Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
60 Глава
Иерусалимын ончыкылык чапше.1 «Кынел, волгалт, [Иерусалим]!
Тыйын волгыдет толын,
Господьын чапше ӱмбалнет нӧлталтын!
2 Теве мландым леведеш пычкемыш,
калык-влакым – тӱп пычкемыш,
но тыйын ӱмбалнет Господьын волгыдыжо нӧлталтеш,
Тудын чапше ӱмбалнет волгалтеш.
3 Тыйын волгыдет дек калык-влак толыт,
ӱмбалнет нӧлталтше ӱжара дек кугыжа-шамыч погынат.
4 Вует нӧлтал да йырым-йыр ончал:
чылан погынен, тый декет толыт –
толыт эргыч-влак умбачын,
ӱдырет-влакым нумал кондат.
5 Чыла тидым ужын, тый йывыртет,
шӱметше ончыч чытырна, но вара куан дене темеш.
Намият тый декет теҥыз деч налме парышым,
калык-влакын поянлыкыштым кондат тыланет.
6 Мландетым темат верблюд-влак,
Мадиам ден Ефа гыч толшо самырык верблюд-влак.
Сава гыч толыт чылан –
шӧртньӧ ден ладыным кондат,
Господьын чапшым увертарат.
7 Кедарысе кӱтӱ-влак тый декет погынат,
тыйын кидыште лийыт Неваиофысо тага-влак:
Мылам келшыше надыр шотеш нуным жертвенникышкем пыштет.
Шкемын чапле пӧртемым Мый чапландарем!
8 Кӧмыт нине чоҥештат пыл семын,
кӧгӧрченла мӧҥгышкышт вашкат?
9 Вучат Мыйым отро-влак,
теве эн ончыч Фарсис корабль-шамыч толыт,
эргыч-влакым умбачын ший-шӧртньышт дене пырля кондат,
Господь Юмет, Израильын святой Юмыжо лӱмеш кондат,
вет Тудо тыйым чапландарен.
10 Йот калык еҥ-влак угыч пырдыжет чоҥат,
нунын кугыжашт тылат служитлаш тӱҥалыт.
Шыдем дене Мый тыйым кыренам,
но порылыкем дене чаманен налам.
11 Капкат-влак эре почмо лийыт,
огыт петыре нуным кечывалымат, йӱдымат:
калык-влакын поянлыкыштым тый декет кондат,
нунын кугыжаштым вӱден кондат.
12 Калык але кугыжаныш, кудыжо тылат ынеже служитле, пыта;
тыгай калык мландымбач йомеш.
13 Ливанын чапше тый декет толеш:
кипарис, платан да пӱнчӧ –
Мыйын святой верем нунын дене сӧрастарыме лиеш,
йол шындыме верем Мый чаплым ыштем.
14 Тыйым шыгыремдыше-влакын эргышт толыт вуйыштым саваш,
йол воктекет кумык возыт тыйым шотлыдымо-шамычат.
Лӱмдат тыйым ”Господьын Олаже”,
”Израильын святой Юмыжын Сионжо”.
15 Лийынат тый кудалтен кайыме, ужмышудымо,
тыйын гоч нигӧ каен огыл.
Но Мый курымешлан тылат чапым пуэм,
тукым гыч тукымыш тый куан лият.
16 Йот калык-влак пукшен-йӱкташ тӱҥалыт тыйым,
кугыжа-шамыч тылат чызе шӧрыштым пукшат.
Тунам пален налат тый:
Мый Господь улам – тыйым Утарыше,
Иаковын Виян Юмыжо, тыйым Сулен налше.
17 Той олмеш Мый тылат шӧртньым кондем,
кӱртньӧ олмеш – шийым,
пу олмеш – тойым,
кӱ олмеш – кӱртньым.
Вуйлатышетлан шогалтем Мый тынысым,
чынлык тыйын эскерышет лиеш.
18 Тыйын элыштет темден илыме нерген,
мландыштет пустаҥдыме да пытарыме нерген тетла огыт кол.
Ола пырдыжет-влакым ”Утарымаш” манын лӱмдет,
капкат-влаклан ”Моктымаш” лӱмым пуэт.
19 Кече огыл тылат кечывалым волгалтараш тӱҥалеш,
тылзе огыл тылат йолгыжаш тӱҥалеш:
Господь лиеш курымашлык волгыдет,
тыйын Юмет лиеш тыйын йолгалтше чапет.
20 Ок шич тетла тыйын кечет, тылзет огеш шыл:
Господь Шкежак тылат курымашлык волгыдо лиеш,
ойган кечет-влак пытат.
21 Тыйын калыкет гыч чылан лийыт чын ыштыше,
курымешлан лийыт мландылан оза.
Лийыт нуно Мыйын шындыме озым, кидемын пашаже,
Мыйын чапемым нуно ончыктат.
22 Эн изи гыч тӱжем лектеш,
эн начар гыч виян калык шочеш.
Кунам жап шуэш, Мый, Господь, тидым писын шуктем».
Глава 60
