене мый тыйын ончылнет, тарзет-влак ончылно да тиде калык ончылно сулыкыш пуренам, молан те мыйым казаматыш петыренда?19 Кушто улыт пророкда-влак, кӧмыт тыланда ”Вавилон кугыжа тендан ӱмбак, тиде мланде ваштареш огеш тол” манын увертареныт?20 А кызыт йодам, кугыжа озам, колышт мыйым! Мыйын йодмашем дек пылышет савыре – возкалыше Ионафанын пӧртышкыжӧ мыйым мӧҥгеш ит колто, уке гын тушто колем».
21 Седекий кугыжан кӱштымыж почеш Иеремийым орол кудывечыш петыреныт. Олаште кинде пытымешке, кажне кечын тудлан Киндыпыштыше уремыште кӱктымӧ ик лепошкам пуэныт. Тыге Иеремий орол кудывечыште кодын.
Глава 37