Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
61 Глава
Господьын порылык ийже.1 Господьын Шӱлышыжӧ Мыйын ӱмбалнем –
Тудо Мыйым йорло-влаклан Поро Уверым шараш шӱрен палемден,
сусыргышо шӱм-чонан-влакым паремдаш,
пленыште улшо-шамычлан эрыкыш колтымо нерген,
кучен петырыме-влаклан казамат гыч лукмо нерген увертараш колтен.
2 Тудо мыйым Господьын порылык ийже
да Юмынан чыла пашалан пӧртылтымӧ кечыже
толын шумо нерген увертараш,
чыла ойгырышо-влакым лыпландараш колтен,
3 тыгак Сионышто ойгырен шинчыше-влаклан
ломыж олмеш мотор вуйшӱдышым,
шортмо олмеш куан ӱйым,
ойган шӱлыш олмеш моктымаш вургемым пуаш колтен.
Лӱмдат нуным «Чынлыкыште пеҥгыдын шогышо тумо-влак,
шке чапшым ончыкташ шындыме Господьын садше».
4 Акрет годымак шалатыме верлаште нуно угычын чоҥат,
ожно годымак шалатымым уэш нӧлталыт,
шуко жап пуста шогышо, сӱмырымӧ ола-влакым уэмдат.
5 Йот калык еҥ-шамыч кӱтӱдам кӱташ тӱҥалыт,
пасу ден виноград аҥаштыда вес тукым еҥ-влак пашам ыштат.
6 А тендам «Господьын иерейже» манын лӱмдат,
«мемнан Юмыланна служитлыше-влак» манын каласат.
Те калык-влакын погыштым кучылташ тӱҥалыда,
нунын поянлыкышт дене чапланеда.
7 Ончычсо намыслан тыланда кок пачаш пӧртылтымӧ лиеш,
мыскылалтмыда олмеш мланде пайлан куанеда,
вет шке элыштыда тудым кок пачаш шукырак налыда –
мучашдыме куан тендам вуча.
8 «Мый, Господь, чын судым йӧратем,
агымаш ден осалым ужмем ок шу.
Чын почеш Мый калыкемлан пӧлекым кучыктем,
нунын дене курымаш ойпидышым ыштем.
9 Лӱмлӧ лиеш нунын урлыкышт калык-влак коклаште,
тукымышт – моло тукым коклаште.
Нуным ужшо кажне еҥ умыла:
нуно Господьын суапландарыме калыкше улыт».
10 Кугу куан дене мый Господьлан куанем,
шке Юмемлан йывырта чонем –
чиктен Тудо мылам утарымаш вургемым,
чын ыштымаш чием дене мыйым вӱдылын!
Мый пуйто чапле вуйчием дене сӧрастарыме каче,
тӱрлӧ сӧрастарыш дене сылнештарыме оръеҥ улам.
11 Кузе мланде кушкылым шочыкта
да ӱдымӧ нӧшмылан сад кушкаш пуа,
тугак Господь Юмо чыла калык ончылно
чын ыштымаш ден моктымашым шочыкта!
Глава 61
